BOTHUBO 21
21
Isak Punu
1AMPEU no puzu-uno pi puakeu toi pano Sara kumghatsue. 2Alhou no Abraham lau kihithatsu keu do lono kitemi shiveke thiumu Sara no mishilu puzu anu lakhi punutsue. 3Sara no anu punu keu je pesu Abraham no Isak kutsue. 4Alhou no ahza tsuke toi kughou Isak no atsala tache shi akeno Abraham no pa phighu yiko ghave tsue. 5Isak punu kelo Abraham punu mpeye 100 shiae. 6Sara no pi, “Alhou no ipelo nu kuzupu shive tsuae eno hi chilukemi kumtsuno igholo nusu niae.” 7Tishino lino pi, “Khuno Abraham vilo Sara ye atianuli akichhi pini nicheniepi piniche kya? Ikeghi pano muchomi shive kethiuno anu lakhi ino punu pe pa tsu anie.”
8Isak no thuwuve eno pa khoke tsalani Abraham no aghulhu kije lakhi shie.
Hagar ngo Ishmael Puwuve
9Ghulo lakhi, Ijipmi Hagar no Abraham lau anu lakhi punu tsukeu Ismael huno Sara nu Isak sasu junu ghi ili ae. 10Sara no ti ithuluve puzu Abraham vilo pi, “Aqeliu hipau ngo panu pama hapheve lo. Aqeliu nu hipau pelo khilemu inu Isak sasu amheghi ighi pemla nani.” 11Ike Abraham zulo tiye ighono amlo kughujupu shive kughengu Ismael ghi panu kehu. 12Ikemu Alhou no Abraham vilo pi, “Anu ngo aqeliu pama ghenguno omlo sakevilo. Sara no kiu ovilo pive akeno li tsa inivelo kughengu Isak vechewono opiti kepi kihi wonie. 13Aqeliu nu ghi ino ashiayeh lakhi shilu pe nani kughengu pa ghi onu ke.”
14Abraham no thoghiu inaqhe itheno ithu puzu asho ngo azu ahughi lakhi ishi pesu Hagar tsue eno pano panu khape li muqalo xapipe puzu li puwuve. Lino chesusu Bersheba lo asutsuni kughutsu kumo qhalo itsuche. 15Kughou ahughilo azu kuhave keno liye asutsuni bo lakhi qholo anu qhive; 16eno li no alu ache lakhi-a kupuju tohilo wupuzu li likhi iqa ae. Lino ishi pi, “Anu kithi ju amlae!” Lino tilau iqa ake lauye, anu no qa ithuve. 17Alhou no anu no qa akeu chiluve eno atsutsu lono Alhou wu kungumi no Hagar ku puzu li vilo pi, “Noye kiu shilusa ani kya? Msa kevilo. Alhou no anu no khileno qa anikeno chiluvae. 18Ithu puzu anu khape lulo eno pa lopiqi tsulo. Ino pa pelo ashiayeh kije shilu penanie.” 19Tileno Alhou no li nhethi xukhotsue eno lino azukikhe lakhi ithulue lino wupuzu ahughilo azu pililuve eno azu anu piyelue. 20Alhou no anu gholo ae, eno paye thuwuve. Paran lo agha itsumokeu qhalo ache, paye asuzu pekeulo shitsa shive. 21Pa zano Ijip yeghi lono anipu lakhi lusaghitsue.
Abraham ngo Abimilek
22Ike tipa ghulokilo Abimilek no pawu ghushimi shou akijeu Phikol sasu ighi eno Abraham vilo pi, “Nono kiu kiu shikeno ti kumtsulo Alhou no osasu chenie. 23Tishi aye noye ni na, inuli na, itikughuko namu pishimo naniepi Alhou zulono tushoqhilo. Ino olau kikimiye kumla mla kehu toi noghi ni eno nono inami shi akeu yeghi shou kimiyekeu mla tsulo.” 24Ike Abraham nopi, “Ino tushoqhi anie.”
25Abraham no Abimilek vilo muchhoe kughengu pa qemiqo no anguka lono akuchhu zukikhe luvetsu ke. 26Abimilek no pi, “Khuno ti shi kela niye mtha na, noghi ivilo mu pimo eno ti khilemu chimla aphie, ishino thono.” 27Tile Abraham no bheri hami eno amshi hami hapesu Abimilek tsue eno pama visho lakhi shie. 28Abraham no patsu-aqu loji lono bheriti tsuni hatha pesu qhie. 29Abimilek no pa iniju, “Noye kushiniye bheriti tsuni kutashi hatha pesu qhi ani kya?” 30Abraham no pi, “Noye bheriti hipano tsuni ilauno lutsumasae tishianguno azukikhe hipauye ino chhu kepi hipaqono ishepe shipenie.” 31Ikehu tipa-a pesu Bersheba ipi kutsue, kughengu tileno pama kinikujo ashoqhi shie.
32Pama no Bersheba lo visho lakhi shive eno Abimilek ngo ghushimi shou akijeu Phikol ngo ishiye Filistiyami yeghilo idewove. 33Abraham no Bersheba lo tamarik subo shosue eno AMPEU, shekhaha Lhou je ku-ghi mllae. 34Abraham ye Filistiayami yeghilo ado kushuwa inami shi ache.
Jelenleg kiválasztva:
BOTHUBO 21: SUMIBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.