Noo Mian 26
26
CAB. XXVI.
1As haink eh gy kione, tra va Yeesey erreish ooilley ny goan shoh y loart, dy doort e roosyn va sheer geyrt er,
2Ta fys eu lurg daa laa dy vel fealley ny caisht dy ve ayn, as dy vel yn mac dooinney er ny vrah dy ve er ny chrossey.
3Eisht va ny ard‐saggyrtyn as ny scruderyn as shanstyr yn pobble er nyn jaglym cooidjagh gys thie yn ard‐saggyrt va enmyssit Caiaphas,
4As hug ad nyn goyrle dy cheilley, my‐chione Yeesey y ghoall gy follit, as y choyrt e gy baase.
5Agh doort ad, cha nee er laa yn ealley, er aggle dy bee irree magh ayn mastey yn pobble.
6¶ Nish tra va Yeesey ayns Bethany ayns thie Simon yn lourane,
7Haink huggey ben as box alabaster dy ooill feer deyr eck, as gheyrt ee eh er y chione echey, myr ve ny hoie ec bee.
8Agh tra honnick y vooinjer va sheer geyrt er shoh, va’d jymmoosagh, gra, cre’n fa va yn jummal shoh jeant?
9Son oddagh yn ooill shoh ve’r ny ve creckit son moarane, as er ny choyrt da ny boughtyn.
10Tra hoig Yeesey shoh, doort e roo, Kys dy vel shiu boirey yn ven? son tiee er nobbragh obber vie orryms.
11Son ta ny boughtyn eu kinjagh meriu, agh mish cha vel eu kinjagh.
12Son liorish dy vel ee er gheartey yn ooill shoh er my chorp, tiee er nianoo eh gouyr my oanluckey.
13Dy firrinagh ta mee gra riu, raad erbee dy bee yn sushtal shoh er ny phreacheil ayns ooilley’n teihll, bee shoh myrgeddyn ta’n ven shoh er ny yianoo, er ny insh; son cooinaghtyn jee.
14¶ Eishtagh hie fer jeh’n daa ostyl yeig, va enmyssit Yuase Iscariot, gys ny ard-saggyrtyn.
15As doort e roo, Cre ver shiu doos, as livreym e hiu? As ren ad coonaant rish son jeih peeshyn as feed dy argid.
16As veih’n tra shen ve shirrey caa dy vrah eh.
17¶ Nish er y chied laa jeh fealley yn arran millish, haink y vooinjer va sheer geyrt er Yeesey huggey, as doort ad rish, Cre’n raad sailt shin dy yanoo aarloo er dty hon dy ee yn Eayn caisht?
18As doort e, Gow‐jee gys yn ard‐valley gys leid y dooinney shen, as abbyr‐jee rish, Ta’n maishter gra, Ta my earishys ec laue; freillym y chaisht ec dty hie’s marish y vooinjer ta sheer geyrt orrym.
19As ren adsyn myr va Yeesey er noardaghey daue, as daarlee ad yn Eayn caisht.
20Nish tra va’n fastyr er jeet, hoie e sheese marish yn daa ostyl yeig.
21As myr va’d gee, doort e, Dy firrinagh ta mee gra riu, dy jean annane eauish mish y vrah.
22As va’d feer trimshagh, as ren ad toshiaght dy chooilley annane oc dy ghra rish, Hiarn, nee orryms t’ow cheet?
23As dansoor eshyn, gra, Eshyn ta thummey e laue mârym ayns y chlaare, e shen nee mee y vrah.
24Ta’n mac dooinney goll, myr te scruit jeh: agh smerrick da’n dooinney shen liorish vees yn mac dooinney er ny vrah: veagh eh er ny ve mie son y dooinney shen, mannagh beagh e er jeet er y teihll.
25Eisht dansoor Yuase ren y vrah e, as doort e, Vaishter, nee mish e? Doort eshyn rish, T’ow er ghra eh.
26¶ As myr va’d gee, ghow Yeesey arran, as vannee e as vrish e eh, as hug e eh da ny hostyllyn, gra, Gow‐jee, ee‐jee, shoh my chorps.
27As ghow e yn cappan, as hug e booise, as hug e eh daue, gra, Iv‐jee ooilley jeh shoh.
28Son shoh my uill’s jeh’n chymney noa, t’er ny gheartey son ymmodee son leih peccaghyn.
29Agh ta mee gra riu, nagh niv‐ym maghey shoh jeh mess y villey‐feeney, derrey’n laa ivym eh ass yn noa mêriu ayns reeriaght my Ayrey.
30As tra va’d er ghoall arrane spyrrydoil, hie ad magh gys cronck ny Olivyn.
31Eishtagh doort Yeesey roo, Failee yn credjue eauish ooilley noght kyndagh rhyms: son te scruit, Bwoaillym’s yn bochilley, as bee kirree yn chioltane er nyn skeylley.
32Agh erreish dou ve’r nirree reesht, hem reue gys Galilee.
33Dansoor Peddyr as doort e rish, Ga dy vail credjue dy chooilley ghooinney kyndagh rhyts, cha vail my chredjue’s dy bragh.
34Doort Yeesey rish, Dy firrinagh ta mee gra rhyt, yn uy noght, roish my ger yn keillagh, dy nob uss mish three keartyn.
35Doort Peddyr rish, Dy beïn dy gholl gy baase mârt, cha nobbin oo. As er yn aght keddyn loar ooilley ny ostyllyn.
36¶ Eishtagh haink Yeesey mâroo gys ynnyd va enmyssit Gethsemane, as doort e rish ny ostyllyn, Soie‐jee shiuish ayns shoh, choud as hems gys padjer ayns shid.
37As ghow e marish Peddyr as daa vac Zebedee, as ren e toshiaght dy ve trimshagh as trome‐chreeagh.
38Eisht doort e roo, Ta my annym feer trimshagh, dy jarroo gys y baase; fuirree‐jee ayns shoh as jean‐jee watchal mârym.
39As hie e red beg sodjey, as huit e sheese er e eddin, as ghow e padjer, as doort e, O my Ayr, my te possible, lig da’n cappan shoh goll shaghym: ny yei cha nee m’aigneys, agh dt’aigneys dy row jeant.
40As haink e gys ny ostyllyn, as hooar e ad nyn gadley, as doort e rish Peddyr, Kys ta shoh, nagh row shiu able watchal mârym yn oor?
41Bee‐jee er nyn dwoai as guee‐jee, nagh duit shiu ayns miolaghey: Ta’n spyrryd eu dy jarroo arryltagh, agh ta’n eihl annoon.
42Hie e roish reesht yn nah cheart, as ghow e padjer, gra, O my Ayr, mannagh vod y cappan shoh goll shaghym, fegooish mee dy iv eh, dt’aigneys dy row jeant.
43As haink e as hooar e ad nyn gadley reesht, son va ny sooyllyn oc trome.
44As daag e ad, as hie e roish reesht, as ghow e padjer yn tress cheart, gra ny goan keddyn.
45Eishtagh haink e gys e ostyllyn, as doort e roo, Caidle‐jee nish as gow‐jee nyn vea; cur‐my‐ner ta’n oor tayrn er‐gerrey, as ta’n Mac dooinney er ny vrah gys lauyn peccee.
46Irree‐jee, lig dooin goll: cur‐my‐ner, te eshyn er‐gerrey dooin ta dy my vrah.
47¶ As choud as ve foast loart, cur‐my‐ner, haink Yuase, fer jeh’n daa ostyl yeig, as va sheshaght woar marish lesh cliwnyn as luirg, veih ny ard‐saggyrtyn as shanstyr yn pobble.
48Nish hug eshyn v’er vrah e cowrey daue, gra, Quoi‐erbee verryms paag da, shen e, cum‐jee e dy shicker.
49As chelleeragh haink e gys Yeesey, as doort e, Dy vannee dhyt, Vainshter, as phaag e e.
50As doort Yeesey rish, Charrey, cre’n fa t’ow er jeet? Eishtagh haink ad as hug ad nyn lauyn er Yeesey, as ghow ad e.
51As cur‐my‐ner heen fer jeusyn va marish Yeesey magh e laue, as hayrn e e chliwe, as woail e fer‐mooinjerey yn ard‐saggyrt, as yiare e yn chleash jeh.
52Eishtagh doort Yeesey rish, Cur seose dty chliwe reesht ayns e ynnyd; son nee adsyn ooilley ta goall e chliwe, cherraghtyn liorish y chliwe.
53Vel uss goall ass laue, nagh voddyms nish guee gys my Ayr, as yinnagh e chelleeragh hym er‐skyn daa legion jeig dy ainlyn?
54Agh kys eisht vees ny scripturyn er nyn gooilleeney, dy nee shoh myr te dy ve?
55Ayns yn oor keddyn doort Yeesey rish y pobble, Vel shiu er jeet magh myr noi maarlagh, lesh cliwnyn as luirg dy my ghoal? Hoie mee meriu gagh laa gynsaghey ayns y chiamble, as cha ren shiu my ghoall.
56Agh va ooilley shoh jeant, dy voddagh scripturyn ny phaderyn ve cooilleenit. Eishtagh ren ooilley ny ostyllyn e y hreggeil as cosney rowe.
57¶ As leeid y vooinjer v’er ghoall Yeesey e ersooyl gys Caiaphas yn ard‐saggyrt, raad va ny scruderyn as y chanstyr er nyn jaglym cooidjagh.
58Agh deiyr Peddyr er foddey ny yei, gys thie yn ard‐saggyrt, as hie e stiagh, as hoie e marish ny shiarvaantyn dy yeaghyn cre veagh y jerrey.
59Nish va ny ard-saggyrtyn as y chanstyr as ooilley’n choonceil shirrey fenish foalsey noi Yeesey dy choyrt e gy baase.
60Agh cha dooar ad veg: ga dy daink ymmodee fenishyn foalsey, foast cha dooar ad veg. Ec y jerrey haink daa enish foalsey,
61As doort ad, Te shoh er ghra, Ta mish able chiamble Yee y lieggal, as y hroggal eh reesht ayns three laa.
62As dirree yn ard‐saggyrt seose, as doort e rish, Nagh vel oo cur ansoor? Cre ta’d shoh dy hoilshaghey dt’oi?
63Agh chum Yeesey e hengey. As dreggyr yn ard‐saggyrt as doort e rish, Ta mee cur currym ort liorish yn Jee bio, oo dy insh dooin, nee oo yn Creest Mac Yee.
64Doort Yeesey rish, T’ow uss er ghra eh: ny yei ta mish gra riu, Ny lurg shoh hee shiu yn Mac dooinney ny hoie er laue yesh yn phooar, as cheet ayns bodjallyn yn aer.
65Eishtagh raip yn ard‐saggyrt e eaddagh, gra, Te er loart goan mollaghtagh, cre’n feme sodjey t’ain er fenishyn? cur‐my‐ner nish ta shiu er chlashtyn e ghoan mollaghtagh.
66Cre ta shiu dy smooinaghtyn? Dansoor ad as doort ad, Te toilchin dy ve er ny choyrt gy baase.
67Eisht chew ad shellaghyn ayns e eddin, as woail ad e, as woail feallagh elley e lesh bassyn nyn lauyn.
68Gra, Jean phaderys dooin, uss y Chreest, quoi e ta dy dty woalley?
69¶ Nish va Peddyr ny hoie cheu‐mooie jeh’n cheshaght ayns y hall; as haink ben‐aeg huggey, gra, V’ow uss myrgeddyn marish Yeesey dy Ghalilee.
70Agh dob e kiongoyrt roo ooilley, gra, Cha s’aym cre t’ow dy ghra.
71As tra ve er gholl magh ayns y phorch, honnick ben‐aeg elley e, as doort ee roosyn v’ayns shen, Ve shoh myrgeddyn marish Yeesey dy Nazareth.
72As reeshtagh dob e lesh loo, Cha nione dou yn dooinney.
73As tammylt ny lurg shen haink huggey yn vooinjer va nyn shassoo liorish, as doort ad rish Peddyr, Shicker, she fer jeu oo, son ta dty ghlare dy dty vrah.
74Eisht ren e toshiaght dy ghweeaghyn as dy loo, gra, Cha nione dou yn dooinney. As chelleeragh gher yn keillagh.
75As chooinee Peddyr er ny goan va Yeesey er ghra rish, Roish my ger y keillagh, obbee uss mish three cheartyn. As hie e magh as cheayn e dy sharroo.
Jelenleg kiválasztva:
Noo Mian 26: NMian
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
historic text maintained in digital form by the British and Foreign Bible Society (Sheshaght y Vible)