Madius 23
23
1Is tas ehele atimi is ahinag a Iesu, im lep ehele ilpu atimi atahaijeg yin, 2um ika, Era ateuc an nitai ateuc o Moses a ilpu atimi esege im ilpu Farisi: 3akumu imyiaiji niji itai asega aijaua era asaig ehelemia ara, um ago; jam jim ago nedo ura: era tas ara, jam eti ago. 4Era ahpoi nitai ahelwei opouc ara, um ikni irai uhli atimi, et ehka naposvaig; jam esjum ara nublivaig irai upsikmara. 5Era ago nedo asega ura ara mika eri alum ra natimi: era ago lecan nuari apelumai ura ara eris aged alaigaheni iran, um lep alupas intid irai apelumai ura; 6era merit ara vai uarin esjilid u inhag o atimi, im lep itai ateuc esjilid irai eom alaigaheni, 7im lep naiheuc vai ra vaig atimi irai tiptag, im lep narohoai ra vaig par ika, Ak Rabai, ak Rabai. 8Uhmu jim anvi nidamia par ika Rabai [natimi esege]: et ethi ache Natimi esege unyimia, et Kristo aien; eka ilpu raimu aijaua asega. 9Jim anvi nidan tah aijaua par ika et etmamia an nobohtan aien: et Etmamia ache aien et amen an nohatag aien. 10Uhmu jim anvi nidamia par ika ilpu atimi alupas: et ethi ache Natimi alupas unyimia, et Kristo aien. 11Aien et esjilid iramia aien, etmu aheca unyimia aien. 12Aien et ago nedo ijinies aien, etpu upoupo aien; aien et ago nedo upoupo aien, etpu esjilid aien.
13Ja a’a, auwe vai caua, ak ilpu atimi esege im ilpu Farisi, eka ilpu atimi efaifa aijaua! eka atapanes nelcau an nohatag va atimi aijaua: eka eti apan iran aijaua, eka lep acaiji ra aijaua era apan iran ara. 14A’a, auwe vai caua, ak ilpu atimi esege im ilpu Farisi, eka ilpu atimi efaifa aijaua! eka atoraliak inpadiaig o ilpu takata eris emesmas ilpu atamnyura aijaua, um alaigaheni opra par adahpoi nedo unyimia: va nedo ineigki etpu idim esjilid nohocred unyimia. 15A’a, auwe vai caua, ak ilpu atimi esege im ilpu Farisi, eka ilpu atimi efaifa aijaua! eka ehced jop aijaua um ahilek pece, mika aki leh tah yi ethi yi alaigaheni unyimia; ja aku wit leh yin aijaua, eka ago yin aijaua mika yi halav an pece has, um esjilid iramia. 16A’a, auwe vai caua, ak ilpu atimi atau ira atimi jam aupat inliinmopomia, eka ika aijaua, Aien et asig yi aktit intas aien va neom ahlap, et takitai intas o un; ja aien et asig yi aktit intas aien vai colt anliin neom ahlap, inyi ipjin intas o un: 17eka ahnag aijaua, um aupat inliinmopomia: et eti esjilid colt irai neom ahlap; et imyiitaup colt neom ahlap: 18im lep ineig, Aien et asig yi aktit intas aien va nefata, et takitai intas o un; ja aien et asig yi aktit intas aien va nitai ahlap iran, inyi ipjin intas o un: 19eka ahnag aijaua, um aupat inliinmopomia: et eti esjilid nitai ahlap irai nefata; et imyiitaup nitai ahlap nefata: 20va nitai ineig aien et asig yi aktit intas aien va nefata, et asig yi aktit intas aien va nefata, im lep va niji itai asega iran: 21aien et asig yi aktit intas aien va neom ahlap, et asig yi aktit intas aien va neom ahlap, im lep yin et amen iran aien: 22aien et asig yi aktit intas aien va nohatag, et asig yi aktit intas aien vai dorona o Atua, im lep yin et ateuc iran aien. 23A’a, auwe vai caua, ak ilpu atimi esege im ilpu Farisi, eka ilpu atimi efaifa aijaua! eka ahtai nefelelecai auanipin upene aijaua im nefelelecai acas, jam ude niji itai esjilid an tas alep, nedo atoh, im naiheuc va atimi, im nedo inivaijec: et upene vai caua nagovaig nitai iji eigki, jam eti ude nedo iyehki. 24Ak ilpu atimi atau ira atimi jam aupat inliinmopomia, eka elcei nilupau aijaua, jam atleg kamela. 25A’a, auwe vai caua, ak ilpu atimi esege im ilpu Farisi, eka ilpu atimi efaifa aijaua! eka ago adicinadicin inyipin nipjinitai itac aijaua, im lep naplet, ja et amen anliin nipjinitai niji itai eris atoraliak im niji itai has, um ohua. 26Ak Farisi, et aupat inliinmopom aiek, namu uhup aiek um ago adicinadicin inliin nipjinitai im naplet, va etpu lep adicinadicin itac. 27A’a, auwe vai caua, ak ilpu atimi esege im ilpu Farisi, eka ilpu atimi efaifa aijaua! eka idivaig nehpai itai atelmoi atimi emesmas iran aijaua, et ahi ijinies um eklim upene; ja et ohua eduei atimi emesmas iran im niji itai has asega. 28Et idim ucco et upene nedo unyimia aijaua an nuhup o atimi; ja et ohua nefaifa im niji itai has anliinmopomia aijaua. 29A’a, auwe vai caua, ak ilpu atimi esege im ilpu Farisi, eka ilpu atimi efaifa aijaua! eka ehteduo hat irai ehpai itai o ilpu profeta aijaua, um ago upene ehpai itai o ilpu atimi upene, 30um ika, El ecris amen aijama an naopan umumoh o ilpu retpoma, el ecris eti ago nedo ura aijama, um atgei ilpu profeta. 31Va nedo ineigki eka asuptecnaig vai caua aijaua, nikavaig, eka ilpu mopura aijaua eris atgei ilpu profeta ara. 32Akumu ago ehni nedo o ilpu retpomia aijaua. 33Ak ilpu imyiv, im ilpu vaiper, et ehka vai caua nahavaig va nohocred an pece has.
34Ek abraig pan ilpu profeta ehelemia ainyak, im ilpu atimi arapakau, im ilpu atimi esege; ja akupu atgei nahaiji ra aijaua an nauicai atgeig, um aredei nahaiji ra irai eom alaigaheni unyimia, um atmas vai ra irai iji uari-pece; 35etpu idim yetpan iramia inja irai ilpu atimi upene asega eris atgei ra an nobohtan, ahes an ja irai Ebel, natimi upene, um yetpan an ja irai Sakaraia inhal o Barakaia, akis atgei yin aijaua juju an niblan neom ahlap im nefata. 36Et inivaijec ineig ek asaig ehelemia ainyak mika, Etpu yetpam nitai iji eigki asega ira atimi an naopan ineig. 37Ak Jerusalem, ak Jerusalem, na atgei ilpu profeta aiek, um asji ra irai hat eris abraig pan ra ehelum, kis ehcahinag merit ainyak mika ki asjapicnaig ilpu hal unyum et idivaig injaa et aibuthan hal o un aien, ja akis esjum aijaua. 38Et idim eteuc neom unyimia aijaua, ja et ahyuahyu. 39Ek asaig ehelemia ainyak mika, Akupu eti ecet nyak aijaua um uhum pan naopan iyehki, akupu ika aijaua, Et mun ahesmoij aien et ham aien an nidai Natimarid.
Jelenleg kiválasztva:
Madius 23: ATY1863
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
historic text maintained by the British and Foreign Bible Society