luka 20
20
asa 20
ḏiɽoṯeḏa ga ḏeḏi ŋele ŋeḏi yecu
mṯ. 21:23-27, mks. 11:27-33
1na gi lamon lete ŋwamon ganu ŋwono, gi gwune alɩmu liji kwu dunu gweḏi elo gwun gwubuḏo nuluməḏɩjo ŋuɽuna ŋiŋir ŋeḏi elo, na jɩsis jun jɩbuḏo na jalgaṯɩm na lele leḏi liji nalwila lugwun. 2naluməḏɩjo naleicɩno, eicijɩno, ŋele ŋiro ŋɩrṯa ŋaṯaŋarre dino? na əḏi gwiro gwun gwiḏəḏaŋa ŋelɩnya ŋeno? 3nulwɩrlijo ŋuɽuna nuleicɩno, nyi dino nyi gwajiɽoṯəḏɩjo ŋuɽun ŋe ŋete; na wɩrlijilo. 4ḏibabṯaijɩnə ḏeḏi yuwana ḏeḏi kanyin ḏiro i ḏeḏi liji a? 5naluməḏəṯe laginŋu nalarno, ḏa ilmarno, ḏeḏi kanyin ḏiro, namɩni gwarno, namɩni gwudaro gəko nate nanyəmɩnyi no? 6na ḏa ilmarno, ḏeḏi liji ḏiro, namɩni liji wei lijauwɩce nyɩdol nye; gi gwune ləmɩnyu nalarno yuwana gwiro nebi. 7nalwɩrlijo ŋuɽuna late lilɩŋiḏi ḏɩwiḏi nigwegwe no. 8nal yecu eicɩno, na dino, nyi gwate gwajuməḏɩjo ŋele ŋɩrṯa ŋiro ŋaṯɩlarre dino no.
ŋuɽun ŋun ŋɩlɩbo ŋeḏi jɩneina
mṯ. 21:33-46, mks. 12:1-12
9nuuməḏɩjo liji ŋuɽuna ŋeno ŋun ŋɩlɩbo. gwiji gwete gwugɩḏi jɩneina jun jiro gi ḏuɽuṯ nuapa liji nulgelene gi jɩneina ganu, nuwele kamɩrɩgen ŋiro kaja nuje gaja gwola ganu. 10na kaja ge ḏuṯa nuwəje wainya gi liji lun laṯape ŋɩru gwalapijo nyaɽe kworo nyeḏi jɩneina; namɩni liji lun laṯape ŋɩru piḏo nalwiri di de duḏu ganu. 11nuaɽ nuwəje wainya gwun gwiro kaja; nalpi dino nalərri ŋɩdɩgino, naliri di de duḏu ganu. 12nuaɽu nuwəje gwun gwaduji loro ṯəɽɩl, nalḏɩrṯe nanu dino naldi. 13na gwele gweḏi jɩneina jun jiro gi ḏuɽuṯ arno, nyi gwarre galakwe? nyi gwawəje ŋaɽe ŋinyi ŋun ŋiro ŋetɩḏo, gwəṯi, ḏa ŋɩmalaŋu ŋalnəji. 14na gwune na liji aŋu lun laṯape ŋɩru, naluməḏəṯe laginŋu nalarno, kweno gwiro gwun gwaɽenyeḏa ŋɩdi; ilele ilɽinye, na ŋɩdi ŋaro ŋage. 15naldi jɩneina gi ḏuɽo nalɽinye. na leno lar lai gwele gweḏi jɩneina eicico? 16gwila lulɽinye leno lun laṯape ŋɩru ŋeḏi jɩneina, na lulḏəḏə jɩneina lun liro kaja. na gwune naldiŋɩni nalarno, awe. 17nunŋalaḏe nuarno, ŋɩrṯa ŋiro ŋun ŋulinu dino,
gɩdol gun gɩdonyilo lun luṯo
ŋɩmaro lɽa leḏi gɩḏul?
18na gwun gwidi kɩdol elo keno gwake, namɩni gwun gwa gɩdol auṯaje muŋawa.
ŋuɽun ŋeḏi ṯulba ḏeḏi gesar
mṯ. 22:15-22, mks. 12:13-17
19na jalgaṯɩm na jɩsis jun jɩbuḏo nalbunyi gwalməṯo kaja kono, nalmɩni ḏonye liji; nallɩŋe nalarno ŋu gwuməḏəṯi ŋuɽuna lagin gwe ŋeno ŋun ŋɩlɩbo. 20na gwidɩmiḏilo nalwəje lɩwɩrɩgala lugwun lun laṯɩro gi jei ganu jeḏi liji lun liŋir, kani alməṯo ḏuməḏo ḏe ḏuŋun nalḏəḏə ḏakɩmiḏa ŋele ŋe ŋeḏi mudir. 21naluməḏɩjo galo naleicɩno, mualɩm gwəri, anilɩŋiḏi ŋa gwaṯumə ḏiḏuḏɩno ḏe ga naṯaŋalɩmiḏe, na gwate gwəmɩnyeno gwete kworo no, naṯɩlalɩmi ṯaṯ ḏe ḏeḏi elo ŋuɽun ŋe ŋun ŋiro gwerkwe. 22ŋiŋir animəḏɩjo gesarŋ ṯulba? a gwarno ḏanouwɩrico a? 23numɩni lɩŋe ḏirdəḏeico ḏagin nuleicɩno, 24aŋijɩnyil ruba. lɽa ləṯe liro na ŋwule? nalwɩrlijo ŋuɽuna naleicɩno, leḏi gesar. 25nuleicɩno, na ŋiro dino, ḏəḏɩl gesarŋ ŋɩdio ŋeḏi gesar, nyalmɩni ḏəḏə eloŋu ŋeḏi elo. 26nate naləṯi ŋɩma gwalməṯo ŋuɽun ŋe gi jei ganu jeḏi liji no; nalobaga ṯuṯ ŋuɽun ŋun ŋɩwɩrlijulɩlo nalje nyɩkwom.
ŋuɽun ŋeḏi diɽo gi ḏaiya
mṯ. 22:23-33, mks. 12:18-27
27nalwila lugwun kworo lun liro lisadugi lun laṯarno ḏidiɽo gi ḏaiya ḏate, nalɽoṯəḏɩjo ga, 28naleicɩno, mualɩm gwəri, musa gwulijije dino, ḏa megin gweḏi gwijiŋa mai, mawalane kwa gwuŋun gwate gwəṯi nyaɽe no, gwan megin ɽenyeḏe gwalgwilɩŋe nyaɽe jiri je jeḏi megin. 29na lijo kwoɽoṯəɽɩl lun liro ŋɩmaga. na gwun gwiro lɽa nuago gwa nuai nate nulɩŋe nyaɽe no. 30nan megin ɽenyeḏe nuaɽu nuai, nate nulɩŋe nyaɽe no. 31nuaɽu nunɽenyeḏe gwun gwiro nimɩro ṯəɽɩl, na ŋiro dino luŋa wei lun liro kwoɽoṯəɽɩl, nate nalilɩŋe nyaɽe no nalai ṯa. 32na gɩdo wɽi na gwa ai dino. 33kaja ge ḏidiɽo, gwa gwaro gwəṯe? gi gwune gwagalo luŋa wei kwoɽoṯəɽɩl. 34nal yecu wɩrlijo ŋuɽuna nuleicɩno, nyaɽe nyeḏi gɩḏilio keno nyaṯago na nyagini, 35namɩni lun liḏuɽəḏɩnu lɩdeleḏo lape kaja gun gila na ge ḏiḏiɽo ḏeḏi liji lun laiyo, late lanago na lanəgini no. 36na late ləṯi ŋɩma lai mɩna no, gi gwune liro gi liji leḏi kanyin, na liro nyaɽe nyeḏi elo, na liro nyaɽe nye ḏidiɽo. 37namɩni gwan ḏidiɽo ḏe liji lun laiyo naldiɽi, musa gwaŋinu kwaɽe gwune nuumə gwan gwele gwiro elo gweḏi ibraim, na elo gweḏi isak na elo gweḏi yagub. 38na elo gwate gwiro elo gweḏi liji lun laiyo no, numɩni ro elo gweḏi lun lɩmiḏo; gi gwune wei lun lijo lugwun lɩmiḏo. 39na jalgaṯɩm kworo wɩrlijo ŋuɽuna naleicɩno, mualɩm gwəri, ŋa gwuməḏi muma, 40late ləṯi ŋɩma gwaluməḏɩjo ŋuɽuna galo mɩna no.
kɩrisṯo gwiro ŋaɽe ŋeḏi ḏauuḏ a?
mṯ. 22:41-46, mks. 12:35-37
41nuleicɩno, galakwe naṯɩlarno kɩrisṯo gwiro ŋaɽe ŋeḏi ḏauuḏ? 42namɩni ḏauuḏ kwulo gwuŋun nuar kɩḏam geḏi delɩŋa ḏeḏi elo no,
gwele gwun gwiro elo gweico gwelɩnya gwi no,
jiga gi ḏi ḏinyi ḏun ḏiro ḏiŋir,
43kəbe nyilduji lun lɩkiḏiḏianyale gwiro gi gɩḏoɽ geḏi ŋwara
ŋwuŋa.
44na ŋiro dino na ḏauuḏ gwaṯɩleico gwele; na ŋiro ŋaɽe ŋuŋun galakwe?
yecu gwudɩminu liji ga gwan jalgaṯɩm
mṯ. 23:1-36, mks. 12:38-40, lk. 11:37-54
45na gi gwune diŋɩnu liji wei nueico calɩmis juŋun no, 46jil muma gi jalgaṯɩm jun jaṯəmɩnyi jawele alkani jiria jun jola, na ḏɩmɩɽəḏo gi cu, na jɩḏoɽ jun jiro ŋwuɽa gi lɩdunu leḏi elo na ŋalo ŋun ŋiŋirano kɩmuri. 47lun laṯenya la ŋɩdio ŋagin lun liro linino, naṯɩluməḏɩjo eloŋu gittən kani al liji aŋu; na leno lakɩmɩnene ḏakɩmino ḏɩbuṯano.
Jelenleg kiválasztva:
luka 20: OTR1966
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Nuba, Otoro New Testament
© British and Foreign Bible Society, 1966.