Noo Mian 28
28
CAB. XXVIII.
1Tra va’n doonaght ec kione, as y laa toshiaght soilshaghey er y chied laa jeh’n chiaghtin, haink Moirrey Malaine, as Moirrey elley, dy voddagh ad yn oaie y akin.
2As cur‐my‐ner, va cra‐tallooin moar ayn; son va ainle y Chiarn er jeet neose veih niau, as er jeet as er rowlal back y chlagh jeh beeal yn oaie, as er hoie er.
3Va’n eddin echey goll rish y tendeil as e choamrey giall myr y sniaghtey.
4As ayns aggle roish, ren y vooinjer va watchal cra, as haink ad dy ve myr deney marroo.
5As dreggyr yn ainle, as doort e rish ny mraane; Ny gow‐jee aggle; son ta fys aym dy vel shiu shirrey Yeesey v’er ny chrossey.
6Cha vel e ayns shoh; son te er nirree, myr doort e hene; tar‐jee, jeagh‐jee er yn ynnyd raad va’n Chiarn oanluckit.
7As immee‐jee dy tappee, as insh‐jee dauesyn va sheer geyrt er, dy vel e er nirree veih ny merriu; as cur‐my‐ner, te goll reue gys Galilee, ayns shen hee shiu e; cur‐my‐ner, ta mish er ninsh diu.
8As jimmee ad dy tappee veih’n oaie lesh aggle as boggey moar, as roie ad dy chur lieu yn naight gys e ostyllyn.
9¶ As myr va’d goll dy insh eh da e ostyllyn, cur‐my‐ner, haink Yeesey nyn guail, gra, Dy vannee diu, as haink ad, as chum ad e er e chassyn as hug ad ooashley da.
10Eishtagh doort Yeesey roo, Ny gow-jee aggle, immee‐jee as abbyr‐jee rish my vraaraghyn ad dy gholl gys Galilee, as ayns shen hee ad mee.
11¶ Nish tra va’d goll, cur‐my‐ner, haink part jeh’n watch gys yn ard‐valley, as hoilshee ad da ny ard-saggyrtyn ooilley ny reddyn v’er jeet gy kione.
12As tra var adsyn as y chanstyr er nyn jaglym cooidjagh, as er chur nyn goyrle dy cheilley, hug ad sim moar dy argid da ny sidooryn,
13Gra, abbyr‐jee shiuish, Haink e ostyllyn ayns yn uy, as gheid ad e ersooyl choud as va shin nyn gadley.
14As my chlinnys y kiannoort jeh, ver mainyn er credjal dy vel eh firrinagh as freillee mad shiuish sauchey.
15Myr shen ghow ad yn argid, as ren ad myr v’er ny chur rowe, as ta’n raa shoh dy cadjin er ny insh magh mastey ny Hewnyn gys y laa t’ayn jiu.
16Eisht hie yn yn ostyl yeig rowe gys Galilee, gys slieau raad va Yeesey er noardaghey daue.
17As tra honnick ad e, hug ad ooashley da; agh va part imneagh ayns nyn gredjue.
18As haink Yeesey, as loar e roo, gra, Ta dy chooilley phooar er ny chur dou ayns niau as er y talloo.
19¶ Immee‐jee er‐y‐fa [shen] as ynsee‐jee dy chooilley ashoon, as bashtee‐jee ad ayns ennym yn Ayr, as y Vac, as y spyrryd Noo:
20Gynsaghey daue dy realley dy chooilley nee cre‐erbee ta mish er chur ayns sarey diu; as cur‐my‐ner, ta mish meriu kinjagh gys eer jerrey’n teihll. Amen.
Jerrey yn Sushtal scruit liorish yn NOO MIAN.
Jelenleg kiválasztva:
Noo Mian 28: NMian
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
historic text maintained in digital form by the British and Foreign Bible Society (Sheshaght y Vible)