isizwur 27
27
yiwi yaɛqub lbaraka n‑ifh̬ddi
1izri ma‑izrin yuwssr‑d isḥaq, llasnt‑walln‑ns ur‑sul‑isfaw. iġr‑d i‑yus ifh̬ddi ɛisu yini‑as: «wa iwi.» yini‑as‑d: «ha‑yyi a‑baba.» 2yini‑as: «ha nkki mqqurġ, ur‑ssinġ man ass a‑rad‑mmtġ. 3ġir qlld ġilad s‑lqus‑nk d‑uqrab n‑iẓḍkan, tffuġt s‑tagant tgʷmrt‑iyi‑d kra n‑tfiyi, 4tskrt‑iyi‑d tirmt imimn lli‑dari iɛzzan, tawit‑iyi‑stt‑id a‑stt‑ššġ, fkġ‑ak lbaraka n‑uwl‑inu ur‑ta‑mmutġ.»
5lliġ inna isḥaq awal‑an i‑yus ɛisu, hati tsfld‑as rifqa. iddu ɛisu ġakudan s‑tagant a‑d‑igʷmr kra n‑tgʷmrt. 6imma rifqa, hati tsawl d‑yus yaɛqub tini‑as: «hatin sfldġ i‑babak isawl d‑gʷmak ɛisu inna‑yas 7‹awi‑yyi‑d kra n‑tgʷmrt, tskrt‑iyi‑d tirmt imimn a‑stt‑ššġ, fkġ‑ak lbaraka n‑sidi rbbi ur‑ta‑mmutġ.› 8ġilad a‑iwi, sfld s‑wawal‑inu tskrt ma‑rad‑ak‑iniġ. 9ġir zayd s‑dar‑uwlli, tawit‑iyi‑d zġ‑gis sin ikrwan jjinin, a‑zġ‑gisn‑skrġ i‑babak tirmt imimn ġmklli‑stt‑ira, 10tawit‑stt kiyi ġakudan i‑babak a‑stt‑išš ibark‑k ur‑ta‑immut.» 11isawl yaɛqub yini i‑innas rifqa: «walaynni ha gʷma ɛisu iga kullu ššɛr, imma nkki hati ilm‑inu ur‑gis ššɛr. 12ksuḍġ a‑ur‑imil iggr‑iyi‑d baba, gġ dars aṭnnaẓ, awiġ‑d i‑ih̬f‑inu nnɛlt urd lbaraka.» 13tini‑as innas: «nnɛlt nna gis a‑iwi, a‑flla‑tili. ġir sfld s‑wawal‑inu, tddut tawit‑iyi‑tn‑d.» 14iddu yawi‑tn‑d i‑innas, tskr yat‑tirmt imimn i‑babas n‑yaɛqub ġmklli‑stt‑ira. 15rifqa llant dars ġ‑tgmmi timlsa šwanin n‑yus imqqurn ɛisu, tasi‑tnt‑d tssls‑tnt i‑yus imẓẓin yaɛqub. 16tssls ilmawn n‑ikrwan i‑ifassn‑ns d‑umggrḍ‑ns lli‑ġ‑ur‑illi ššɛr. 17tasi‑d tirmt imimn d‑uġrum lli‑tskr, tsrs‑tn‑in ġ‑ifassn n‑yus yaɛqub.
18ikšm ġakudan s‑dar babas yini‑as: «a‑baba.» yini‑as‑d: «ha nkki. manwa tgit a‑iwi?» 19yini yaɛqub i‑babas: «giġ ɛisu ifh̬ddi‑nk. ha‑yyi skrġ s‑aylli‑s‑iyi‑tnnit. ġir nkr ġila tskiwst tššt zġ‑tgʷmrt‑inu f‑a‑yyi‑ibark‑uwl‑nk.» 20yini isḥaq i‑yus: «ma‑tskrt a‑iwi, aylliġ‑di‑tgʷmrt ḥina?» yini‑as: «rbbi sidik a‑yyi‑ikmmln maylli riġ.» 21yini isḥaq i‑yaɛqub: «ġir akmur‑d ad‑ak‑ggrġ a‑iwi, issanġ izd iwi ɛisu a‑tgit nġd uhu.» 22yakmur‑n yaɛqub s‑dar babas, iggr‑as isḥaq yini‑as: «awal iga win yaɛqub, walaynni ifassn gan win ɛisu.» 23ur‑t‑yukʷz ašku ššɛr n‑ifassn‑ns iga zund win gʷmas ɛisu. yiri ġakudan a‑t‑ibark, 24walaynni isqsa‑t: «izd s‑ṣṣaḥt iwi ɛisu a‑tgit?» isawl‑d yini‑as: «nkkin a‑t‑igan.» 25yini‑as: «fk‑iyi‑d ad‑ššġ zġ‑tgʷmrt‑nk a‑iwi f‑a‑k‑ibark‑uwl‑inu.» ifk‑as išš, yawi‑as‑d aman n‑waḍil ktinin isu. 26isawl daġ babas isḥaq yini‑as: «ġir akmur‑d tssudnt‑iyi a‑iwi.» 27yakmur‑n issudn‑t. ikḍu isḥaq aḍu n‑tmlsa‑ns, ibark‑t ġakudan yini: «hay‑aḍu n‑iwi iga zund win tagant lli‑ibark sidi rbbi. 28a‑k‑issu rbbi s‑tġli n‑ignwan, issmġi‑ak‑d ṣṣabt n‑wakal, issigt‑ak imndi d‑waḍil ard afun, 29gn ayt‑tqbilin ih̬ddamn‑nk, ar‑knnun ayt‑tmizar ġ‑lgddam‑nk, tgt siditsn n‑tarwa n‑innak, ar‑d‑knnun aytmak ġ‑umnid‑nk, tili nnɛlt f‑wanna‑k‑inɛln, tili lbaraka i‑wanna‑yak‑idɛan s‑lbaraka.»
30lliġ ibark isḥaq ġ‑yaɛqub, ġir iffuġ‑d yaɛqub zġ‑dars s‑d‑iwrri gʷmas ɛisu zġ‑dar‑tgʷmrt. 31iddu iskr ula nttan yat‑tirmt imimn, yawi‑tt‑id i‑babas yini‑as: «nkr a‑baba, tššt zġ‑tgʷmrt‑inu f‑a‑yyi‑ibark‑uwl‑nk.» 32yini‑as babas isḥaq: «ma‑tgit kiyi?» yini‑as: «ifh̬ddi‑nk ɛisu ad‑giġ.» 33isḥaq ṭiyr‑as bahra ar‑itrgigiy s‑kigan, yini‑as: «ma‑iga ġwalli‑yad‑d‑igʷmrn yawi‑yyi‑d tagʷmrt ur‑ta‑di‑tuškit, ššġ zġ‑gis barkġ‑t? hati ġilad nttan a‑yiwin lbaraka.» 34lliġ isfld ɛisu i‑wawal n‑babas yut s‑yat‑tġuyit bahra ismmumn, yini i‑babas: «bark‑iyi ula nkki a‑baba.» 35yini‑as: «gʷmak a‑d‑yuškan išmt‑iyi, yawi lbaraka‑nk.» 36yini‑as ɛisu: «han ism‑ns ‹yaɛqub›, imšaška‑d dids ism‑an, ašku hati snat‑twal ayd‑iyi‑išmt. ikks‑iyi yad tifh̬ddit‑inu. ha ġilad yiwi‑yyi lbaraka.» izayd yini ġakudan: «is‑ur‑iyi‑sul‑tudjit nkki kra n‑lbaraka?» 37irar‑as‑d isḥaq: «giġ‑t nttan d‑sidik, gġ kullu aytmas d‑ih̬ddamn‑ns. ssdusġ‑t ula s‑imndi d‑waḍil. ma‑rad‑ak‑sul‑fkġ a‑iwi?» 38yini ɛisu i‑babas: «is a‑baba ur‑dark‑tqama ḥtta yat lbaraka? bark‑iyi ula nkki a‑baba.» ar‑ilmma‑issġuyyu ɛisu ar‑yalla. 39isawl‑d babas isḥaq yini‑as: «ra‑tzdġt ġ‑illiġ ur‑a‑iṭṭar‑unẓar n‑ignwan ula da‑ttmġay ṣṣabt n‑wakal. 40s‑uwzzal‑nk a‑s‑ra‑ttddrt. ra‑tgt ah̬ddam i‑gʷmak, walaynni iġ‑trit a‑tnjmt, tbbit ilmma iḥlasn‑ns zġ‑umggrḍ‑nk.»
41iwrri ɛisu ar‑itkrhu yaɛqub bahra f‑ssibt n‑lbaraka lli‑s‑t‑ibark babas. yini ɛisu d‑ih̬f‑ns: «ġir imikk ra‑immt baba. ad‑ukan‑zrin‑uwssan n‑lɛzzat, rad‑nġġ gʷma yaɛqub.» 42imma rifqa, hati tsfld f‑aylli inna yus imqqurn ɛisu, tazn ma‑d‑yaqran i‑yus imẓẓin yaɛqub tini‑as: «han gʷmak ɛisu ifjjij f‑ih̬f‑ns ašku ira a‑k‑inġ, iskr d‑ih̬f‑ns f‑a‑k‑inġ. 43ġilad a‑iwi, sfld s‑ma‑rad‑ak‑iniġ. nkr trwlt s‑dar gʷma laban ġ‑tmazirt n‑ḥaran, 44tqamat‑n dars kra n‑uwssan ard zrin iriyn gʷmak. 45iġ‑iwrri ihnna ittu ġaylli gis tskrt, ra‑n‑srk‑aznġ a‑di‑twrrit. mah̬ aylliġ ra‑yyi‑tmmtm s‑sin ġ‑yan‑wass?»
46tsawl rifqa i‑isḥaq tini‑as: «ha‑yyi ḥašaġ tudrt‑inu f‑ssibt n‑tmġarin‑an istis n‑ḥit. iġ‑itahl ula yaɛqub yat zġ‑istis n‑ḥit zund h̬tid, nġd kra n‑uwllt‑tmazirt‑ad, mah̬ aylliġ ra‑sul‑ddrġ?»
Jelenleg kiválasztva:
isizwur 27: SHILOT20
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Selected Old Testament in Tashelhayt (Latin script) © United Bible Societies, 2020.
Robert Bernard Dann.