Эклц 27
27
Ицхак Яковд әдс өгнә
1Ицхак көгшрәд, нүднә харань муурад, юм үздгән уурад ирхләрн, эврәннь ик көвүн Эсавиг дуудад иигҗ келнә:
– Көвүн минь.
– Би эн бәәнәв, – гиҗ Эсав хәрү өгнә.
2– Би ода көгшмб, эврәннь үкх өдрән медҗәхшв. 3Чи эврәннь зер-зев, саадгин сум болн саадг авад, кеерәгшән һарч нанд аң хә. 4Мини дурта шимтә хот кеһәд нанд авч ирәд идүл, би үкхәсн өмн чамд әдс өгнәв, – гиҗ Ицхак келнә.
5Ицхак эврәннь Эсав көвүндән иигҗ келҗәсиг Ребека соңсч. Эсавиг кеер аң хаһад авч ирхәр һархла, 6Ребека Яков көвүндән иигҗ келнә:
– Эцкчнь чини Эсав ахд иигҗ келсиг би соңсув: 7«Аң авч ирәд, нанд шимтә хот кеһәд идүл, тегәд би чамд үкхәсн урд Деед Эзнә өмн әдс өгнәв». 8Көвүн минь, оньган өгәд намаг соңс, мини келсәр күцә. 9Малын сүрг тал одад, нанд чинәтә ямана хойр ишк авад ир. Би чини эцкд дурта хотынь шимтәһәр болһад өгсүв. 10Дәкәд тер хотыг эцкдән чи авч од, тер идәд, үкхиннь өмн чамд әдс өгх.
11– Мини ах Эсавин цогц-махмуднь ноосар бүркәтәлм, мини махмуд болхла ноосн уга гилгрлм. 12Кемр эцкм намаг һарарн бәрәд хәләхлә яахмб? Би тегәд мекч болҗ һархв. Әдс авхин ормд, би терүнә харалла харһсав, – гиҗ Яков эврәннь экдән келнә.
13– Харал нанд күрттхә, көвүн минь. Чи мини келсәр ке: одад тедниг нанд авад ир, – гиҗ экнь Яковд келнә.
14Яков йовад, ямана ишксиг авч ирәд, экдән өгнә. Ребека залуһиннь дурта хотынь шимтәһәр болһна. 15Тегәд Ребека герт бәәсн ик көвүн Эсавин хамгин сән хувцинь авад, Яковд өмскнә. 16Терүнә һаринь, күзүнә гилгр махмудынь ишкин арсар экнь бүркнә. 17Белдсн шимтә хот болн өдмг Яковд экнь бәрүлнә.
18Тернь эцк талан ирәд келнә:
– Эцк минь.
– Би эн бәәнәв. Чи мини альк көвүмбч? – гиҗ Ицхак келнә.
19– Би Эсав, тана ууһн көвүмб. Би тана келсәр кевүв. Эрҗәнәв, өндәһәд суутн, мини хот зооглад, нанд әдсән өгтн, – гиҗ Яков эцкдән келнә.
20– Яһҗ тиим шулуһар олвч терүг, көвүн минь? – гиҗ Ицхак көвүнәсн сурна.
– Деед Эзн, тана Бурхн, нанд күцәмҗ белглв, – гиҗ тер хәрү өгнә.
21– Көвүн минь, нааран өөрд. Йосндан мини көвүн Эсав мөн, бишинь медхәр, би чамаг бәрәд хәләнәв, – гиҗ Ицхак Яковд келнә. 22Яков эцк талан өөрдәд зогсна, тернь көвүһән бәрҗ хәләчкәд иигҗ келнә:
– Дунь болхла, Яковин дуута, болв һарнь – Эсавин һарин бәәдлтә.
23Ицхак терүг таньсн уга. Яһад гихлә терүнә һарнь Эсавин һарла әдл нооста. Тегәд эцкнь Яковд әдс өгнә.
24– Чи, үнндән мини Эсав көвүмбч? – гиҗ Ицхак сурна.
– Э, энтн бив, – гиҗ тернь хәрү өгнә.
25– Көвүн минь, авч ирсн хотан нанд идүл, би чамаг әдслнәв, – гиҗ Ицхак келнә.
Яков хотыг өөрдүләд эцкдән өгнә, тернь иднә; чаһр авч ирнә, тернь ууна. 26Дәкәд эцкнь иигҗ келнә:
– Көвүм минь, наар, намаг үмс.
27Көвүн өөрдәд үмснә. Ицхак көвүнәннь хувцна үнр авад, терүг әдсләд келнә:
– О-о, мини көвүнә үнр
Деед Эзнә әдслсн теегин үнр мет.
28Бурхн чамд теңгрин чиг,
һазра урһц, аһу ик буудя болн шин чаһр өгтхә.
29Отгарн чамд заргдтха,
Өмнчнь улс сөгдтхә.
Төрл-саднаннь нойн бол,
Чини экин көвүд чамаг күндлҗ йовтха.
Чамаг харасн күн эврән харалла харһтха,
Чамаг йөрәсн күн эврән йөрәл автха.
30Ицхакиг әдсән өгснә хөөн Яков эцкәсн һарад йовна. Тер дарунь Эсав ахнь аңһучлад ирнә. 31Тер бас шимтә хот кеһәд, эцкдән авч ирнә.
– Эцк минь, эрҗәнәв, өндәһәд суутн, та нанд әдсән өгдгәр мини хотас идтн, – гиҗ терүнд Эсав келнә.
32– Чи кембвч? – гиҗ Ицхак сурна.
– Би тана көвүмб. Тана ууһн Эсав көвүнтн, – гиҗ тер хәрү өгнә.
33Ицхак бийән бәрҗ чадлго чичрәд, иигҗ келнә:
– Аң бәрҗ авч ирәд, нанд хот кеҗ өгсн күн кен болҗахмб тегәд? Чамаг ирхәс өмн хотынь идәд, тер күүнд әдс өгүв. Тер ода әдс авсн күн болх!
34Эцкиннь келсиг соңсад, Эсав оркрад, һашутаһар хәәкрәд эцкдән иигҗ келнә:
– Эцк минь, нанд бас әдс өгтн, нанд бас өгтн!
35– Чини дү мектә йовдл һарһв, чамас әдс булаҗ авв, – гиҗ тернь хәрү өгнә.
36– Үнндән терүнд Яков гидг нер өгсмн болҗану? Хойр дәкҗ тер намаг шахҗ һарһҗана: мини түрүлҗ төрсн зөвиг бийдән авчкв, ода болхла – мини әдсиг авчкв! – гиҗ Эсав келнә. – Та нанд әдс үлдәсн угайт? – гиҗ сурна.
37– Би чамд терүгәр ной кевүв, терүнә цуг төрл-садыг терүнд зарц болтха гиһәд өгүв, терүнд буудя болн шин чаһр нерәдүв. Көвүн минь, ода би чини төлә ю кеҗ чадхмб? – гиҗ Ицхак Эсавд хәрү өгнә.
38– Эцкм, танд ор һанцхн әдс бәәнү? Нанд бас әдсән өгтн, эцкм! – иигҗ келәд, Эсав хәәкрәд уульна.
39Эцкнь терүнд иигҗ хәрү өгнә:
– Чини бәәх һазрчн урһцста һазрас холд бәәх, деерәс теңгрин чиигәс холд бәәх. 40Чи үлдәрн бәәхич, эврәннь дүүдән заргдхич. Болв цагнь ирхлә, чи буцхларн, терүнә ярмиг эврәннь күзүнәсн авч хайхич.
Яков Лаван тал гүүнә
41Эсав эцкиннь өгсн әдсәс көлтә Яковас өшәһән авх сана зүүнә. Бийдән тер иигҗ келнә:
– Эцкән хармнад уульх өдр өөрхн, тегәд би эврәннь дү Яковиг алнав.
42Ик көвүн Эсав ю келсинь Ребекад күргҗ соңсхна. Тегәд Яковиг дуудулад келнә:
– Чини ах Эсав чамаг алх уха зүүһәд бийән әәтрүлҗәнә. 43Көвүм минь, мини келсәр ке: эрк биш Харан орад мини ах Лаван тал гү. 44Чини ахин һалзурлһн тогтнтл, теднәд бәәҗә. 45Ахинчн һалзурлһн тогтнад, чини кесиг тер мартхла, чамд хәрү ирҗ болҗана гиҗ би келүлхв. Тадн хойриг би ю хәәҗ нег өдр геехв?
46Дәкәд Ребека Ицхакд иигҗ келнә:
– Эсавин гергд – хетмүдәс цуцрад бәәвв, би әмд бәәсндән байрлҗахшв. Кемр Яков бәәрн күүкдәс – мел иим хетиг, эднлә әдләс мордулҗ авхла, би ю хәәҗ әмд бәәхв?
Jelenleg kiválasztva:
Эклц 27: ХКО_ӘБ
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Институт перевода Библии, 2002-2023