isizwur 13
13
ibḍa abram d‑luṭ
1yawn‑d abram zġ‑miṣr ntta d‑tmġart‑ns ula kullu ma‑iṭṭaf, imuddu s‑lh̬la n‑nagab. imun dids luṭ. 2abram, tggut dars lksibt d‑nnʷqrt d‑uwrġ. 3izri ġ‑nagab ar‑itkka tisgiw‑an aylliġ yakmur s‑bayt‑il. ilkm adġar lli‑ġ‑ttin ikka‑uh̬iyyam‑ns ġ‑gr bayt‑il d‑ɛay, 4ibna gis yadlli akrkur n‑tġrṣi. izayd abram ar‑daġ‑gis‑yaqra i‑ism n‑sidi rbbi.
5imma luṭ lli‑imunn d‑abram, iṭṭaf ula ntta ulli d‑imugayn d‑ih̬iyyamn. 6tggut bahra lksibt n‑abram ula tin luṭ, aylliġ ur‑tn‑sul‑yumi‑wakal‑an s‑sin. 7ilin ula ayt‑kanɛan d‑ayt‑fariz ġ‑tmazirt ġ‑uwssan‑an. tnkr ṭaẓit ġ‑gr imksawn n‑abram d‑win luṭ. 8yini abram ġakudan i‑luṭ: «ġir a‑ur‑tili kra n‑ṭaẓit ġ‑griyi dik ula ġ‑gr imksawn‑inu d‑wink, ašku aytmatn a‑nga. 9is‑ur‑yusɛi‑wakal ġ‑lgddam‑nk? nkr a‑nbḍu nkki dik. iġ‑trit tasga taẓlmaṭṭ, dduġ nkki s‑tfasiyt. iġ‑trit tafasiyt, dduġ s‑tẓlmaṭṭ.» 10yall luṭ alln‑ns ar‑n‑itmnad azaġar n‑wasif n‑urdun, iẓr‑n akal‑an išbɛ aman ar tamdint n‑ṣuɛar, ig zund tamazirt n‑miṣr, zund talɛrṣt n‑sidi rbbi. ġ‑uwssan‑an ur‑ta‑ihlk sidi rbbi timdinin n‑sadum d‑ɛamura. 11isti luṭ i‑ih̬f‑ns kullu azaġar‑an n‑urdun, bḍun i‑ngratsn. imuddu luṭ s‑tsga n‑usġlay n‑tafukt, 12iqama abram ġ‑tmazirt n‑kanɛan. izdġ luṭ ġ‑gr‑tmdinin n‑uzaġar, issmatti ih̬iyyamn‑ns s‑tama n‑sadum. 13imma ayt‑sadum, ayt‑tḥramiyt ad‑gan, ʷh̬šnn bahra iskkirn‑nsn ġ‑iẓri n‑sidi rbbi.
14isawl sidi rbbi s‑abram ġ‑lliġ dids ibḍa luṭ, yini‑as: «all alln‑nk ġin ġ‑tllit, tmnadt s‑lgddam‑nk ula tiġurdin‑nk, tmnadt ula s‑ufasi‑nk d‑uẓlmaḍ‑nk. 15hati kullu tamazirt‑ad tẓrit, rad‑ak‑tt‑fkġ a‑tg tink ula tin tarwa‑nk kullu mayd iftan. 16rad‑ssigtġ amud‑nk zund tiẓratin n‑ugdrur ġ‑wakal. mra is‑illa yan iẓḍarn a‑iḥasb tiẓratin n‑ugdrur n‑wakal, ra‑yiẓḍar a‑iḥasb amud‑nk. 17nkr ar‑ttkkat kullu tamazirt‑ad zġ‑ttmi‑ns ar ttmi yaḍni, ašku kiyi a‑mi‑ra‑stt‑fkġ kullutt.» 18issmatti abram ih̬iyyamn‑ns ġakudan, iddu izdġ ġ‑dar‑uṣġar n‑tasaft n‑mamra ġ‑tama n‑ḥabrun. ibnu ġin yan‑ukrkur n‑tġrṣi i‑sidi rbbi.
Jelenleg kiválasztva:
isizwur 13: SHILOT20
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Selected Old Testament in Tashelhayt (Latin script) © United Bible Societies, 2020.
Robert Bernard Dann.