Эклц 26
26
Ицхак болн Авимелех
1Һазр деер харһнлһн болв. Абрахамин цагт болсн урдк харһнлһнас бас нег харһнлһн болв. Герарт бәәсн пилистмүдин хан Авимелех тал Ицхак одна. 2Деед Эзн Ицхакд үзгдәд иигҗ келнә:
– Египет бичә ор. Мини келсн һазрт чи бә. 3Эн һазрт бүүрләд бә, Би чамта бәәхүв, чамд әдс өгнәв. Яһад гихлә чини эцк Абрахамд өгсн Эврәннь андһаран күцәхәр чамд, чини хөөт үйнрт Би цуг эн һазриг өгнәв. 4Чини хөөт үйнриг теңгртк одд мет тооһарн олн болдгар Би кенәв. Теднд цуг эн һазрмудыг өгнәв. Чини хөөт үйнрәр дамҗад һазр деерк цуг улс әдс авцхах. 5Юңгад гихлә Абрахам Намаг соңсдг билә, Мини некврәр, зааврар, зокалмудар болн закаһар бәәдг билә.
6Тегәд Ицхак Герарт бәәрлнә. 7Тер һазра залус гергнәннь тускар сурхла, «Энтн мини дү күүкн», – гиҗ Ицхак келдг бәәҗ. Яһад гихлә «мини гергн», – гиҗ келхәсн Ицхак әәҗәв. «Эн һазра залус намаг Ребекаһас көлтә алчкх, яһад гихлә тер сәәхн», – гиҗ Ицхак ухалҗав. 8Нег дәкҗ Ицхакиг удандан тенд бәәснә хөөн, пилистмүдин хан Авимелех терзәрн хәләхләрн, Ицхак эврәннь Ребека гергән таалҗасиг үзнә. 9Авимелех Ицхакиг дуудад иигҗ келнә:
– Терчнь чини гергн болҗана! «Мини дү күүкн энтн», – гиҗ чи яһад келләч?
– Терүнәс көлтә би үкҗ одхув гиҗ санҗалав, – гиҗ Ицхак терүнд хәрү өгнә.
10– Чи мадниг яһвчи? Залусин негнь чини гергнлә кевтх билә, тегәд чи мадниг килнцд орулх биләч, – гиҗ Авимелех келнә.
11– Эн күүг эс гихлә энүнә гергиг көндәсн кен чигн күн алгдх, – гиҗ Авимелех цуг әмтнд закна.
12Ицхак тер һазрт тәрә тәрнә. Тегәд Деед Эзн терүнд әдсән өгсәр, тер җилд Ицхак 100 холван икәр тәрә хураҗ авна. 13Ицхак байҗна, терүнә бәәдл байҗх дутман улм ясрад йовв. 14Терүнд пилистмүд үлү үзҗәв, тедү дүңгә терүнә бод малын сүргүд, хөөдин сүргүд, зарцнр йир олн билә. 15Терүнә эцк Абрахамин цагт эцкиннь зарцнр малтсн цуг худгудыг тедн шаврар булв.
16– Маднас салад, һарад йов. Чи мадн дунд дегд күчтә болҗанач, – гиҗ Авимелех Ицхакд келнә.
17Ицхак тендәс һарна, Герарин тегш һазрт хошарн зогсад, тенд бәәрлнә. 18Абрахамин цагт малтгдсн, терүг өңгрснә хөөн пилистмүдин булсн худгудыг Ицхак шинәс малтад, урднь эцкиннь өгсн нерд босхна. 19Ицхакин зарцнр тегш һазрт малтҗаһад, тенд булгин уста худг олҗ авна. 20Болв Герарин малчнр Ицхакин малчнрла «энтн мана усн» гиһәд цүүглднә. Тер худгт Эсек#26:20 Эсек – эн нерн «меткән» гидг еврей келнә үгин чинртә. гидг нер Ицхак өгнә, яһад гихлә тедн терүнәс көлтә зүтклдлә. 21Дәкәд тедн талдан худг малтна, болв терүнәс көлтә бас цүүглднә. Тегәд терүнд Ситна#26:21 Ситна – эн нерн «өшәрклһн» гидг еврей келнә үгин чинртә. гидг нер өгнә. 22Ицхак тендәс йовад, бас нег худг малтна. Энүнәс көлтә цүүгән болсн уга. «Ода Деед Эзн маднд орм өгв, бидн эн һазрт өсхвидн», – гиҗ келәд Ицхак терүнд Реховот#26:22 Реховот – эн нерн «сарул һазр» гидг еврей келнә үгин чинртә. гидг нер өгнә.
23Тендәс Ицхак Беэр-Шева орна. 24Тер сө Деед Эзн терүнд үзгдәд иигҗ келнә:
– Би чини эцк Абрахамин Бурхнв. Бичә ә, Би чамла бәәнәв. Би эврәннь зарц Абрахамин төлә чамд әдс өгнәв, чини хөөт үйнрин тоог икдүлнәв.
25Тенд Ицхак тәкл тәкдг бәәр кенә, Деед Эзнә нер дуудна, тенд шатр бәрнә, зарцнрнь болхла худг малтна.
26Авимелех эврәннь Ахузат гидг шишлң селвгчтәһән болн цергин һардач Пихолла хамдан Герарас терүн тал ирнә. 27Ицхак теднәс сурна:
– Тадн ю хәәҗ ирвт? Нанд дурго болҗалат, тадн намаг бийәсн көөлүст.
28– Танла Деед Эзн бәәхнь маднд иләр медгдҗәнә. Тана болн мадн хоорнд андһарта бооцан бәәх йоста гиҗ бидн шиидвидн. 29Бидн таниг эс көндәснлә әдл, та маднд му юм үзүлшгот гисн бооца кей. Болв бидн танла сәәнәр бәәләвидн, таниг тегәд эвәр сул тәвләвидн. Ода таниг Деед Эзн әдслв, – гиҗ тедн хәрү өгнә.
30Теднә төлә Ицхак нәр кенә, нәәрт тедн хот иднә, ууна. 31Маңһдуртнь өрүн өрлә тедн нег-негндән андһар өгнә. Ицхак тедниг хаалһднь йовулна, ирсн улс ээлтә кевәр һарна.
32Тер өдр зарцнр ирәд, Ицхакд малтсн худгиннь тускар келҗ өгнә.
– Бидн ус олҗ аввидн! – гиҗ тедн келнә. 33Терүнд Ицхак «Шива»#26:33 Шива – эн үг әәһәрн «андһар» гидг үгин бәәдлтә. гидг нер өгнә. Тегәд ода күртл тер балһсна нерн – Беэр-Шева.
Эсавин талдан отга гергчүд
34Эсав дөчтәдән Беэри гидг хетин Йудит гидг күүк болн Элона гидг хетин Басемат гидг күүк буулһҗ авна. 35Ицхак Ребека хойрт теднлә бәәхд кецү болад бәәв.
Jelenleg kiválasztva:
Эклц 26: ХКО_ӘБ
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Институт перевода Библии, 2002-2023