GÉNESIS 1
1
Tucui ima tiyajta Taita Dios rurashcami
1Jahua pachata, cai pachata callarichijca Taita Diosmi. 2Cai pachaca imaman mana rijchaj, imapish illaj, yacuhuan junda amsallami carca. Taita Diospaj Espirituca yacu jahuapimi cuyuricurca.
3Chaitami Taita Diosca: “Achijlla tucuchun” nijpi, achijlla tucurca. 4Achijllataca alli cashcata ricushpami, Taita Diosca achijllataca amsamanta ch'icanyachun nirca. 5Achijllataca “Punllatami” shutichirca. Amsataca “Tutatami” shutichirca. Punllandij tutandijmi shuj punlla tucurca. Chashnami callari punllaca saquirirca.
6Chai q'uipaca Taita Diosca: “Yacucunata ucuman, jahuaman ch'icanchij huaira tiyachun” nircami. 7Ch'icanyachichun churashpaca Taita Diosca chaupi yacutaca cai pachapi, chaupi yacutaca ch'icanyachij huaira jahuapimi churarca. Chaica chashnami saquirirca. 8Taita Diosca chai ch'icanchij huairataca “Jahua Pachatami” shutichirca. Punllandij tutandijmi shuj punlla tucurca. Chashnami ishqui punllapica saquirirca.
9Taita Diosca: “Chaquishca allpa tiyachun. Cai pachapi tiyaj yacucunaca shujllaman tandanacuchun” nircapishmi. Chashnami saquirirca. 10Maillapi chaquishca cajtaca “Allpatami” shutichirca, yacucuna tandanacushcataca “Mama Cuchatami” shutichirca. Taita Diosca tucuitami alli cashcata ricurca.
11Chai q'uipaca Taita Diosca: “Allpamantaca verdijlla q'uihuapish, muyuta cuj q'uihuapish, granota p'ucuj tucui laya yuracunapish huiñachun. P'ucunatapish paicuna imata p'ucuna cashca shinallataj p'ucuchun, muyupish chaillamantataj llujshichun” nircami. Chaica chashnami saquirirca. 12Allpamantaca tucui laya q'uihuacunami huiñarca. Chaicunaca paicuna imata p'ucuna cashca shinallatajmi muyucunayuj granocunata p'ucurca. Yuracunapish huiñarcami. Chaicunapish paicuna imata p'ucuna cashca shinallatajmi muyuta charij micunacunata p'ucurca. Taita Diosca tucuitami alli cashcata ricurca. 13Punllandij tutandijmi shuj punlla tucurca. Chashnami quimsa punllapica saquirirca.
14Chai q'uipaca Taita Diosca cashnami nirca: “Jahua pachamanta achijyachishpa punllatapish, tutatapish ch'icanchij tiyachun. Chaicunaca ima quillacuna, ima punllacuna, ima huatacuna cashcatapish ricuchijcuna cachun. 15Chaicunaca jahua pachamanta cai pachata achijyachijcuna cachun” nircami. Chaica chashnami saquirirca. 16Taita Diosca ishqui jatun achijyachijcunatami rurarca. Jatun achijyachijtaca punllata achijyachichun. Uchilla achijyachijtaca tutata achijyachichunmi rurarca. Luzerocunatapish rurarcami. 17Taita Diosca chai achijyachijcunataca allpa pachata achijyachichun jahua pachapimi churarca. 18Punllatapish, tutatapish achijyachishpa, achijtaca amsamanta ch'icanyachichunmi churarca. Taita Diosca tucuitami alli cashcata ricurca. 19Punllandij tutandijmi shuj punlla tucurca. Chashnami chuscu punllapica saquirirca.
20Taita Diosca: “Yacupi causai tucuipaj tucui laya animalcuna, huairata purij alasyuj tucui laya animalcuna tiyachun” nircami. 21Taita Diosca yacupi causai tucuipaj tucui laya jatun animalcunatapish, tucui laya uchilla animalcunatapish paicuna ima shina cana cashca shinallatatajmi rurarca. Huairapi purij tucui laya animalcunatapish paicuna ima shina cana cashca shinallatatajmi rurarca. Taita Diosca tucuitami alli cashcata ricurca. 22Taita Diosca chai animalcunata alli cashca cachun nishpaca: “Huahuacunayuj tucushpa, achcata mirarishpa mama cuchapi jundarichij” nircami. 23Punllandij tutandijmi shuj punlla tucurca. Chashnami pichca punllapica saquirirca.
24Chai q'uipaca Taita Diosca: “Allpapica tucui laya animalcuna paicuna ima shina cana shinallataj tiyachun. Charina animalcunapish, llucashpa purij animalcunapish, sacha animalcunapish tiyachun” nircami.
Chaica chashnami saquirirca. 25Taita Diosca sacha animalcunatapish paicuna ima shina cana shinallatataj, charina animalcunatapish paicuna ima shina cana shinallatataj, llucashpa purij animalcunatapish paicuna ima shina cana shinallatatajmi rurarca. Taita Diosca tucuitami alli cashcata ricurca.
26Chai q'uipami Taita Diosca: “Cunanca yacupi causaj animalcunatapish, huairapi purij alasyuj animalcunatapish, charina animalcunatapish, sachapi causaj animalcunatapish mandachunca ñucanchijman rijchaj, ñucanchijtajlla runata rurashun” nirca.
27Taita Diosca paiman rijchaj runatami rurarca.
Taita Diosca c'aritapish huarmitapish paiman rijchajtami rurarca.
28Taita Diosca paicunata alli cashca cachun nishpaca: “Huahuacunayuj tucushpa, alli huiñachishpa achcata mirarishpa cai pachapi jundarishpa cai pachata mandanguichij. Yacupi causaj animalcunatapish, huairapi purij alasyuj animalcunatapish, allpapi purij tucui animalcunatapish cancuna mandanguichij” nircami.
29Chai q'uipami Taita Diosca: “Riquichij, cancunamanca allpapi huiñashpa p'ucujmantaca muyuyashpa p'ucuj tucui laya granocunatapish, yurapi p'ucuj tucui laya granocunatapishmi cuni. Tucui chaicunatami micui tucunguichij.
30Sacha animalcunamanpish, huairata purij alasyuj animalcunamanpish, llucashpa purij animalcunamanpish paicuna micuchunca verdijlla tucui laya q'uihuacunatami cuni” nircami. Chaica chashnami saquirirca. 31Taita Diosca pai rurashca tucui chaicunaca yallitaj sumaj alli cashcatami ricurca. Punllandij tutandijmi shuj punlla tucurca. Sujta punllapica chashnami saquirirca.
Արդեն Ընտրված.
GÉNESIS 1: QCHI04
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Quichua Chimborazo Bible Revision 2010 © United Bible Societies, 2010.