Genesisi 19
19
Sodhoma, didhoropa da txionho
1Ni minova, tingelozi timbidi ti to hoka Sodhoma, Loti a di khalahatshile ha txikeni ka didhoropa. Mbimo yi Loti a nga ti wona, a to khukha e ti hingeta, se a to nama hahatshi, 2a txi khene ka tona:
“Anu vanyamne vangu, na mi kombela mi wulela nyumbani kwangu, ani txithumi txanu, mi na samba mikondo, mi txi otela wusiku wa nyamsi, ni mixo mi na teka kambe nzila yanu.” Aniko vona va xamute va txi kha vona:
“Ahim-him, athu hi na otela hahanze.”
3Loti a to ti khongotela ngutu tiza ti txi tumela kuwulela nyumbani kwakwe. A to ti lulamisela sakudya, e bhika mapawu o mbi na mtshumbelo, se tona ti dya.
4Na va sinzi kuya kuotelani nyumba ya Loti yi to randelwa ngu votshe vathu va didhoropa, vathu va Sodhoma, vadotho ni vahombe, 5Se va to dhana Loti, va txi kha vona:
“Va hani vathu vava va nga wulela m'tini kwako wusiku wuwa kani? Va tise kwathu hi lava kuotela navo.”
6Sekoko Loti a to huma hahanze, e seka ditimba ngu msana kwakwe 7a txi va gela ku khene:
“Na mi kombela, vanathu, mi nga maheni kubiha ko ngeto! 8Engisani: Ni na ni vanana vambidi vamahorana, ava va sinziko kuotela ni vavamna; ni na mi tisela vona, kasi mi txi maha kuranda ngu vona; aniko majaha awa mi nga maheni txilo ka ona, nguko vona, va wulete mtsudini ka nyumba yangu.” 9Aniko vona va mxamute va txi kha vona:
“Khukha eho! M'thu wu a nga ta muwa kota muwuyi a lava ku ti maha mthethisi.
Ti di ngeto, athu hi na maha kubiha ka hombe kwako kupinda ka vona.”
Va to susumeta Loti ngu mtamo, ve tshuketa hafuhi ka ditimba kasiku ve di faya. 10Ti di ngeto, vathu vale va vambidi, va to ñola Loti ve m'dinda e wulela nyumbani, hafuhi kwawe, se ve seka ditimba; 11#Wona ni ka: 2 Vafu. 6:18. se vavamna vale va nga ti ha txikeni ka nyumba, va to va tsayisa ngu wubhofu, kukhukhela ka vavadotho kala ka vahombe, ti to va si sikoti kuwona txike.
Loti a txi huma ngu Sodhoma
12Sekoko vavamna vale va to kha vona ka Loti:
“U na ni vamwani vathu kona hawa kani? Mwane wako, vanana vako va mazambi, vanana vako vamahorana, ni votshe vale i ku vako va ku mu didhoropani, va humise ka wuwa wukhalo; 13nguko hi lava kuhaxula wukhalo wuwa, huwa yi yi nga kwangula yo mangalela wukhalo wuwa masoni ka Mkoma, njahombe, se ene Mkoma a hi rumile ku ta wu fuvisa.”
14Sekoko Loti a to ya khene ka majaha ale ma nga txi lava kuteka mahorana akwe:
“Khukhani, humani ka wukhalo wuwa. Nguko Mkoma a lava kuhaxula didhoropa.” Kambe atiya ti to wombwa vakanganyisi.
15Se ni mabimbi-kutxa, tingelozi ti to khongotela Loti, ti txi kha tona:
“Khukha, teka msikati wako ni vanana vako vavambidi vamahorana, ava va kuho kona hawa, kasi u si loviswi ngu txikhawuliso txa didhoropa.”
16 # Wona ni ka: 2 Ped. 2:7. Ngako a nga ti ti kana-kana, vavamna vale va to mñola ngu diwoko, kumweko ni msikati wakwe, ni vanana vakwe vavambidi vamahorana, nguko Mkoma a ti ni wumbilu ngu vona. Vona va to mu humisa veya m'veka hahanze ka didhoropa. 17Ngako va di va humisile hahanze ka didhoropa, mmweyo wa vavamna vale, a to khene ka Loti:
“Hulukisa wutomi wako! U nga wone msana, kambe u nga eme ni ka wuhi wukhalo wa mu libalani, thavela mmangoni, kasi u si lovi.”
18Loti a to xamula, a txi khene:
“Ahim-him, Mkoma, ani na ku kombela! 19Txithumi txako txi mani dithomo masoni kwako, kambe u kombisile wumbilu wako wa hombe kwangu, ani txithumi txako, ngu kuhulukisa wutomi wangu. Aniko kha ni sikoti kututumela mmangoni, ni nga welwa ngu dikhombo diya, ni txi fa. 20Ku ni diya didhoropa, di ku hafuhi ngutu, adi i ku da didotho, adi ani ni sikotako kuthavela ka dona. Ni tumelele ni thavela ka dona. Ina kasi dona hi nga didotho kani? Ani ni na ya ponela ka dona!” 21Ene a xamute, a txi khene:
“Ni na ku mahela kambe adiya dikato, kha ni na mbi haxula didhoropa di u di wombako. 22Kuluveta u txi thavela koneyo, nguko kha ni sikoti kumaha txilo u sanzi kuhoka koneyo.” Ngu mhaka ya toneto didhoropedo di nga ningwa ditina di do#19:22 Ti wombako ku didotho. i Zowari.
Kukhundumuswa ka Sodhoma ni Gomora
23Mbimo yi ditambo di nga ti guleka txitimwi ka mafu, Loti a to wulela Zowari. 24#Wona ni ka: Mat. 10:15; 11:23-24; Luk. 10:12; 17:29; 2 Ped. 2:6; Jud. 7. Sekoko Mkoma a to wisa txivavula ni mndilo txitimwi ka didhoropa da Sodhoma ni da Gomora, si txi ta ngu nzumani, ka Mkoma Txizimu. 25Se a to haxula madhoropa ale ni lotshe libala, ni votshe vaaki va madhoropa ni similwa sa mafu. 26#Wona ni ka: Luk. 17:32. Se msikati wa Loti a to tshembereka e wona msana, a so maha txithombe, txa mnyu.
27Ni mixo ngutu, Abrahamu a to khukha eya ha wukhaloni hale a nga ti ka wona, a txi womba-womba ni Mkoma. 28Se a to wona Sodhoma ni Gomora ni lotshe libala, a txi wona wutshi wu txi tuvika wu txi guleka ngu ha mafuni, nga wutshi wa txikho txa hombe. 29Ngu toneto, mbimo yi Txizimu txi nga haxula madhoropa ale a libalani, txi to alakanya Abrahamu, se txi hulukisa Loti ka kuhaxulwa ka madhoropa awa Loti, a nga ti akile ka ona.
Kutumbunuka ka Vamowabhi ni va ka Amoni
30Loti a to khukha Zowari eya aka mmangoni kumweko ni vanana vakwe va vambidi, vamahorana, nguko kha tsana kuzumba Zowari, se ene a to ya zumba phakoni ni vanana vakwe vamahorana.
31Sekoko dihorana da matiwula di to womba ka mnanda wa dona, di txi kha dona:
“Tate wathu a kumbile, ditikoni muwa kha ku nga ni dijaha di sikotako kutekana ni nathu, nga ti i ku mkhuwo wa dotshe ditiko. 32Ngono hi ta levisa tate ngu vhinya, hi txi otela nayo, kasi hi na mana kuveleka vanana ni tate wathu.”
33Vona va to setela vhinya tate wawe e leva, ka wusiku wonewo, se awu wa matiwula a to ya otela ni tate wakwe, tate wakwe kha tipfa txilo, mbimo yi ene a nga wulela a txi otela nayo, ni mbimo yi a nga huma e tsula. 34Se mangwanani ka kona, awule wa matiwula a to khene ka mnanda wakwe:
“Ka wusiku wa nyamnova, ani ni otete ni tate; a hi mlevise kambe ngu vhinya ka wusiku wa nyamsi, sekoko tsula u ya otela nayo, ngu nzila yiya, hi na veleka lihunzu ni tate wathu.”
35Se va to seta vhinya tate wawe kambe, ka wonewo wusiku, mnanda wa kona a to otela ni tate wakwe, aniko kha pfa txilo kuotelani kwakwe nayo, hambi ha kuwukani kwakwe. 36Ngu toneto, vanana va Loti vavambidi vamahorana, va mani sirumbu ni tate wawe. 37Mkomwakona a to veleka mwanana wa dizambi, awu a nga m'dhana ku i Mowabhi, i ku tate wa Vamowabhi kala ni nyamsi. 38Mnanda wa kona nene a to veleka mwanana wa m'zambi, awu a nga mraya ditina da Bheni-Ami, i tate wa Vaamoni va kuho kala ni nyamsi.
Jelenleg kiválasztva:
Genesisi 19: BEC2016
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
A Bíblia em Txitxopi © Bible Society in Mozambique, 2016.