Za 12
12
Maali wadukulë yaafë mu maalu më Yeesu
(Mat 26.6-13; Mak 14.3-9)
1Bilumbu bi samunu ntetë n'saangu Paakë kuvangënë, Yeesu wuyendë ku bwaalë bu Betani#12.1 Mak 11.1., ko kulëkalilaangë Lazaalë, wo wabë kuvulumunë mu bo bëfwa. 2Faawu, bën'vaanë bilya ke Malëtë. Lazaalë yivaandi wabë fë meesë yimunë Yeesu. 3Maali wuboongë cibulikë ci yaafë bukaalu bëvangilë mu naalë#12.3 Lik 7. 37-38. . Naandi wudukulë mu maalu më Yeesu i wufyoonë mu mileenjyaandi. N'zo yooso yisë waalë yi fiimbu yi yaafë. 4Cilaanzi cimweekë ci Yeesu, Zuda Iskalyootë — awu wukanë kusumbisi Yeesu — wusë tubë : 5« Cibilë-mbici twakaambu kusumbisilë yaafë be yooyo mu luvunu lu nkamë-tatu lu binkongulu bi mboongo#12.5 binkongulu bi mboongo: 6.37., mu kuvaanë ke biyeembye? » 6Naandi wulëtubilaangë obo yaaku ti mu cyaali ci biyeembi, kasi cibilë naandi wabë mwiifi : naandi wulëkwiibaangë mu kasu mboongu yo kulësweekaangë. 7Kasi Yeesu wusë tubë : « M'biici n'sikë! Naandi wasiilë boobo mu cibilë ci cilumbu cyo bëkun'tuulë mu libuumbë. 8Biyeembi bëm'ba yiinu ntaangu syooso#12.8 Det 15.11., kasi miinu yisë be ba yiinu ntaangu syakë syooso ko. »
Fuundu bavangilë Lazaalë
9Nkoongë baatu yi Sizwiifë bëyuwu ti Yeesu wabë ku bwaalë bu Betani. Baawu bëyeendë yakë tokë mu kumonë Yeesu, kasi yivaandi Lazaalë, wunë Yeesu wuvulumunë mu bëfwa. 10Bëkuluutu bë singangë-Nzaambi bëvaangë fuundu mu kuvoondë yivaandi Lazaalë, 11cibilë mpaapë Sizwiifë bëlëbotukaangë mu nkoongaawu mu cibilë cyaandi i bëlëtelaangë maanë mu Yeesu.
Yeesu wakun'kotë ku Yelusaleemë
(Mat 21.1-11; Mak 11.1-11; Lik 19.28-40)
12Cilumbu cilandëkënë, nkoongë baatu yiyisë ku n'saangu Paakë bëyuwu ti Yeesu wulë kwiisë ku Yelusaleemë. 13Bakë booso bëboongë sinjeenvu si mëba i bëbasikë ku livulë mu kwe n'dyengënë. Baawu bëlëlosukaangë : « Bumpumu ke Nzaambi! Biikë Nzaambi wusakumunë wunë wun'kwisilë mu lizinë li Fumu! Biikë Nzaambi wusakumunë n'tinu wu Islayeelë#12.13 Twi 118.25-26; Mat 21.9.! » 14Yeesu wusë zakënë buulu i wusë kalë fë yilwaandi, bunë mësonëminë :
15« Keelë wulë ba yi boomë, livulë li Siyoonë!
N'tinwaaku wulë mu n'kwiisë,
wukalë fë yilu mwaanë buulu#12.15 Zkl 9.9. . »
16Bilaanzi bësye bakulë ko manë mëlëvyookaangë, kasi, bunë Yeesu kuzanjiku mu bumpumu, baawu bisë tebukë moonyi bunë mësoniminë mu cibilë cyaandi i baawu bëvaangë maawu mu naandi.
17Bakë booso babë yi Yeesu faanë kutelilë Lazaalë mu libuumbë mu kun'vulumunë bëlë ke tubilaangë mu manë bëmonë. 18Mati bwaawu, nkoongë baatu bëyisilë mu kun'dyengënë. Baatu bëyuwu ti naandi wuvaangë ciliimbu ci kwaatë-yekë. 19Sifalisyaanu bisë tubësënë baveekë yi baveekë : « Lulë mu kumonë ti beeno lusë m'podi ko. Bakë booso bëlë mu kun'laandë! »
Mwa singeleekë silë mu kutoombë Yeesu
20Mwa singeleekë syabë yimunë bo bëyisë mu kukuundë Nzaambi mu n'saangu ku Yelusaleemë. 21Baawu bisë belëmë fo fabë Filiipë, awu wabë mungë Betesayiidë ku Ngalilee, i keti bën'kaambë : « A Fumu, beeso tuvwiili n'ciinzë mu kumonë Yeesu. » 22Filiipë wabë wukaambë Andëlee, i babë bwaali bëyeendë mu ke kaambë Yeesu. 23Yeesu wusë bëvutulilë : « Zoolë yafwaanë yinë Mwaanë Muutu wufwenikini kuzanjiku mu bumpumu. 24Licyelikë, licyelikë yilukaambë, ningë lungeenzë lu looso lusye bwa fë n'toto ko i kufwa, lwaawu lun'kalilë lumweekë. Kasi ningë lube fwa, lwaawu lun'vaanë mpaapë singeenzë. 25Wunë wuzolisi luziingu lwaandi, wulënyambikini, kasi wunë wum'maangë kukangëmë mu buloongo be buubu, naandi wululuundë mu luziingu lu sakë yi sakë#12.25 Mat 10.39; 16.25; Mak 8.35; Lik 9.24.. 26Wunë wuzolisi kun'salilë, naandi wufwenikini kun'daandë, boobo cisasi cyaami cim'ba fo miinu yikeeli. Tataami wun'tuunvi wunë wukun'salilë. »
Yeesu watubilë mu lufwa lwaandi
27« Buyifanwabu, n'timaami wacyenzëkënë. Miinu buni yin'tubilë? Miinu yin'tubë : Ata, m'puuci mu zoolë be yiiyi yi simpasye? Cibilë ti zoolë be yiiyi yaawu miinu yiyisilë. 28Ata, vaanë bumpumu mu nkuumbwaaku! » Mbeembu yisë tendukë ku yilu : « Miinu yin'dumisi i miinu yikun'dumisyooso. » 29Nkoongë baatu yabë faawu yiyuwu mbeembu yitubë : « Lyaawu olyo lyabë liteendë li civelë! » Bëmesë bëlëtubaangë : « Yaanzi yan'kaambë! » 30Kasi Yeesu wusë bëkaambë : « Yaaku ti mu cibilë cyaami miinu mbeembu be yooyo yakuwukënë, kasi mu beeno. 31Mati bwaawu, ntaangu beenë yafwaanë yo bën'fundisi buloongo be buubu, fumu buloongo be buubu bëkun'laakë ku ngaandë. 32I miinu, fanë bëkun'zanjikë ku yilu#12.32 Kuzanjiku mu buloongo yin'tubilë mu sinteku wali, bo tum'mweenë mu Za (3.3,8), yin'leesi yivaandi luzanjiku lu Yeesu fë kuluusu i luzanjiku lwaandi ku bumpumu (v. 33; 3.14-15; 8.28)., yin'titë baatu bakë booso ke miinu. » 33Yeesu wulëtubilë obo, mu kuleesi mpilë mbici n'fwiilu yo kun'fwiilë. 34Nkoongë baatu yisë n'vutulilë : « Beeso tuyuwu mu libuuku li nkaakë ti Kliistu wun'ziingë sakë yi sakë#12.34 Twi 110.4; Ezy 9.6; Dan 7.14. . Buni njeeyi podi kutukaambë ti Mwaanë Muutu fwenikini kun'zanjikë? Mwaanë Muutu beenë nanye? » 35Yeesu wusë bëkaambë : « Cyeseesë citinyooso fë meeyiinu, kasi mu mwa ntaangu kwaandi too. Lyataanu fo lucili yi cyeseesë mu kumaangë beeno kuzimbukulë citoombi, cibilë muutu wun'lyataangë ku citoombi, wusye zaabë ko kuni kulë mu kweendë. 36Teelaanu maanë mu cyeseesë abu cicili yiinu, bwiinji beeno luba baatu bë cyeseesë. »
Sizwiifë bësye ta maanë ko mu Yeesu
Bunë kwamani kutubilë obo, Yeesu wusë ke yendaangë i wusë ke swaamë cinaanu yi baawu. 37Yeesu wuvaangë mpaapë biliimbu bi kwaatë-yekë fë ntwaalaawu, kasi baawu bësye n'teelë manë kuve. 38Boobo bwaawu bëvangininë manë mëtubë m'bici Ezayi :
« A Fumu, nani wata maanë mu libuungu liitwe?
Ke nani Fumu kuleesi bunenë bwaandi#12.38 Ezy 53.1. ? »
39Ezayi wutubë yivaandi cibilë-mbici baatu obo bëkaambu kuta maanë :
40« Nzaambi wubëvoondë meeso,
naandi wubëvaangë mitimë ngolo,
bwiinji meeso maawu mëleembu kumonë,
mitimaawu yileembu kubakulë,
i baawu kupodi ve kubalukë ke miinu
bwiinji yibëbelusi#12.40 Ezy 6.9-10. . »
41Ezayi wutubilë obo cibilë naandi wumonë bumpumu bu Yeesu i keti wulëtubilaangë mu naandi.
42Mu kumonë, fë meeyi bëkuluutu bë Sizwiifë baveekë, mpaapë bëta maanë mu Yeesu. Kasi mu cibilë ci Sifalisyaanu, baawu bësye tubilaangë kuve fë ciyalëlë, mu kumaangë kukulu mu cizutununu#12.42 9.22.. 43Baawu bëlëzolaangë kutuun'vi ke baatu yaaku ti ke Nzaambi.
Lufundusu mu libuungu li Yeesu
44Yeesu wutubë yi nkasu : « Wunë wun'ta maanë mu miinu, cyelikë yakë tokë mu miinu kun'teelë maanë kasi mu wunë wukun'filë. 45Wunë wakum'monë naandi wam'monë wunë wakun'filë. 46Miinu yiyisë mu buloongo dedë mweekë cyeseesë, bwiinji wosuku wukun'teelë maanë wuleembu kukalë ku citoombi. 47Ningë muutu be kuwu mëbuungu maami i naandi kum'maangë kumësalilë, miinu kuve yikun'vaanë lutabu, cibilë miinu yiyisilë mu kuvuuci mboongë baatu, yaaku ti mu kubëvaanë lutabu. 48Wunë wukun'yekulë i wum'maangë kuwu mëbuungu maami, naandyoowo wum'bakë lutabu: mati libuungu lyo miinu yin'vaanë, lyaawu li kun'vaanë lutabu mu cilumbu ci siitu. 49Licyelikë, miinu yisye tubilë mu n'vwiilwaami miveekë ko, kasi Taatë wukun'filë, naandi wukun'kaambë naveekë manë yifwenikini kutubë i kuloongë. 50Miinu yizabisi: manë kun'tubaangë mën'vaanaangë luziingu lu sakë yi sakë. Faawoofo manë yin'tubaangë, yin'tubilaangë maawu dedë mweekë bo Taatë wukun'kambilë. »
Արդեն Ընտրված.
Za 12: NTVIL
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2019, Wycliffe Bible Translators, Inc. and © Alliance Biblique du Congo. All rights reserved.