ATÜNNAK 1
1
Atüisho ah Mawng
1Akhtük bäih ah Khanpughi naw khankho la khomdek cu tüisho ci. 2Khomdek cu a i ah kä ng’shing ne, kho k’häu ah kya ci. A thuuk nak pi bäih ah tuinu likim cu yiin ne hmüp sei, Khanpughi ah Mumcha cu tui ah khan ah hnüntho ci. 3Khanpughi naw, “Kho dei sä” ci sei, kho dei lawk ci. 4Cun ah akdei cu Khanpughi naw hmu ne yei netah akdei la hnüüp cu m’chak ci, 5Khanpughi naw akdei cu “Hnüüp” ah sui ne, akhmüp cu “Mü” ah sui ci. Mühun angpyi kawn ah khongawi gawk law ne-cun cu ak htük bäih hnüüp ah kyak ci.
6Cun kawn ah Khanpughi naw, “Tuinu ah ng’lung ung khomik dang law sä” ci netah; 7Khanpughi naw khomik cu pyang ne, tuinu la khomik ah khan ung tuinu ah kya lawk ci. 8Khanpughi naw khomik cu “Khankhomik” ah sui ci. Mühun la khongawi ng’tün ne ak hnüüp goi nak ah kyak ci.
9Cun kawn ah Khanpughi naw, “Khankhomik ah kaa ah tui gui avan ng’dawn u sä, khokawng ng’dang law sä” ci sei acun ah kya lawk ci. 10Khanpughi naw khawkawng cu khomdek ah sui ne, tui gui ng’dawn cicu “Tuinulikim” ah sui ci. Cun cu Khanpughi naw teng neta yei ci. 11Cun kawn ah Khanpughi naw, “Paai ci la m’theih ci, ghing gong ci phung avan khomdek khan ah ng’lih pyou sä” ci sei a cun ah kyak ci. 12Khomdek naw m’shi khai ah geit, m’shi khai ah sing gaw avan cu phung ghing sak ci. Cun cu Khanpughi naw teng neta, yei ci. 13Mühun la khawngawi cu ng’tün ne a hnüüp thum nak ah kyak ci.
14Cun kawn ah Khanpughi naw, “Mü la hnüüp m’khoichak khai ah khawmik ung akdei-im om sä; yumnak pawi gui bi nak vai la akhin hmat nak vai ah khawkum hni cha gui ng’khoicha ne om sä; 15Khankhomik ung om ne khomdek dei khang khai ah akdei-im cu om sä” ci sei a cun ah kyak ci. 16Cun kawn ah Khanpughi naw akdei-im goi cu pyang ci. Khaw hnüüp uk ciah khohni la khomü uk ciah chaa ah kyak ci; aisi gui phi tüisho ci. 17Khomdek khan ah deikhang ne, 18mü la hnüüp uk ne, akdei la a hmüp m’khochak khai gui avan cu Khankhomik ung k’suum gui ci. Cun gui cu Khanpughi naw teng neta, yei ci. 19Mühun la khawngawi ng’tün ne hnüüp phli nak ah kyak ci.
20Cun kawn ah Khanpughi naw, “Tuinu tui ung om ciah akghing gui om u sä, khankho häu ung kha gui cu yong u sä” cik ci. 21Cun ah kyasei tuinu ung tui ung om ciah nga ming päng la khaw häu ung yong ciah kha ming päng avan Khanpughi naw tüisho ci. Cun gui cu teng neta Khanpughi cu yei ci. 22Khanpughi naw, htanau ne ng’shon bang vä, tuinu phi be sak vä, kha gui phi khomdek khan ung da ne ng’shon u sä cine phyisä gui ci. 23Mühun la khawngawi ng’tün ne ak hnüüp hma nak ah kyak ci.
24Cun kawn ah Khanpughi naw, “Akghing nü, aming päng, nep ci gui, nget ci gui, ng’vaak ci gui, ng’yawih ci gui, yo ci gui, däm ci gui avan cu khomdek naw ng’tüi sak sä” ci sei, a cun ah kyak ci. 25Cun ah Khanpughi naw akghing avan cu tüisho neta, cun gui cu teng ne, yei ci.
26Cun kawn ah Khanpughi naw, “Hniciim chang cu mi mät ah müi ah mäih ah mi tüisho khai; ngami naw nga gui ni, kha gui ni, akghing nü avan cu uk khai gui” cik ci. 27Cun ah kyasei Khanpughi naw hniciim chang cu amät ah müi ah mäih ah tüisho ci. Ani naw pami la hnumi cu tüisho goi ci. 28Cun kawn ah Khanpughi naw phyuhtheh goi neta, “Hta nau ne ng’shonbang ne, khomdek cu be sak ne, nami näng vai nei. Nga gui avan, kha gui avan, la khomdek khan ah hang om ci phung avan nami uk vai nei. 29Teng vä, khomdek khan ung om ciah geit m’shi avan, sing go ah m’shi avan cu nami ei vai ah ka ning pe gui ci nei; 30M’dek ung lum ciah akghing avan la kha avan ah ei vai ah khumsai a hlü hlü phi ka tha ci nei” ci sei, acun ah kya lawk ci. 31Khanpughi naw a tüisho gui cu teng neta, anghtei ah yei ci. Mühun la khawngawi ng’tün ne ak hnüüp chuk nak ah kyak ci.
Jelenleg kiválasztva:
ATÜNNAK 1: CBC
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Cho Bible Common Language © Bible Society of Myanmar, 2016.