Noo Mian 27
27
CAB. XXVII.
1Tra va’n moghrey er jeet, hug ooilley ny ard-saggyrtyn as shanstyr yn pobble nyn goyrle dy cheilley, dy choyrt e gy baase.
2As erreish daue ve’r chiangley e, leeid ad e ersooyl, as livrey ad e gys Pontius Pilate yn kianoort.
3¶ Tra honnick eisht Yuase ren y vrah e, dy row e er ny gheyrey, ghow e arrys, as hug e lesh reesht ny jeih peeshyn as feed dy argid gys ny ard-saggyrtyn as y chanstyr,
4Gra, Ta mee er nianoo peccah, ayns dy vel mee er vrah yn uill niau‐chyndagh. As doort adsyn, Cre ta shen dooinyn? jeagh uss da shen.
5As hilg e sheese ny peeshyn argid ayns y chiamble, as jimmee e roish, as hie e, as ren e e hene y chroghey.
6As ghow ny ard-saggyrtyn ny peeshyn argid as doort ad, Cha vel [eh] lowal dy choyrt ad mastey tashtaghyn y chiamble, er‐yn‐oyr dy nee leagh folley eh.
7As ghow ad coyrle, as chionnee ad lieu magher fer ny craie, dy oanluckey joarreeyn ayn.
8Shen‐y‐fa va’n magher shen enmyssit [yn] magher folley gys y laa t’ayn jiu.
9(Shen y tra va cooilleenit ny va loarit liorish Jeremy yn phadeyr, gra, As ghow ad ny jeih peeshyn as feed dy argid, yn phrice echyssyn v’er ny phriceil, e ren adsyn jeh cloan Israel y phriceil.
10As hug ad ad son magher fer ny craie, myr va’n Chiarn er noardaghey doos.)
11As hass Yeesey kiongoyrt rish y kianoort, as denee yn kianoort jeh, gra, Nee uss ree ny Hewnyn? As doort Yeesey rish, T’ow uss dy ghra eh.
12As tra ve er ny chassid liorish ny ard-saggyrtyn as y chanstyr, cha dug e ansoor erbee daue.
13Eishtagh doort Pilate rish, Nagh vel oo clashtyn, cre wheelleen red ta’d shoh dy hoilshaghey dt’oi?
14As cha dug e yn ockle dy ansoor da, ayns wheesh as dy ghow yn kiannoort yyndyss moar.
15Nish ec yn ealley shen va’n kiannoort cliaghtey feysley daue pryssoonagh erbee dy bailloo.
16As va oc ec y tra shen ard phryssoonagh va enmyssit Barabbas.
17Shen‐y‐fa tra va’d er nyn jaglym cooidjagh, doort Pilate roo, Quoi sailliu mee dy eysley diu? Barabbas, ny Yeesey ta enmyssit Creest?
18Son va fys echey dy nee ayns goanlys va’d er ny livrey seose e.
19Tra ve erreish soie sheese er stoyl y vriwnys, hug e ven fys huggey, gra, Ny bee veg ayds dy yanoo rish y dooinney cairagh shen: son ta mish er hurranse ymmodee dy reddyn jiu ayns my chadley kyndagh rish.
20Agh choyrlee ny ard-saggyrtyn as y chanstyr yn pobble ad dy yanoo aghin son Barabbas, as Yeesey y choyrt gy baase.
21Dansoor y kiannoort as doort e roo, Quoi jeh’n jees sailliu mee dy eysley diu? Doort adsyn, Barabbas.
22Doort Pilate roo, Cre neem eishtagh rish Yeesey ta enmyssit Creest? Doort ad ooilley rish, Lig da ve’r ny chrossey.
23As doort y kiannoort, Cre’n oyr, cre te er nianoo dy holk? Agh deie adsyn ny smoo, gra, Lig da ve’r ny chrossey.
24¶ Tra honnick Pilate nagh row geill er ny chur da, agh dy row ad aarloo dy irree magh, ghow e ushtey, as niee e e lauyn kiongoyrt rish y pobble, gra, Ta mish niau‐chyndagh jeh fuill yn persoon cairagh shen, jeagh‐jee shiuish da.
25Eishtagh dansoor ooilley’n pobble, gra, Yn uill echey dy row orrinyn, as er nyn gloan.
26¶ Eisht deysle e Barabbas daue; as tra ve er chustey Yeesey, livrey e e dy ve er ny chrossey.
27Eisht hug sidooryn y chiannoort lieu Yeesey gys hall y vriwnys, as deie ad er y slane sheshaght jeh ny sidooryn.
28As rooisht ad e as hug ad er coamrey dy ghorrym‐jiarg.
29¶ As tra va’d er fee crown dy ghrinyn, hug ad eh er y chione echey, as cuirtlagh ayns y laue yesh echey: as chroym ad nyn ghlioonyn kiongoyrt rish, as chraid ad mish, gra, Dy vannee [dhyt,] Ree ny Hewnyn.
30As chew ad shellaghyn er, as ghow ad y chuirtlagh, as woail ad e er y chione.
31As erreish daue ve’r chraidey mish, ghow ad yn coamrey reeoil jeh, as hug ad e gharmad hene er, as leeid ad e ersooyl dy chrossey e.
32As myr haink ad magh, hooar ad dooinney jeh Cyrene, va enmyssit Simon; eshyn ren ad y eaginaghey dy ymmyrkey e chrosh.
33As tra va’d er jeet gys ynnyd ta enmyssit Golgotha, ta shen dy ghra, ynnyd bollag,
34¶ Hug ad da vinegar dy iv, as gall ny‐chione; as tra ve er vlashtyn eh, cha ballish giv.
35As ren ad e y chrossey, as reyn ad e gharmadyn, tilgey lottyn; dy voddagh shen ve cooilleenit va loarit liorish y phadeyr, Reyn ad my gharmadyn nyn mast oc, as er my chooat ren ad lottyn y hilgey.
36As hoie ad sheese as watch ad e ayns shen.
37As hoie ad harrish e chione yn vriwnys echey scruit, SHOH YEESEY REE NY HEWNYN.
38Eisht va daa vaarlagh er ny chrossey marish; yn derrey yeh er y laue yesh, as y jeh elley er y laue chiare.
39¶ As chraid y vooinjer va goll shiaghey mish, cra nyn ging,
40As gra, Uss ta lieggal y chiamble, as dy hroggal eh reesht ayns tree laa, saue oo hene; my she Mac Yee oo, tar neose jeh’n chrosh.
41Myr shen myrgeddyn ren ny ard-saggyrtyn craidey mish, marish ny scruderyn as y chanstyr, as doort ad,
42Haue e feallagh elley, e hene cha vod e hauail: my she ree Israel e; lig da cheet neose jeh’n chrosh, as nee mad credjal ayn.
43Hreisht e ayns Jee; lig da e y livrey nish my sallish e: son doort e, She Mac Yee mee.
44Hilg ny maarlee myrgeddyn v’er nyn grossey marish yn leid keddyn er.
45Nish veih yn cheyoo oor, va dorraghys harrish ooilley’n cheer, gys yn nuyoo oor.
46As my‐geart yn nuyoo oor, deie Yeesey lesh ard choraa, gra, Eli, Eli, lama sabacthani? ta shen dy ghra, My Yee, My Yee, cre’n fa t’ow er my hreggeil?
47Doort part jeusyn va nyn shassoo ayns shen, tra cheayl ad shen, Ta’n dooinney shoh gemagh er Elias.
48As chelleeragh roie fer jeu as ghow e spunge, as lieen e eh lesh vinegar, as hug e eh er cuirtlagh, as heen e eh huggey dy iv.
49Doort y vooinjer elley, Faag‐jee eh, hee mad jig Elias dy hauail e.
50¶ Tra va Yeesey er nemagh reesht lesh ard choraa, phaart e.
51As cur‐my‐ner, va’n coodaghey va eddyr y chiamble as yn ynnyd casherick rapit veih my chielley, veih’n vullagh gys y laare, as ren y talloo cra, as ny creggyn scoltey.
52As va ny oaiaghyn er nyn vosley, as ren ymmodee jeh kirp ny nooghyn va nyn gadley, girree seose,
53As cheet ass ny hoaiaghyn oc, lurg yn irree-seose-reesht echey, as goll stiagh ayns yn ard‐valley casherick, as ad hene y hoilshaghey da ymmodee.
54Nish tra honnick yn captan‐keead as adsyn va marish watchal Yeesey, yn cra-tallooin as ny reddyn v’er jeet gy kione, ghow ad aggle moar, gra, Dy firrinagh shoh va Mac Yee.
55As va ymmodee mraane ayns shen va dy akin e foddey vow, va er neiyrt er Yeesey veih Galilee as er hirveish er.
56Nyn mast oc va Moirrey Malaine, as Moirrey moir Jamys as Joses, as moir cloan Zebedee.
57Tra va’n fastyr er jeet, haink dooinney berchiagh jeh Arimathea va enmyssit Joseph, va myrgeddyn e hene er chredjal ayns Yeesey.
58Hie e shoh gys Pilate, as ren e aghin son corp Yeesey; eishtagh hug Pilate sarey yn corp dy ve er ny livrey.
59As tra va Joseph er ghoall yn corp, hoill e eh ayns aanrit glen,
60As doanluck e eh ayns yn oaie noa echey hene, v’er ny chley ayns creg, as roull e clogh woar er beeal yn oaie, as jimmee e roish.
61As va Moirrey Malaine as Moirrey elley nyn soie jeeragh er yn oaie.
62¶ Nish yn nah laa lurg laa yn aarlaghey, haink ny ard-saggyrtyn as ny Phariseyn cooidjagh gys Pilate,
63Gra, Vainshter, ta cooinaghtyn ain dy doort yn moaltere shen, choud as ve foast bio, Lurg three laa neems girree reesht.
64Cur sarey, er‐y‐fa shen, yn oaie dy ve jeant shicker, derrey yn tress laa, er aggle dy jig yn vooinjer t’er ve sheer geiyrt er, ayns yn uy, as dy geid ad e ersooyl, as dy jir ad rish yn pobble, Te er nirree veih ny merriu; myr shen bee yn oill stierree ny smessey ny’n chied oill.
65Doort Pilate roo, Ta watch eu, immee‐jee reue, jean‐jee cha shicker jeh as oddys shiu.
66Myr shen hie ad as ren ad yn oaie shicker, sealal y chlogh as soiaghey watch.
Jelenleg kiválasztva:
Noo Mian 27: NMian
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
historic text maintained in digital form by the British and Foreign Bible Society (Sheshaght y Vible)