ዮሃንሳ 1
1
ደኦ ቃላ
1ቃላይ ኮይሮ ደኤስ። ቃላይካ ፆሳራ ደኤስ፤ ሄ ቃላይ ፆሳ። 2ኮይሮፐ ቃላይ ፆሳራ ደኤስ። 3ፆሳይ ኡባባ ቃላ ባጋራ መስ። መትዳባፐ እሶይካ እያ ባጋራ መቶናባይ ባዋ። 4እያን ደኦይ ደኤስ፤ ሄ ደኦይ አሳስ ፖኦ። 5ፖኦይ ማን ፖኤስ፤ ማይ ፖኡዋ ፆንቤና።
6ፆሳይ ኪትዳ፥ እስ ዮሃንሳ ጌተትያ አስ ደኤስ።#ማቶ 3:1፤ ማር 1:4፤ ሉቃ 3:1-2. 7አሳ ኡባይ ፖኡዋን አማናና መላ እ ፖኦስ ማርካ ግድድ ይስ። 8እ ፖኡዋባ ማርካታናዉ ይስፐ አትሽን፥ ባ ሁጰን ፖኦ ግደና። 9አሳ ኡባስ ፖእስያ ቱማ ፖኦይ አላምያ ዬስ።
10ቃላይ አላመን ደእስ። ፆሳይ ቃላን አላምያ መስ፥ ሽን አላመይ እያ ኤርቤና። 11እ ባ አሳኮ ይስ፥ ሽን እያ አሳይ እያ ኤክቦኮና። 12ሽን እ ባና ኤክዳይሳታስነ እያ ሱንን አማንዳይሳታስ ፆሳ ናይታ ግዳና መላ ማታ እሚስ። 13ኤንቲ ፆሳፈ የለትዶሶናፐ አትሽን፥ አስ የለትያ ዎጋን ዎይኮ አደ ሸነን ዎይኮ አሳ አሞን የለትቦኮና። ፆሳይ እ ኤንታ አዋ።
14ቃላይ አሰ ግድስ፤ አ ኬሀተነ ቱማ ኩምድ ኑ ግዶን ደእስ። እ አዋስ እስ ናኣ ግድድ ኤክዳ እያ ቦንቹዋ ኑኒ በእዳ።
15ዮሃንስ እያባ ማርካትስ። ባ ቃላ ቁ ኦድ፥ “ታኒ፥ ‘ታፐ ጉየራ የይስ ታፐ ካሰ ደእያ ግሾ ታፐ አስ’ ጋዳ ማርካትዳይስ ሀይሳ” ያግስ።
16ኑኒ ኡባይ እያ አ ኬሀተ ኩመፈ አንጆ ቦላ አንጆ ኤክዳ። 17ፆሳይ ህግያ ሙሰ ባጋራ እሚስ፥ ሽን አ ኬሀተይነ ቱማተይ የሱስ ክርስቶሳ ባጋራ ይስ። 18ፆሳ በእዳ አስ ኦንካ ባዋ፤ ባ አዋ ማታን ደእያ እስ ናኣ ፃላል ባዉ ፆሰ ግድዳይስ እያ ቆንጭስስ።
ፃማቅያ ዮሃንሳ ማርካተ
(ማቶ 3:1-12፤ ማር 1:1-8፤ ሉቃ 3:1-8)
19የሩሳላመን ደእያ አይሁደ ሀላቃት፥ ካህነታነ ሌወታ፥ “ኔኒ ኦኔ?” ግድ፥ ዮሃንሳ ኦይቻና መላ እያኮ ኪትን፥ ዮሃንስ ኤንታዉ ማርካትዳ ማርካተይ ሀይሳ።
20ዮሃንስ፥ “ታኒ ክርስቶሳ ግድከ” ያግድ፥ ጌሽድ ማርካትስፐ አትሽን፥ ካድቤና።
21ኤንቲ፥ “ያትን፥ ኔኒ ኦኔ? ኔኒ ኤልያሰዬ?” ያግድ ኦይችዶሶና።#ምልክ 4:5፤ ዛረ 18:15-18.
ዮሃንስ፥ “አካይ፥ ግድከ” ያግስ።
ቃስ ኤንቲ፥ “ኔኒ ያና ጌተትዳ ናብያዬ?” ያግድ ኦይችዶሶና።
ዮሃንስ፥ “አካይ” ግድ ዛርስ።
22ያትን፥ “ኔኒ ኦኔ? ኑኒ ኑና ኪትዳይሳታስ ኦዳና መላ ኔኒ ነና ኦና ጋይ?” ያግዶሶና።
23ዮሃንስ ዛሪድ፥ “ናብያ እሳያስ ግዳይሳዳ፥
“ ‘ጎዳ ኦግያ ሱርስተ!’
ግድ መላ ቢታን ዋስያ ኡራ ቃላይ ታና”
ያግስ።#እሳ 40:3.
24ቃስ ፋርሳወት ኪትዳ አሳት 25ዮሃንሳኮ፥ “ኔኒ ክርስቶሳ ዎይኮ ኤልያሳ ዎይኮ ናበ ግዶና እፅኮ፥ ያትን አይስ ፃማቃይ?” ግድ ኦይችዶሶና።
26ዮሃንስ ዛሪድ፥ “ታኒ ሃን ፃማቃይስ፥ ሽን ህንተ ኤሮና አስ ህንተ ግዶን ኤቅስ። 27እ ታፐ ጉየራ ዬስ። ታኒ ሀር አቶሽን እያ ጫማ ዎዶሩዋ ብላናዉ በስከ” ያግስ።
28ሄስ ኡባይ ዮርዳኖሰ ሻፋፐ ሄፍንን፥ ብታነ ካታማን፥ ዮሃንስ ፃማቅያ በሳን ሀንስ።
የሱሲ ፆሳ ዶርሰ
29ዮሃንስ ዎንተ ጋላስ የሱሲ ባኮ ይሽን በእድ፥ “አላምያ ናጋራ ቁችያ ፆሳ ዶርሳይ ሀይሳ! 30ታኒ፥ ‘ታፐ ጉየራ እስ አስ ያና። እ ታፐ ካሰ ደእያ ግሾ ታፐ አስ’ ጋዳ ኦድዳይስ ሀይሳ። 31እ ኦነኮ ታኒ ኤርከ። ሽን እስራኤለ አሳስ እያ ቆንጭሳናዉ ሃን ፃማቃሸ ያስ” ያግስ።
32ዮሃንስ ሀይሳዳ ያግድ ማርካትስ፦ “ጌሻ አያናይ ሳሎፐ ሆለዳ ዎሽንነ እያራ ደእሽን በአስ። 33ሄስ ሀናናፐ ካሰ ታኒ እያ ኤርከ። ሽን ሃን ፃማቃናዉ ታና ኪትዳ ፆሳይ፥ ‘ጌሻ አያናይ ዎድ እያራ ደእሽን ኔኒ በአናይስነ ጌሻ አያናን ፃማቃናይስ እያ’ ያግድ ታዉ ኦድስ። 34ታኒ ሄስ ሀንሽን በአዳ፥ እ ፆሳ ናኣ ግድዳይሳ ማርካታይስ” ያግስ።
ኮይሮ የሱሳ ታማረታ
35ቃስ ዎንተ ጋላስ ዮሃንስ ባ ታማረታፐ ናምአታራ እስፈ ኤቅስ። 36የሱሲ አሽን፥ ዮሃንስ በእድ፥ “ፆሳ ዶርሳይ ሀይስሽ!” ያግስ።
37ዮሃንሳ ናምኡ ታማረት ዮሃንስ ገይሳ ስእድ የሱሳ ካልዶሶና። 38የሱሲ ባና ካለይሳታ ጉየ ስም በእድ፥ “አይ ኮዬቲ?” ያግድ ኦይችስ።
ኤንቲ ዛሪድ፥ “አስታማርያዉ፥ ኔኒ አዉን ደአይ?” ያግዶሶና።
39የሱሲ ኤንታኮ፥ “ሃ ይድ በእተ” ያግስ። ኤንቲ ብድ እ ደእያሱዋ በእዶሶና። ሄ ጋላስ ሳእ ታሙ ሳተ ሄራ ግድያ ግሾ እያ ማታን ፔእዶሶና።
40ዮሃንስ ግዳይሳ ስእድ፥ የሱሳ ካልዳ ናምኡ ታማረታፐ እሶይ፥ ስሞን ጰፅሮሳ እሻ እንድርያሳ። 41እንድርያስ ኮይሮ ባ እሻ ስሞናራ ጋሄትድ፥ “ኑኒ ክርስቶሳ ደምዳ” ያግስ። 42እንድርያስ ስሞና የሱሳኮ ኤህስ።
የሱሲ ስሞና በእድ፥ “ኔኒ ዮና ናኣ ስሞና፤ ነ ሱንይ ኬፋ#1:42 ኬፋ፦ ግያ ቃላይ አራምከ ዶና ግድሽን፥ ግርከ ዶናን ብርሸይ ጰፅሮሳ ዎይኮ ዛላ ጉሱ። ግድ ፄገታና” ያግስ።
ፍልጶሳነ ናትናኤላ ፄገተ
43ዎንተ ጋላስ የሱሲ ጋልላ ቢታ ባናዉ ቆፋ ቃችስ። እ ፍልጶሳራ ጋሄትድ፥ “ታና ካላ!” ያግስ። 44ፍልጶስ፥ እንድርያስነ ጰፅሮስ ደእዳ ቤተሳይዳ ካታማፐ ይዳ አሰ።
45ፍልጶስ ናትናኤላራ ጋሄትድ፥ “ሙሰይ ህገ ማፃፋን፥ ቃስ ናበትካ እያባ ፃፍዳ ዮሰፋ ናኣ ናዝረተ የሱሳ ኑኒ ደምዳ” ያግስ።
46ናትናኤል ዛሪድ፥ “ናዝረተ ካታማፐ ሎኦባይ ከያናዉ ዳንዳኢ?” ያግስ።
ፍልጶስ፥ “ያዳ በአ” ያግስ።
47ናትናኤል ባኮ የይሳ የሱሲ በእድ፥ “ገነይ ባይና ቱማ እስራኤለ አስ ሀይሳ!” ያግስ።
48ናትናኤል የሱሳኮ፥ “ኔኒ ታና አዉን ኤራይ?” ያግስ።
የሱሲ ዛሪድ፥ “ፍልጶስ ነና ፄጋናፐ ስን፥ ኔኒ ባላሰ ም ጋርሳን ደእሽን ታኒ ነና በአስ” ያግስ።
49ናትናኤል ዛሪድ፥ “አስታማርያዉ፥ ኔኒ ፆሳ ናኣ! ኔኒ እስራኤለ ካዎ!” ያግስ።
50የሱሲ እያኮ፥ “ታኒ ነና ባላሰ ም ጋርሳን በአስ ግዳ ግሾ አማናይ? ኔኒ ሀይሳፈ አያባ በአና!” ያግስ። 51ቃስ የሱሲ፥ “ታኒ ህንተዉ ቱማ ኦዳይስ፤ ሳሎይ ዶየትን፥ ፆሳ ኪታንቾት አሳ ናኣ ቦላ ከይሽንነ ዎሽን ህንተ በአና” ያግስ።#መ 28:12.
Jelenleg kiválasztva:
ዮሃንሳ 1: GFBEVF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
The Word for the World International and The Word for the World Ethiopia