चेलै रै कम 12
12
पतरसा री जेला थऊँ मुक्ति
1तैस टैमैं राजा हेरोदेस कलीसिया रै कुछ मणु जो सताऊ अतै जेला मन्ज पाई दिता। 2तिनी प्रेरित यूहन्ना रै भाई याकूब जो तलवार सितै मरवाई दिता। 3जैहणै तिनी हेरू कि यहूदी मणु ऐत थऊँ खुश भूचु करदै हिन, ता तिनी पतरस जो पकड़ी लैऊ। सो अखमीरी रोटी रै दिन थियै। 4हेरोदेसै तैसिओ पकड़ी करी जेला मन्ज बन्द करी दिता, अतै चऊर-चऊर सपाई जो चौं पैहरै मन्ज रखू; ऐह सोची करी कि फसह रै त्यौहार थऊँ बाद तैसिओ मणु रै सामणै लैईआ।
5पतरस जेला मन्ज बन्द थू; पर कलीसिया तैस तांयें पूरै दिला सोगी प्रमात्मैं सितै प्रार्थना करू करदी थी।
6जैहणै हेरोदेस तैसिओ मणु रै सामणै लैईणै जो थू, तैहा ही राती पतरस दूँ जंजीरा सितै बनुरा दूँ सपाई रै मन्जै सोऊ करदा थू; अतै पैहरैदार द्धारा पुर जेला री रखवाली करू करदै थियै। 7ता अचानक, प्रभु रा अक्क स्वर्गदूत ईच्ची खडू अतै तैसा कोठरी मन्ज लौ चमकी, अतै तिनी पतरसा री पसली पुर हत्थ मारी के तैसिओ जगाऊ अतै बल्लू, “उठ, झट कर।” अतै तसेरै हत्था थऊँ जंजीरा खुलीकरी पैई गई।
8ता स्वर्गदूतै तैस सोगी बल्लू, “कमर कस, अतै अपणै जुटै पा।” तिनी तियां ही करू। फिरी तिनी तैस सोगी बल्लू, “अपणा चोळा लाई करी मेरै पिचो चली पै।” 9पतरस निकळी करी तसेरै पिचो चली पैऊ; पर ऐह ना जाणदा थू कि जैडा कुछ स्वर्गदूत करू करदा ऐह सच हा, बल्कि ऐह सोचु कि अऊँ सुपना हेरू करदा। 10ता सो पैहलै अतै दूये पैहरै थऊँ नकैई करी तैस लोहे रै फाटका बलै पुजै, जैडा नगरा री कनारी थू। सो तियां तांयें अपणै आप खुली गो, अतै सो निकळी करी अक्क गळी मितै चली गै, अतै तैहणै ही स्वर्गदूत तैसिओ छड़ी करी चली गो।
11ता पतरस होश मन्ज आ अतै बल्लू, “अबै मैंई सच जाणी लैऊआ कि प्रभुऐ अपणा स्वर्गदूत भैजी करी मिन्जो हेरोदेस रै हत्था थऊँ छुड़ाई लैऊआ, अतै यहूदी अगुवै री सब उम्मीद त्रोड़ी दिती हिन।”
12ऐह जाणी करी सो तैस यूहन्ना री माता मरियम रै घरा जो गो, जैसिओ मरकुस भी बलदै थियै। तैड़ी मणु इकट्ठै भूच्ची करी प्रार्थना करू करदै थियै। 13जैहणै तिनी दारा री खिड़की खटखटाई, ता रूंदै नां री अक्क दासी हेरना आई। 14अतै पतरसा री आवाज जो पछैणी करी तैसै खुशी सितै दरवाजा ना खोलू पर दौड़ी करी अन्दर गई, अतै सबी सोगी वलु की पतरस दारा पुर खडूरा।
15तिन्यै तैसा सोगी बल्लू, “तू पागल हा।” पर सो पक्का करीके बलणा लगी कि पतरस ही हा। ता तिन्यै बल्लू, “तसेरा स्वर्गदूत भूणा।”
16पर पतरस खटखटान्दा रैऊ ता तिन्यै खिड़की खोली, अतै तैसिओ हेरी करी हैरान रैई गै। 17ता तिनी तियां जो सिनक लाई कि चुप रैहन; अतै तियां जो दस्सु कि प्रभु कस तरीकै सितै तैसिओ जेला थऊँ कड़ी लेई आ। फिरी बल्लू, “याकूब अतै मसीह पिचो चलनै बाळै विस्वासी जो ऐह गल्ल दस्सी दिन्यै।” ता सो निकळी करी दूई जगह जो चली गो।
18भ्यागा सपाई मन्ज बड़ी हलचल मची गई कि पतरस करा गो। 19जैहणै हेरोदेसै तसेरी तोप पाई अतै सो ना मुळु, ता पैहरैदारै री जाँच करी अतै हूक्म दिता कि सो मारी दितै गान; अतै सो यहूदिया जो छड़ी करी कैसरिया मन्ज रैहणा लगु।
हेरोदेस री मौत
20हेरोदेस सूर अतै सैदा शहर रै मणु थऊँ बड़ा नाखुश थू। ठेरैतांये सूर अतै सैदा शहरा रै प्रमुख मणु अक्क मन भूच्ची करी तैस वलै आये, अतै बलास्तुस जो जैडा राजा रा अक्क कर्मचारी थू, मनाई करी मेल कराणा चाहन्दा थू; क्ओकि राजा रै देशा थऊँ तिआंरै देशा रा पालन पोषण भुन्दा थू।#1 राजा 5:11; यहे. 27:17.
21ठहराऊरै दिन हेरोदेस राजवस्त्र पैहनी करी सिंहासन पुर बैहु, अतै तियां जो व्याख्यान दिणा लगु। 22ता मणु बक्की नकैऐ, “ऐह ता मणु रा ना पर प्रमात्मैं रा बोल हा।” 23तैस ही टैमैं प्रभु रै अक्की स्वर्गदूतै तैसिओ मारी दिता, क्ओकि तिनी प्रमात्मैं जो महिमा ना करी; अतै तैसिओ कीड़ै पै अतै सो मरी गो।#दानि. 5:20.
24पर प्रमात्मैं रा बचन बड़दा अतै फैलदा गो।
25जैहणै बरनबास अतै शाऊल अपणी सेवा पूरी करी बैहै ता यूहन्ना#12:25 यूहन्ना ऐह यूहन्ना बपतिस्मा दिणै बाळा यूहन्ना निय्आ ऐस यूहन्ना रा पुरा नां यूहन्ना मरकुस थू। जो जैडा मरकुस कहलान्दा थू सोगी लेई करी यरूशलेम जो फिरी आये।
Արդեն Ընտրված.
चेलै रै कम 12: GBKNT
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
This work is licensed under Creative Commons Attribution-ShareAlike 4.0 License.