मत्ती 2
2
ज्ञानी लोका रा आऊंणा
1हेरोदेस राजा जेबे यहूदिया ईलाके मन्झ राज करहा था तेबे तेस जिल्ले रे बैतलैहम गांऊँआं मन्झ यीसू रा जन्म हुआ। तिन्हा ध्याड़े मन्झ पूर्व देसा ले कई ज्ञानी लोक जेह्ड़े तारेया रे बारे जाणहां ऐं थे, स्यों यरुस्लेम सैहरा मन्झ आई किन्हें पुछदे लगे कि, 2“से बच्चा केथिया, जो यहूदी लोका रा राजा बणने रे कठे जम्मिरा? क्यूंकि आस्से पूर्व दिसा मन्झ एक तारा निकल्दा देखिरा जो तेसरे जमणे रे बारे मन्झ दस्हा। होर आस्से तेस बच्चे री अराधना करदे आईरे।” 3तेस यहूदी राजे रे जन्मा रे बारे मन्झ सुणी किन्हें हेरोदेस राजा होर यरुस्लेम सैहर रे कई लोक डरी गये। 4होर हेरोदेस राजे लोका रे सभ मुख्य याजक होर व्यवस्था स्खाणे वाल़े कठे करी किन्हें तिन्हा ले पूछेया कि, नबिये क्या बोलिरा कि मसीह रा जन्म केस जगहा हूणा? 5तेबे तिन्हें राजे किन्हें बोल्या, मसीह रा जन्म यहूदिया ईलाके रे बैतलैहम गांऊँआं मन्झ हूंणा; क्यूंकि मीका नबिये एह्ड़ा लिखिरा जेह्ड़ा परमेसरे बोलिरा था:
6“होर तू, यहूदा रे ईलाके#2:6 पुराणे नियमा मन्झ एस ईलाके रा नाऊँ यहूदा था होर यीसू मसीह रे जमणे तक भी यहूदिया ईलाके रा नाऊँ ये ही था रे बैतलैहम गांऊँआं मन्झ रैहणे वाले लोको,
तुस्सा केसी भी तरीके ले यहूदा रे अधिकारिया मन्झा ले केसी ले छोटा नी आ;
क्यूंकि तुध मन्झा ले एक राजा निकल्ना,
जेस मेरी प्रजा इस्राएल देसा रे लोका री रखवाली करणी।”#2:6 मीका 5:2
7हेरोदेस राजा जाणना चाहां था कि तेस बच्चे री उम्र कितनी ई, इधी कठे तिन्हें तिन्हा ज्ञानी लोक जेह्ड़े तारेया रे बारे जाणहां ऐं थे चुपचाप सादे होर तिन्हा ले पूछेया कि, तारा ठीक केस टैम सुझ्या था। 8होर राजे ये बोली किन्हें स्यों लोक बैतलैहम गांऊँआं मन्झ भेजे कि, “जाई किन्हें तेस बच्चेया रे बारे मन्झ ठीक-ठीक पता करा होर जेबे से बच्चा मिली जाए ता मुंजो भी खबर करेया ताकि हांऊँ भी आई किन्हें तेसरी अराधना करी सकूं।”
9-10ज्ञानी लोक जेह्ड़े तारेया रे बारे जाणहां ऐं थे राजे री गल सुणी किन्हें चली गये। होर चलदे-चलदे तिन्हें से तारा देख्या जो तिन्हें पूर्व दिसा मन्झ देखिरा था, तेस तारे जो देखी किन्हें स्यों बौह्त खुस हुई गये। होर से तारा अगे-अगे चली किन्हें तिन्हा जो रस्ता दसदा रैहया, जेबे तक कि स्यों तेस घरा तक नी पूजे जेथी जे से बच्चा था। 11होर तेस घरा मन्झ पूजी किन्हें तिन्हें से बच्चा तेसरी माऊ मरियमा साउगी देख्या, होर मुंहा रे भारे पई किन्हें तिन्हें तेसरी अराधना किती, होर तिन्हें आपणा-आपणा झोला खोल्ही किन्हें तेस जो सोना, होर लोहबान, होर गन्धरसा री भेंट दिती। 12होर तिन्हें सुपणे मन्झ ये च्तौनी पाई कि हेरोदेस राजे वाले दबारा देख्या जांदे, होर स्यों दूजे पैंडे ले हुई किन्हें आपणे देसा जो वापस चली गये, होर तिन्हें राजे जो कुछ नी दसेया।
मिस्र देसा जो जाणा
13ज्ञानी लोक जेह्ड़े तारेया रे बारे जाणहां ऐं थे तिन्हारे चले जाणे ले बाद, परमेसरा रे एक स्वर्गदूते सुपणे मन्झ युसुफा जो बोल्या, “उठ! तेस बच्चेया जो होर तेसरी माऊआ जो लई किन्हें मिस्र देसा जो भगी जा; होर जेबे तक हांऊँ तुजो नी बोलूं, तेबे तक तू तेथी रैंहयां; क्यूंकि हेरोदेस राजा एस बच्चे जो तोपेया करहा ताकि से एस जो मारी दे।”
14तेबे युसुफ राती उठी किन्हें तेस बच्चेया जो होर तेसरी माऊ मरियमा जो लई किन्हें मिस्र देसा जो भगी गये। 15तेबे से हेरोदेस राजे रे मरणे तक मिस्र देसा मन्झ रैहया, इधी कठे कि से बचन जो प्रभुए होसे नबिया रे ज्रीए बोलिरा था से पूरा हो कि “मैं आपणा मह्ठा मिस्रा ले सादेया।”#2:15 होसे 11:1
16जेबे हेरोदेस राजे देख्या कि ज्ञानी लोक जेह्ड़े तारेया रे बारे जाणहां ऐं थे तिन्हें तेस जो धोखा दितेया, ता से गुस्से किन्हें भर्ही गया। होर तिन्हें बैतलैहम गांऊँआं होर तेसरे ओरली-परली जगहा रे सभ मह्ठे, जो दो साला रे, या तेता ले छोटे थे, स्यों सभ मरवाई दिते। राजे ये काम तिन्हा ज्ञानी लोका रे तारे जो पैहली बार देखणे री जानकारी मताबक कितेया था। 17ये इधी कठे हुआ कि परमेसरे जो बचन यिर्मयाह नबी रे ज्रीए बोलिरा था, से पूरा हुई गया,
18“रामाह#2:18 रामाह जगहा मन्झ याकूब होर तेसरे बंस रैंहयां थे मन्झ एक ज्नानिया री रोणे कर्लाणे री अवाज सुणह्या करहा ई,
बड़ा भारी रोण होर पीटण, होर बड़ा विलाप हुएया करहा,
राहेल#2:18 राहेल याकूबा री लाड़ी थी आपणे मरिरे बच्चेया रे कठे रोया करहा ई थी;
होर से सांत नी हूंणां चाहंदी थी,
क्यूंकि ऐबे स्यों मरी चुकिरे।”#2:18 यिर्म. 31:15
मिस्र देसा ले वापस आऊंणा
19युसुफ, मरियम होर तिन्हारा बच्चा हाल्ले भी मिस्र देसा मन्झ थे, हेरोदेस राजे रे मरणे रे बाद प्रभु रे स्वर्गदूते मिस्र देसा मन्झ युसफा जो सूपणे मन्झ बोल्या, 20“उठ, बच्चेया जो होर तेसरी माऊआ जो लई किन्हें इस्राएल देसा जो चली जा; क्यूंकि हेरोदेस राजा होर तेसरे लोक जो बच्चे री जान लैणा चाहें थे, स्यों मरी गये।”
21यूसुफ मिस्र देसा जो छाडी किन्हें तेस बच्चे जो होर तेसरी माऊआ जो साउगी लई किन्हें इस्राएल देसा मन्झ आया। 22युसूफ ये सुणी किन्हें कि अरिखलाऊस आपणे बापू हेरोदेस राजे री जगहा यहूदिया ईलाके पर राज करेया करहा, से तेथी जाणे ले डरया। होर सुपणे मन्झ परमेसरा ले च्तौनी पाई किन्हें से गलील जिल्ले जो चली गया। 23होर स्यों जाई किन्हें नासरता रे गांऊँआं मन्झ रैहन्दे लगे। इधी कठे से बचन पूरा हुआ, जेह्ड़ा नबिये यीसू मसीहा रे बारे बोलिरा था कि: “तेस जो नासरत गांऊँआं रा बोल्या जाणा।”
Jelenleg kiválasztva:
मत्ती 2: MJLNT
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This work is licensed under Creative Commons Attribution-ShareAlike 4.0 License.