BOTHUBO 16
16
Hagar ngo Ishmael
1Abram nipu Sarai no atianuli punu moe, liqelimi lakhi Hagar ache, liye Ijipmi ke. 2Sarai no Abram vilo pi, “AMPEU no ipelo atianuli punu pemono lakha vetsuae. Ike wupuzu iqeliu sasu ashiaji kuqha julo, ishi ake lino isala anuli punu tsuluvie.” Ike Abram no pa nipu Sarai tsa inive. 3Ike Sarai no li qeliu Hagar, ti Ijip liu hu pesu Abram nipu amishiu shipenike tsuve. Tiye Abram no Kanan yeghilo ampe chighi acheuve kethiuno ke. 4Abram no Hagar sasu ashi-aji kuqhae eno liye mishiuve. Hagar no mishiluve aghi kethiuye lino amipeliu Sarai thaighauve. 5Tile Sarai no Abram vilo pi, “Ikipimi oshou ikughi peni. Oshouno imukhu lupeniu, iqeliu pesu otsuke lauye lino mishiluve kemtsa ijumthi thuvae. AMPEU pelo nikujo dolo kughathatsu peniu.” 6Ike Abram no khochile pi, “Julo, oqeliu ke ogho shiwulo, li kughape opulou shiwulo.” Sarai no mughachhoi Hagar peitha kelono liye pove.
7Ike AMPEU kungumi lakhino Shur lalo asakughutsu kumo qhalo azupuki akeu lono li phulue. 8Pano pi, “Sarai qeliu Hagar, noye khilano cheni eno khilau wuniye kya?” Lino khochile pi, “Niye impeliu Sarai launo po cheni.” 9Kungumino pi, “Omipeliu lau idewolo, eno noye aghokulu shi li gholo ngolo.” 10Itaghi AMPEU wu kungumi no li vilo pi,
“Ino oti kumzapushi kughukotsu nani,
11Noye anga opolo ani eno anu lakhi punu nani,
paje Ismael ku-tsulo,
kughengu AMPEU no okijikusa ghugha chiluvae.
12Eno onuye tughashi toi xu nani,
paye kumtsu sasu kidimo nani,
Eno kumtsuno pa sasu kidimo nani.”
Paye asholokumi launo putosu ghi xu nani.
13“Kuchono niye Alhou ithuluvemu ishi xuaghilu nani ke sha?” ipi lino pike. AMPEU no li putsa kehu paje, No Alhou no ijuthulue#El-Roi ipi ku-tsue. 14Ikehu timino azukikhe tipau pesu “Iju thulukemu Xuaghikeu zukikhe”.#El-Shaddai ipi ku-tsue, eno tiye Kadesh ngo Bered kuma dolo anie.
15Hagar no Abram lau anu lakhi punutsue, Abram no ti Hagar no anu punu tsukeu je Ismael ku-tsue. 16Hagar no Ismael punu kelo Abram ye ampe lhotache tsugho shiae.
Jelenleg kiválasztva:
BOTHUBO 16: SUMIBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.