Noo Mian 25
25
CAB. XXV.
1Eisht bee reeriaght niau er ny holaghey gys jeih moidynyn, ghow ny lampyn oc, as hie magh quail y dooinney‐poost.
2As va queg jeu creeney as queg ommijagh.
3Hug adsyn va ommijagh lieu ny lampyn oc, agh cha dug ad lieu ooil mâroo.
4Agh hug y vooinjer chreeney lieu ooil ayns ny siyn oc marish nyn lampyn.
5Choud as va’d feeau er y dooinney‐poost, huit ad ooilley er saveenagh as cadley.
6As ec main‐uy va eam er ny choyrt, Cur‐my‐ner ta’n dooinney‐poost cheet, gow‐jee magh ny whail.
7Eisht dirree ooilley ny moidynyn shen, as hooar ad aarloo nyn lampyn.
8As doort y vooinjer ommijagh roosyn va creeney, Cur‐jee dooinyn jeh’n ooil eauish, son ta ny lampyn ain goll ass.
9Agh dreggyr y vooinjer chreeney, gra, Cha jean, er aggle nagh bee dy liooar ain dooin hene as diuish neesht, te ny share diu roie dys y vooinjer ta creck, as kionnaghey er nyn son hene.
10As choud as va’d goll dy chionnaghey, haink y dooinney‐poost, as hie yn vooinjer va aarloo stiagh marish gys y vannish, as va’n dorrys jeiht.
11Ny lurg shen haink ny moidynyn elley, gra, Hiarn, Hiarn, fosle dooin.
12Agh dreggyr eshyn as doort e, Dy firrinagh ta mee gra riu, nagh voddym goall riu.
13Bee‐jee er nyn dwoai er‐y‐fa shen, son cha vel fys eu er y laa ny’n oor nee yn Mac dooinney cheet.
14¶ Son te marragh dooinney va goll er troailt gys cheer foddey, deie er e harvaantyn as livrey daue e chooid:
15As da fer jeu, hug e queg talentyn, da fer elley jees, as da fer elley annane, da dy chooilley ghooinney lurg roshtin e hushtey, as chelleeragh ghow e e yurnah.
16Eishtagh hie yn fer v’er gheddyn ny queg talentyn, as ren e dellal lieu, as chosne e queg talentyn elley.
17As myr shen eshyn v’er gheddyn jees, chosne eshyn myrgeddyn jees elley.
18Agh y fer v’er gheddyn annane, hie e as chley e ayns y talloo, as dollee e argid e hiarn.
19Agh lurg foddey dy earish haink chiarn ny shiarvaantyn shen, as ren e coontey roo.
20As haink eshyn v’er gheddyn ny queg talentyn as hug e lesh queg talentyn elley, gra, Hiarn, livrey uss doos queg talentyn; cur‐my‐ner, ta mee er chosney queg talentyn elley mâroo.
21Doort e Hiarn rish, Smie t’ow er nianoo, harvaant vie as firrinagh, t’ow er ny ve firrinagh ayns y veggan, livreyms moarane gys dty churrym; gow stiagh gys boggey dty hiarn.
22Haink eshyn myrgeddyn v’er gheddyn yn daa halent, as doort e, Hiarn, livrey uss doos daa halent: cur‐my‐ner, ta mee er chosney daa halent elley mâroo.
23Doort e Hiarn rish, Smie t’ow er nianoo, harvaant vie as firrinagh, t’ow er ny ve firrinagh ayns y veggan, livreyms moarane gys dty churrym: gow stiagh gys boggey dty hiarn.
24Agh y fer v’er gheddyn yn yn talent, haink e as doort e, Hiarn, va fys ayms dy nee dooinney creoi oo; buinn raad nagh ren oo cuirr, as chaglym raad nagh ren oo skeylley:
25As ghow mee aggle, as hie mee as dollee mee dty halent ayns y talloo; cur‐my‐ner, shen y raad ta dty chooid.
26Dreggyr e hiarn, as doort e rish, Harvaant vee‐chairagh as niau‐harroogh, va fys ayds, dy row mish buinn raad nagh ren mee cuirr, as chaglym raad nagh ren mee skeylley.
27Lishagh oo er‐y‐fa shen ve’r chur my argid dauesyn ta janoo vondeish liorish argid y yeasaght, as eishtagh ec y cheet aym, oddin ve’r gheddyn my chooid hene lesh bishaghey.
28Gow‐jee er‐y‐fa shen yn talent veih, as cur‐jee eh dasyn ta jeih talentyn echey.
29Son da dy chooilley annane ta echey, vees er ny choyrt; as bee towse smoo echey: agh veihsyn nagh vel echey, vees er ny ghoall ersooyl shen ny ta echey.
30As tilg‐jee yn chiarvaant niau‐harroogh ayns y dorraghys sodjey mooie, ayns shen vees keaney as snaggeraght feeacklyn.
31¶ Tra hig yn Mac dooinney ayns e ghloyr, as ooilley e ainlyn casherick marish, shen y tra hoiys e er stoyl‐reeoil e ghloyr.
32As kiongoyrt rish vees dy chooilley ashoon er nyn jaglym, as scarree e ad veih my chielley, myr ta bochilley cur scarrey eddyr e chirree as ny goair.
33As soiee e ny kirree er e laue yesh, agh ny goair er e laue chiare.
34Eisht jir y Ree roosyn er e laue yesh, Tar‐jee, my chloan bannit jeh my Ayr, gow‐jee myr eiraght yn reeriaght ta kiarit er nyn son eu, er dy hoshiaght y teihll.
35Son va mee accryssagh, as hug shiu beaghey dou: va mee paagh as hug shiu jough dou: Va mee my yoarree, as ghow shiu stiagh mee:
36Rooisht as ren shiu my choamrey: va mee ching, as haink shiu dy my yeaghyn: va mee ayns pryssoon, as haink shiu hym.
37Eishtagh nee yn chloan chairagh e y reggyrt, gra, Hiarn, cooin honnick shin oo accryssagh, as dy dug shinyn beaghey dhyt? ny paagh as dy dug shin jough dhyt?
38Cooin honnick shin oo dty yoarree, as dy ghow shin stiagh oo? ny rooisht, as dy ren shin dty choamrey?
39Ny cooin honnick shin oo ching, ny ayns pryssoon, as dy daink shin dy dty yeaghyn?
40As freggyree yn Ree, as jir e roo, Dy firrinagh ta mee gra riu, ayns wheesh as dy vel shiu er nianoo eh son y fer sloo jeu shoh my vraaraghyn, ta shiu er nianoo eh er my hons.
41Eishtagh jir e roosyn myrgeddyn er y laue chiare, Immee‐jee voym chloan chursit gys yn aile dy bragh farraghtyn, ta kiarit son y drogh spyrryd as e ainlyn.
42Son va mee accryssagh, as cha dug shiu beaghey dou: Va mee paagh, as cha dug shiu jough dou.
43Va mee my yoarree, as cha ghow shiu stiagh mee: rooisht, as cha ren shiu my choamrey: ching as ayns pryssoon, as cha daink shiu dy my yeaghyn.
44Eisht nee adsyn myrgeddyn e y reggyrt, gra, Hiarn, cooin honnick shin oo accryssagh, ny paagh, ny dty yoarree, ny rooisht, ny ching, ny ayns pryssoon, as nagh chooin shin liat?
45Eisht nee e nyn vreggyrt ad, gra, Dy firrinagh ta mee gra riu, ayns wheesh as nagh ren shiu eh son annane jeh’n vooinjer sloo jeu shoh, cha ren shiu eh er my hons.
46As hed ad shoh ersooyl gys y kerraghey dy bragh farraghtyn; agh y chloan chairagh gys y vea veayn.
Jelenleg kiválasztva:
Noo Mian 25: NMian
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
historic text maintained in digital form by the British and Foreign Bible Society (Sheshaght y Vible)