Genesisi 14
14
Abramu e hulukisa Loti
1Ka mbimo ya Amurafeli, mfumeli wa Sinari, ni Ariyoki, mfumeli wa Elasari, ni Kedhorolawomeri, mfumeli wa Elame, ni Tidhali, mfumeli wa#14:1 Ti wombako ku matiko. Goyimi, 2vafumeli vava va to xoma yimbi va txi yalwa ni Bhera, mfumeli wa Sodhoma, ni Bherisa, mfumeli wa Gomora, ni Senahabhi, mfumeli wa Adhama, ni Semebheri, mfumeli wa Zebhoyimi, ni mfumeli wa Bhela, i ku Segori. 3Votshe vafumeli vava, va to tshangana mkovani ka Sidhime, i ku Linene la Mnyu. 4Mndani ka digumi da malembe ni mambidi, va manekile va di fumetwe ngu Kedhorolawomeri, aniko ka dilembe da digumi ni mararu, va to tereka. 5Ka dilembe da digumi ni mune, mfumeli Kedhorolawomeri ni vafumeli va a nga ti pfana navo, va to ya khozisa Varefayime, ditikoni ka Astaroti-Karinayimi, ni Vazuzimi, ditikoni ka Kame, Vaemimi, libalani ka Kariyatayimi, 6va to khozisa Vahorewu, mimangoni ka Seyiri, kala kuhoka Eli-Farane, hafuhi ni txiwula. 7Vona va to tshumela va txi ta ka Mlonga wa Kuthethiswa, i ku Kadhesi, ve khozisa dotshe ditiko da Vaamaleki ni da Vaamori, va nga ti akile ditikoni ka Azazani-Tamari. 8Sekoko mfumeli wa Sodhoma, ni mfumeli wa Gomora, ni mfumeli wa Adhama, ni mfumeli wa Zebhoyimi, ni mfumeli wa Bhela, ene wuwa i ku Segori, va to xoma yimbi ve yalwa navo, libalani ka Sidhime, 9va txi lwa ni Kedhorolawomeri mfumeli wa Elame, Tidhali mfumeli wa Goyimi, Amurafeli mfumeli wa Sinari, ni Ariyoki mfumeli wa Elasari. Vafumeli va mune va txi wukela mtxhanu wa vona. 10Ngu ti taku, libala la Sidhime li ti ni sisima sasingi si nga ti tate ni ndope, kuthavani kwawe mfumeli wa Sodhoma ni mfumeli wa Gomora, va to hojomela ka sona, avale va nga sala va to thavela mmangoni. 11Vakhozisi va to teka totshe tithomba ta Sodhoma ni ta Gomora, ni sotshe sakudya sawe, ve tsula. 12Va to mñola nene Loti, awule a nga ti ti zumba Sodhoma, mwanana wa mwanawe wa Abramu, ni tithomba takwe, ve tsula naso.
13Sekoko mmweyo wa vale va nga huluka, a to ya zivisa Abramu, Muhebheru; Muamori a nga ti akile mikusuni ka Mambre, dixaka da Esikole ni Aneri vona va ti ti pfana ni Abramu. 14Mbimo yile a nga ziva ti to Loti, mwanana wa mnanda wakwe a ñotwe, a to tshanganisa 318 wa tindena, ka va a nga ti zumba navo, e va londeta kala Dhani. 15Se ene a to abanisa vathu vakwe ngu mitxawa, va txi dayela valala vawe ni wusiku, ve va khozisa, ni kuva hinga kala Hobha, wuphemba ka Dhamasku. 16A va honyote sotshe si va nga ti handile, kumweko ni Loti, mwanana wa mnanda wakwe, ni vavasikati, ni vathu votshe va nga ti ñotwe.
Melkisedheki e katekisa Abramu
17Mbimo yi Abramu a nga wuya, msana ka kuva a di khozisile Kedhorolawomeri ni vafumeli vale a nga ti pfana navo, mfumeli wa Sodhoma a to m'hingeta libalani ka Savhe (i ku libala la mfumeli.) 18#Wona ni ka: Vaheb. 7:1-10. Melkisedheki, mfumeli wa Salema, a to tisa dipawu ni vhinya, ene i ti mphaxeli wa Txizimu Nyatxitimwi. 19Ene a to katekisa Abramu, a txi khene:
“A na katekiswe Abramu
ngu Txizimu Nyatxitimwi,
M'vangi wa nzuma ni mafu!
20Txi na bongwe Txizimu Nyatxitimwi
txi nga ningela valala vako
manzani kwako!”
Se Abramu a to ninga Melkisedheki sa wugumi ka sotshe si a nga ti si mani.
21Sekoko mfumeli wa Sodhoma, a to khene ka Abramu:
“Ni ninge vathu dwe, u teka tithomba ti maha tako.”
22Aniko Abramu a xamute ka mfumeli wa Sodhoma, a txi khene:
“Na xambanya ngu kugula dianza dangu masoni ka Txizimu Nyatxitimwi, i ku M'vangi wa nzuma ni mafu, 23ti to kha ni na mbi teka txilo txi txi kulumbako, hambi ndrima, mwendo ngoti yo sunga ngu yona tikathula. Nguko u nga thuka u womba ku khawe ni humelelisile Abramu. 24Kha ni na mbi teka txilo, hahanze ka sile vathu vangu va nga dya, ni sile va no avelwa avale va nga ta ni nani, Aneri, Esikole ni Mambre. Evo va na teka txyavelo txawe.”
Jelenleg kiválasztva:
Genesisi 14: BEC2016
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
A Bíblia em Txitxopi © Bible Society in Mozambique, 2016.