Enk 17
17
Ore Emuratare naa ninye olmonekie lo lning'o lo sotua
1Ore pee eaku Abram oloo larin intomoni naaudo o naaudo neipang'aki ninye Olaitoriani nejoki, “Ara nanu Enkai magilani, shomo te dukuya nanu miata entioto, 2naa kaitobir osotua lai te rishata ai o iyie, naa kaaponaa oleng.” 3Nebatata Abram te nkomom enye, neirorie Enkai ninye ajoki, 4“Ing'ura etii osotua lai tenebo iyie, naa iyaku menye loo loshon kumok. 5#Irm 4.17 Mikintokini aajo enkarna Abram, kake keaku aikiji enkarna ino Abraham#17.5 Abraham Ore te nkipototo oo Lhebrania neutu ajo “nkakuyiaa loo loreren kumok” amu aaitaa iyie menye loo lororani too loshon. 6Naa kaapon oleng, naa kaitayu iloshon tiatua iyie, naa kepuku ilaiguanak tiatua iyie. 7#Lk 1.55 Naa kaitasheyie nanu osotua lai te rishata ai o iyie o eishoi ino indipa iyie atulusoi tiatua iishoritin enye olning'o lo sotua lai loo ntarasi. Naa kaaku Enkai te iyie o tenebo eishoi ino nikisuju. 8#Iat 7.5 Naa kaaisho iyie tenebo eishoi ino nikisuju enkop nitaayie omon, enkop pooki e Kanaan metaa enino oo ntarasi naa kaaku Enkai enye.”
9Neitoki Enkai ajoki Abraham, “Ore iyie imbung'a olning'o lai, lo sotua iyie o eishoi ino too iishoritin pooki naapuonu te siadi iyie. 10#Iat 7.8; Irm 4.11 Osotua lai ele, limbung iyie, te rishata ai o iyie o eishoi nikisuju iyie: ore pooki lee tiatua intae, naa kemurati. 11Kemurati intae isuaten oo seseni linyi, naa keaku ina olmonekie lo sotua te rishata ai o ntae. 12Ore pooki ng'ae oitabayie inkolong'i isiet naa kemurati, pooki lee tiatua iishoritin pooki, oloba anaa olotoiwuoki te nkaji ino, anaa oloinyanguaki too mpisai inono te pooki omoni leme oinoti linyi. 13Ore ilo oino te nkaji ino oilo oinyanguno too mpesai, nemurati pokira. Metaa etii osotua lai atua iseseni linyi anaa osotua loo ntarasi 14Ore pooki lee lememurata esuate o sesen lenye, nedung'ori aaiwuang'ie tiatua iltung'ana lenyena amu etigila osotua lai.”
15Nejoki Enkai Abraham, “Ore Sarai enkitok ino, mintoki aipot ninye ajo Sarai, kake keaku keji enkarna enye Sara. 16Naa kamayian nanu ninye, ore sii naa kaaisho iyie enkayioni te ninye. Naa kamayian nanu ninye neaku ninye ng'otonye oo loshon, kepukunye ninye ilaiguanak loo loreren.” 17Nebatata Abraham te nkomom enye nekueni eirorie kewan ejo; “Keikini enkerai olpayian kitok oitabayie ilarin iip nabo? Keidim Sara naitabayie ilarin ntomoni naudo atoiu enkerai?” 18Nejoki Abraham Enkai, “Oi eishiaakino nincho Ishmael metotona te dukuya iyie.” 19Nejo Enkai, “A'a, esipa eikiiki enkitok ino Sara enkayioni, naa impot enkarna enye ajo Isaak, naa kaitasheyie osotua lai o ninye, metaa osotua loo ntarasi o too iishoritin naapuonu te siadi ninye. 20Ore Ishmael, aatoning'o iyie, ng'ura, kamayian nanu ninye naitubulaa naponaa oleng. Naa keaku ninye menye ilaiguanak tomon aare, naa kaitaa ninye olosho sapuk. 21Kake kaitasheyie nanu osotua lai te Isaak, aikiiki Sara iyie tena rishata, telde ari olotu.”
22Ore peyie eidip airorie ninye, nelo Enkai aing'uaa Abraham. 23Neya Abraham olayioni lenye o tenebo irrindiki pooki ootoiwuoki te nkaji enye anaa iloinyang'uaki too mpisai enyena o pooki lee otii atua ilewa le nkaji e Abraham, nemurat pooki isuaten oo seseni lenye ina olong, anaa enaitanapa Enkai ninye. 24Ore apa Abraham naa oloo larin intomoni naudo o naudo ina kata peyie emurati esuate osesen lenye. 25Ore Ishmael olayioni lenye naa oloo larin tomon oo kuni peyie emurati esuate osesen lenye. 26Ore teina olong ake nemurati Abraham tenebo olayioni lenye Ishmael. 27O lelo lewa pooki le nkaji enye, inot le nkaji enye, o lelo ooinyang'uaki too mpesai too lomon, nemurati pooki tenebo ninye.
Jelenleg kiválasztva:
Enk 17: SINYATI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
©Bible Society of Kenya, 2020
©Bible Society of Tanzania, 2020