Madius 16
16
1Eris ahtag pan ehelen a ilpu Farisi im lep ilpu Satusi, um oop yin, um ugni yin mika yi ehvaig ehele ra nitai asjaaicnaig an nohatag aien. 2Is tas aien, um ika ehele ra, Et wat jupura, wat cop nohatag, eka ika aijaua, Etpu upene nipnyin. 3Im lep an nuhialeg, et wat cop nohatag um aimoc, eka ika aijaua, Etpu has nipnyin inpeig. Ak ilpu atimi efaifa, eka ato aijaua nesganimtan nohatag; ja eka auri aijaua par eti ato niji itai asjaaicnaig an naopan ineig? 4Era merit nalmoivaig nitai asjaaicnaig a ilpu atimi auatatimi im ilpu atimi imyiisjis nahcil; ja eri eti almoi nitai asjaaicnaig ara, nitai asjaaicnaig ineig ache o Jona naprofeta. Is ude ra aien um atga o un. 5Eris apan a ilpu atimi atahaijeg yin an taka uarin, ja eris eti imyiehva nareto ara par apos. 6Is ika ehele ra a Iesu, Aminjinai caua aijaua, um jim leh leven o ilpu Farisi im ilpu Satusi. 7Eris tas jipe ehele ra ara, um ika, Et asan tas ineigki aien va nedo uja, nikavaig, inta mun eti apos nareto akaija. 8Is wat ato a Iesu, is ika ehele ra aien, Ak ilpu atimi auatialidi par imyiisjis ninivaijec, eka auri aijaua par tas jipe ehele caua, um ika, Inta mun eti apos nareto akaija? 9Eka auri aijaua par eti ato, um eti imyiehva nareto is ikman, akis alaa atimi is faiv dausant aijaua, um lep asjapicnaig ineig is aled, um atohoaig irai efehcat is ehed? 10im lep nareto is seven, akis alaa atimi is for dausant aijaua, um lep asjapicnaig ineig is aled, um atohoaig irai efehcat is ehed? 11eka auri aijaua par eti ato, nikavaig, kis eti tas ehelemia ainyak va areto, kis wat ika ehelemia ainyak aki aminjinai caua aijaua vai leven o ilpu Farisi im ilpu Satusi? 12Eris ato ara, nikavaig, et mun eti ika ehele ra aien, eri aminjinai ra ara vai leven uri areto, ja va nesege o ilpu Farisi im ilpu Satusi.
13Is wat yetpan a Iesu an pece Sisaria Filipai, is ahodaig ilpu atimi atahaijeg yin aien, um ika, Era ika natimi, ainyak di aigki, Inhal o natimi? 14Eris ika ara, Era ika nahaiji ra, Nai Joanes aiek Natimi baptiso: um ika nahaiji ra, Elaija; um ika nahaiji ra, Jeremaia, ka tah et ethi irai ilpu profeta. 15Is um ika ehele ra aien, Eka ika aijaua, ainyak di aigki? 16Is tas a Saimona Pitrus, um ika, Nai Kristo aiek, Inhal o Atua umoh. 17Is tas a Iesu, um ika ehelen, Na mun ahesmoij aiek, ak Saimona, inhal o Jona: eris eti asuptecnaig ehelum natimi, jai Etmak an nohatag: 18ek lep ika ehelum ainyak, Nai Pitrus aiek, ekpu atijai nakalasia unyak ainyak an heteuc ineigki; inyi ti esjilid iran nemda an pece has: 19ekpu alupai euc ainyak kii an nelcau an nohatag: nitai ineigki napu arore aiek an nobohtan, uhpu lep arore an nohatag; im lep nitai ineigki napu aihiyi aiek an nobohtan, uhpu lep aihiyi an nohatag. 20Is acaiji ilpu atimi atahaijeg yin aien mika eri jim asuptecnaig ehelen tah, um ika, Et Iesu Kristo aien.
21Is atupun a Iesu an naopan iyehki um asuptecnaig ehele ilpu atimi atahaijeg yin, um ika, Ek et hidim ika ainyak ki apan Jerusalem, etpu ahinag nohocred unyak vai ilpu atimi tas alep, im ilpu atimi ahlap esjilid, im ilpu atimi esege, erupu atgei nyak ara; ja et wit ti pan itac nadiat inyi eseij ekpu lep nusjai ainyak. 22Is asjiraig yin a Pitrus, um ated imi yin, um ika, Kaiheuc vai euc, ak Natimarid: inyi ti yetpam iram nitai iji eigki. 23Ja is ahidai yin aien, um ika ehele Pitrus, Apan aiek an nidjik, ak Satana: nai itai epihtau imi nyak aiek: na eti aktaktai aiek niji itai o Atua, jam aktaktai ache niji itai o atimi.
24Is ika ehele ilpu atimi atahaijeg yin a Iesu, El et ahced nyak tah natimi, etmu ude nedo ineig aien et merit vaig aien, etmu alcacse nauincai atgeig o un aien, um ahced nyak. 25Aien et imyicoho yin aien, inyi mas aien: aien inyi mas aien vai nyak, etpu leh nitai umoh iran aien. 26Et eti upene vaig tah natimi inlehvaig nobohtan asega, um auahas nesgan: inyi auanimtan nesgan tah natimi anhe? 27Etpu yetpam a Inhal o natimi an natimi alupas o Etman im lep ilpu agelo o un; etpu ago neruvaig imi atimi asega aien yi idivaig nauritai ura. 28Et inivaijec ineig ek asaig ehelemia ainyak mika, Era aiji igcaki nahaiji atimi eri upyi hup ara um ecet Inhal o natimi napamvaig an nelcau o un, ja par emesmas.
Jelenleg kiválasztva:
Madius 16: ATY1863
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
historic text maintained by the British and Foreign Bible Society