KARARIADI 1
1
Wuke ngu pundariadi l᷊angi l᷊au dunia
1Su titae, su tempo ngu Mawu Ruata nanita nundiadi l᷊angi l᷊au dunia, 2dunia mborong ta nahunsuri, dang mborong nukal᷊abulu. Taghal᷊oang ko nughanoha, nanaka kaul᷊i u patiku, nal᷊iku u kararundung, arawe kawasa ngu Mawu Ruata kakanoa su wawo u ake.#1:2: Su l᷊al᷊ung u wahasa ngu Ibrani botonge l᷊ai isaleng kateho Roh u Mawu Ruata arako l᷊au anging bou Mawu Ruata arako l᷊au anging ko l᷊abo. 3#2Kor. 4:6Mawu Ruata nuhengetang, “Kariadiko kasasua!” Inau pia kasasua. 4Mawu Ruata mal᷊uasi nakawua e'e. Bou e'e nihae-E kasasua e'e bou kararundung, 5dang nisigho-E kasasua e'e “l᷊ou” dang kararundung e'e “huwi”. Huwi napal᷊usi, dang mal᷊ukari nariadi. E'e l᷊ou kahimotongange.
6-7 #
2Ptr. 3:5
Bou e'e Mawu Ruata nuhengetang, “Kariadiko kinoang tadeau puhae ake e'e pakakoa dua ngkamonang, dang maninda e'e su dua ntampa ko mul᷊al᷊ahae.” Inau hal᷊i e'e nariadi. Kere'e Mawu Ruata nukoa kinoang ko nupuhae ngu ake ko ene su wal᷊ang u kinoang bou ake ko ene su wawoe. 8Kinoang e'e nisigho-E l᷊angi. Huwi napal᷊usi dang mal᷊ukari nariadi. E'e l᷊ou karuange.
9Bou e'e Mawu Ruata nuhengetang, “Pakakoako ake ko ene su wal᷊ang u l᷊angi paansehi su tampa simbau, hakiu tana sarung ikawua.” Bou e'e hal᷊i e'e nariadi. 10Mawu Ruata nusigho tana e'e “l᷊ul᷊unge”, dang komol᷊ang u ake e'e nisigho-E “l᷊auri”. Dang Mawu Ruata mal᷊uasi nakawua hal᷊i e'e. 11Mawu Ruata sau nuhengetang, “Tana pupasuwangko kaul᷊i u haghi ngu sasuang, ko haghi ngu pia watunge l᷊au haghi ngu wua”. Inau hal᷊i e'e nariadi. 12Kere'e tana nupasuwang kaul᷊i u haghi ngu sasuang. Dang Mawu Ruata mal᷊uasi nakawua hal᷊i e'e. 13Huwi napal᷊usi dang mal᷊ukari nariadi. E'e l᷊ou katilunge.
14-15Bou e'e Mawu Ruata nuhengetang, “Pakakoako manga barang ko masua su l᷊angi tadeau mupakasua ngu dunia, tadeau mupuhae ngu l᷊ou bou huwi, dang guna ngu mupakal᷊ahe tempo ngu panitakeng u l᷊ou, taung, l᷊au l᷊ou ko l᷊abo su l᷊al᷊ung u agama”.#1:14-15: l᷊ou ko l᷊abo su l᷊al᷊ung u agamaarako musim. Inau hal᷊i e'e nariadi. 16Kere'e Mawu Ruata nukoa darua barang ko l᷊abo masua, e'e ko matangutiti guna ngu mangawasa l᷊ou, dang wul᷊ang guna ngu mangawasa huwi; su l᷊ikuru e'e nikoa-E l᷊ai manga wituing. 17Mawu Ruata namilo barang ko masua e'e su l᷊angi tadeau mupakasua ngu dunia, 18tadeau mangawasa l᷊ou l᷊au huwi dang tadeau mupuhae ngu kasasua l᷊au kararundung. Dang Mawu Ruata mal᷊uasi nakawua hal᷊i e'e. 19Huwi napal᷊usi, dang mal᷊ukari nariadi. E'e ko l᷊ou kapae.
20Bou e'e Mawu Ruata nuhengetang, “Kariadiko su l᷊al᷊ung u ake kukanoa maul᷊i haghi ngu ko nariadi ko kasindae, dang su kinoang katilae maul᷊i manga burung.” 21Inau Mawu Ruata nundiadi manga binatang ngu l᷊auri ko l᷊al᷊abo, l᷊au kaul᷊i u haghi ngu ko wiahi su l᷊al᷊ung u ake, dang l᷊ai haghi ngu burung. Dang Mawu Ruata mal᷊uasi nakawua hal᷊i e'e. 22Mawu Ruata nangal᷊amati kaul᷊i u e'e dingang nangonggo parenta su ko niriadi ko muwiahi su l᷊al᷊ung u ake tadeau puhite dang pamene l᷊auri, dang su manga burung tadeau panamba pakaul᷊i. 23Huwi napal᷊usi dang mal᷊ukari nariadi. E'e l᷊ou kal᷊imange.
24Bou e'e Mawu Ruata nuhengetang, “Dunia pupasuwangko patiku haghi ngu binatang ngu l᷊ul᷊unge, ko mal᷊aharo l᷊au ko maghaghila, ko l᷊al᷊abo l᷊au ko dadio.” Inau hal᷊i e'e nariadi. 25Kere'e Mawu Ruata nukoa kaul᷊i u e'e dang I Sie mal᷊uasi nakawua hal᷊i e'e.
26 #
1Kor. 11:7 Bou e'e Mawu Ruata nuhengetang, “Orasi i'i I Kite neng mukoa taumata ko sarung makoa kere I Kite dang mupapahing I Kite. I sire sarung mangawasa su manga kina, manga burung, dang su patiku binatang ko wal᷊inge, mbaeng ko mal᷊aharo, dang l᷊ai ko maghaghila,#1:26: Simbau salenang ko tuwei: binatang ko wal᷊inge, mbaeng ko mal᷊aharo, dang l᷊ai ko maghaghila; Ibrani: binatang ko mal᷊aharo l᷊au kaul᷊i u dunia. mbaeng ko l᷊al᷊abo dang l᷊ai ko dadio.” 27#Mat. 19:4; Mrk. 10:6 #Kar. 5:1-2 Kere'e Mawu Ruata nundiadi taumata, dang niriadi-E i sire kere watangeng-E sisane. Niriadi-E i sire kol᷊aese l᷊au kowawine. 28Bou e'e nial᷊amateng-E i sire dingang u hengetang, “Puhintoute pakaul᷊i, tadeau hintou ngu mamene kal᷊abo u dunia dang makoa mangangawasange. I kumu Daku onggol᷊ang u hal᷊i putahikang manga kina, manga burung, dang kaul᷊i u binatang ko wal᷊inge ko maghaghila. 29Makoa kang i kumu Daku ionggo si kumu patiku haghi ngu sasuang ko pia watunge l᷊au manga haghi ngu wua. 30Arawe su manga burung l᷊au manga binatang ko maghaghila ko wal᷊inge, i sire Daku onggol᷊ang u onasi l᷊au manga sasuang ko pia raunge makoa kang i sire.” Inau hal᷊i e'e nariadi. 31Mawu Ruata nutuhung kaul᷊i u patiku ko seng nikoa e'e, dang I Sie mal᷊uasi kahingang. Huwi napal᷊usi dang mal᷊ukari nariadi. E'e l᷊ou kanunge.
Jelenleg kiválasztva:
KARARIADI 1: PLT
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be