Genesis 37
37
Si Jose
37:2-35
2Siya na nan istolyan nan pamilyan Jacob. Idi simpoo ya pito nan tew-en Jose ay anakna dat maikawkawit isnan bebsatna ay an-ak da Bilha ken Zilpa et banbantayanda nan kalnilo ya kaldingda. Ngem ibagbagan Jose ken amana nan ngawi ay ik-ikkan nan bebsatna. 3Si Jose nan laylayden Jacob isnan am-in ay an-akna tay sokod naam-ama siya sapay maiyanak isonga inagtana is gawigawis ay bado ay an-ando nan payakna. 4Idi inilan nan bebsatna ay laylayden amada si Jose mo daida dadat mamaslat ken siya et ngawi nan ikkanda ay menkali ken siya.
5Isnan namingsan wada nan iitaw Jose et idi inbagana isnan bebsatna dadat am-amed mamaslat ken siya. 6Siya na nan kinwanina, “Dengngenyo pod nan iniitawko. 7Wada tako kano am-in isnan payew ay menbedbedbed is pagey dat matood nan binedbedko dat likoben nan binedbedyo et menyodongda ken siya.” 8Dadat mamaslat ay mangwani, “Ay kanam en esakami men-apo sik-a?” Isonga am-amedda kaseselat siya gapo isnan iitawna ya nan kinwanina maipanggep isnan iitawna. 9Dat wada kasin nan iitaw Jose. Danat ibaga isnan bebsatna, “Wada nan iitawko kasin ay inilak kano nan agew, bowan, ya nan simpoo ya esa ay talaw ay ninpalintomeng ken sak-en.” 10Inbagana gedan ken amana nan iitawna dat islat amana ay mangwani, “Ngan di kaneg tosa is iitaw? Ay kanam en si inam, sak-en ya nan bebsatmo et esakami menpalintomeng ken sik-a?” 11Nan bebsat Jose et mamaslatda ken siya ngem si amana et nemnemnemena no ngan nan kayat ay kanan nan iitawna.
12Isnan esay agew ay wada nan bebsat Jose id Sikem ay mangipaspastol isnan kalniloda 13-14dat kanan amada ken Jose, “Kadya, omeyka id Sikem ay menpaspastolan nan bebsatmo isnan kalnilo ta ilaem no gawisda dakat somagong ta ibagam.” Dat kanan Jose en laydena isonga dat palobwaten amana siya isnan ilida ay Hebron et omey id Sikem.
Idi inomdan si Jose id Sikem 15dat aped menliwliwes isnan papastolan. Dat ilaen nan esay lalaki siya danat sooten, “Ay sino nan an-anapem?” 16Dat kanan Jose, “An-anapek nan bebsatko ay mangipaspastol isnan kalnilo isna. Ay waday inil-ilam ken daida?” 17Dat kanan nan lalaki, “Kinmaanda isna. Dinngek ay kinwanida en omeyda id Dotan.” Isonga dat onoden Jose daida id Dotan.
18Ngem idi inilada siya ay om-omey isnan kad-anda dadat mentotolag en pateyenda siya. 19Nin-asikwanida, “Naay omali nan mangibagbaga is iitawna. 20Pateyen tako datakot ibkas isnan bobon ay maid danom. Datakot kanan ken ama en pinatey di atap ay animal ta ilan tako kad no ngan nan menbalinan nan iitawna.” 21Ngem si Ruben ay iyon-ada et adina layden ay matey si Jose isonga kinwanina, “Adi tako patpateyen siya 22nodi basta ibkas tako isnan bobon ay maid danom isnan pondag et awnit kigad ay matey.” Kinwanina di tay kanana en esana omey padakaen ta pasagongena ken amada.
23Idi inomdan si Jose isnan kad-anda dadat kaanen nan badona ay gawigawis ay an-ando nan payakna 24et omeyda ibkas isnan bobon ay maid danom. Dat komaan si Ruben dapay itokdon nan bebsatna et manganda.
25Idi mangmanganda dadat ilaen nan mabob-oweg ay ap-on Ismael. Nan kamelioda et nin-aawitda is ag-agas ay linakowanda id Gilead ay omeyda ilako id Egipto. 26Dat kanan Juda isnan bebsatna, “Ay ngan di alaen tako no aped tako pateyen nan besat tako datakot kanan en waday nangpatey? 27Ilako tako bawet isnan naayda ay ap-on Ismael et adi masapol ay pateyen tako. Tay olay no pateyen tako et besat tako kayet siya.” Inyoog nan bebsatna 28et idi lomaos san aap-on Ismael ay menlaklako ya men-ilako dat padakaen nan bebsat Jose siya isnan bobon et ilakoda siya is dowampoo ay pilak.#37:28 Waay 250 gramos san pilak. San nanglako et inyeyda si Jose id Egipto.
29Si Ruben ay maiwed issan linmaosan san nanglako ken Jose et sinmagong issan bobon ay mang-ayag koma ken Jose dat maiwed obpay si Jose isdi. Danat singaten nan badona gapo isnan seg-angna. 30Dat omey issan bebsatna et kanana, “Maiwed si Jose isdi! Ay ngan ngen nan ikkak?”
31Ngem dat pomatey san bebsatna is kalding et ippeyda nan basana issan badon Jose. 32Dadat eyey ken amada san bado et kananda, “Dinatnganmi na isnan pagpastolan. Ay badon Jose na?” 33Naimatonan amada ay dagos danat kanan, “Owen, siya sa san badona! Ay apo, pinatey di atap ay animal nan anakko ay si Jose et waay inisdada!” 34Danat singaten nan badona gapo isnan seg-angna. Dat menbado is sako ta ilemetna tay siya di nan ogalida. Nabayag ay menseseseg-ang gapo isnan anakna. 35Am-in nan an-akna ay lalalaki ya bababai et liwliwaliwenda siya ngem adi kayet kaliwaliw. Danat kanan, “Ilemetko nan anakko engganay mateyak.”
Արդեն Ընտրված.
Genesis 37: xnn
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.