यूहन्ना 17
17
महायाजक के रूप माहीं यीसु के प्राथना खुद के खातिर
1यीसु ईं बातन काहीं कहे के बाद, अकास कइती निहारिके कहिन, “हे पिता परमातिमा अपना के चुना समय आइगा हय, अब अपना मनइन काहीं देखाय देई, कि अपना के लड़िका केतना महान हय, जउने हमहूँ मनइन काहीं देखाय देई, कि अपना केतना महान हएन। 2काहेकि अपना उनहीं सगले जाति के मनइन के ऊपर अधिकार दिहेन हँय, कि जिनहीं अपना उनहीं चुनिके दिहेन हँय, ऊँ सगलेन काहीं अनन्त जीबन देंय। 3अउर अनन्त जीबन इआ आय, कि ऊँ पंचे अपना काहीं जउन एकलउते परमातिमा आहेन, अउर यीसु मसीह काहीं जिनहीं अपना पठयन हँय, जानँय। 4जउन काम अपना हमहीं करँइ के खातिर दिहेन रहा हय, उनहीं पूर कइके, हम धरती के ऊपर मनइन काहीं देखाय दिहेन हय, कि अपना केतना महान हएन। 5अउर अब, हे पिता परमातिमा, संसार के रचना होंइ से पहिले, जब हम अपना के साथ रहेन हय, तब हमहीं केतना सम्मान मिलत रहा हय, अब जब हम अपना के साथ रहब उहय सम्मान हमहीं पुनि देई।
अपने चेलन के खातिर प्राथना
6संसार के मनइन म से जउने मनइन काहीं अपना हमहीं दिहेन हय, हम उनहीं अपना के बारे माहीं बताय दिहेन हय: ऊँ पंचे अपना के साथ रहे हँय, पय अपना उनहीं हमहीं दिहेन हय, अउर ऊँ पंचे अपना के बचन काहीं अपनाय लिहिन हीं। 7अब ऊँ पंचे जानिगें हँय, कि जउन कुछू अपना हमहीं दिहेन हय, उआ सगला अपनय के तरफ से आय। 8काहेकि जउन सँदेस अपना हमहीं दिहेन तय, हम उनहीं उआ सँदेस बताय दिहेन हय, अउर ऊँ पंचे अपना के सँदेस के बातन काहीं अपनाय लिहिन हीं, अउर इआ सच्चाई जान लिहिन हीं, कि हम अपना के तरफ से आएन हय, अउर इआ बिसुआस मान लिहिन हीं, कि अपनय हमहीं पठयन हय। 9इआ समय हम केबल उनखे खातिर प्राथना करित हएन, संसार के मनइन के खातिर नहीं, पय केबल उनहिन के खातिर प्राथना करित हएन, जिनहीं अपना हमहीं दिहेन हय, काहेकि ऊँ पंचे अपनय के आहीं। 10अउर उआ सगला जउन हमार आय, उआ सगला अपनय के आय; अउर जउन अपना के आय, उआ सगला हमार आय, अउर हम उनहिन के व्दारा मान-सम्मान पाइत हएन। 11हम अउर जादा समय तक संसार माहीं न रहब, पय ईं पंचे संसार माहीं रइहँय, अउर हम अब अपना के लघे आय रहेन हय; हे पिता परमातिमा, जउन अपना पबित्र हएन, उआ नाम के सक्ती से उनखर रच्छा करी, जिनहीं अपना हमहीं दिहेन हय, अउर जइसन हम अउर अपना एक हएन, उहयमेर ऊँ पंचे एक होइ सकँय। 12जब हम उनखे साथ माहीं रहेन हय, त हम अपना के नाम के सक्ती से, जउन अपना हमहीं दिहेन हय, उनखर रच्छा किहेन हय, अउर उनमा से कोऊ नास नहीं भें, सिबाय ओखे जउने काहीं नास होंइ के खातिर ठहराबा ग रहा हय, इआ एसे भ कि जउने पबित्र सास्त्र माहीं लिखी बात पूर होय। 13पय अब हम अपना के लघे अइत हएन, अउर ईं बातन काहीं हम संसार माहीं रहत समय कहि रहेन हय, कि ऊँ पंचे अपने हिरदँय माहीं हमार पूर आनन्द पाय सकँय। 14हम अपना के बचन काहीं उनहीं बताय दिहेन हय, अउर ऊँ पंचे अपना के बचन काहीं अपनाय लिहिन हीं, एसे संसार के मनई उनसे दुसमनी करत हें, काहेकि जइसन हम इआ संसार के न होंहेन, उहयमेर ऊँ पंचे इआ संसार के न होहीं। 15हम अपना से इआ प्राथना नहीं करी, कि अपना उनहीं संसार से उठाय लेई, पय इआ, कि अपना दुस्ट सइतान से उनखर रच्छा करी। 16जइसन हम इआ संसार के न होंहेन, उहयमेर ऊँ पंचे इआ संसार के न होहीं। 17अपना के बचन सत्य हय; एसे सत्य के व्दारा अपना उनहीं सेबा के खातिर तइआर करी। 18जइसन अपना हमहीं संसार माहीं पठयन हय, उहयमेर हमहूँ उनहीं संसार माहीं पठइत हएन। 19अउर हम अपने-आप काहीं अपना के सेबा माहीं समरपित करित हएन, जउने ऊँ पंचे, सत्य के व्दारा अपने-आप काहीं अपना के सेबा माहीं समरपित करँय।
सगले बिसुआसी लोगन के खातिर प्राथना
20हम केबल इनहिन भर के खातिर प्राथना नहीं करी, बलकिन उनहूँ के खातिर घलाय करित हएन, जे इनखे बचन काहीं सुनिके, हमरे ऊपर बिसुआस करिहँय, जउने ऊँ पंचे सगले जन एक होंय। 21हे पिता परमातिमा, जइसन अपना हमरे साथ हएन, अउर हम अपना के साथ हएन, उहयमेर ऊँ पंचे घलाय हमरे साथ होंय, एसे कि जउने संसार के सगले मनई बिसुआस करँय, कि अपनय हमहीं पठयन हय। 22अउर उआ महिमा जउन अपना हमहीं दिहेन हय, उहयमेर से हम उनहूँ पंचन काहीं महिमा दिहेन हय, कि जइसन हम अपना एक हएन, उहयमेर ऊँ पंचे एक होंय। 23हम उनमा अउर अपना हमरे साथ एक होइके रही, कि ऊँ पंचे पूरी तरह से एक होइ जाँय, जउने संसार के सगले मनई जानँय, कि अपनय हमहीं पठयन हय, अपना जइसन हमसे प्रेम करित हएन, उहयमेर उनहूँ से प्रेम करित हएन। 24हे पिता परमातिमा, हम चाहित हएन, कि जिनहीं अपना हमहीं दिहेन हय, जहाँ हम रहब, उहाँ ऊँ पंचे हमरे साथ रहँय, कि जउने ऊँ पंचे हमरे उआ महिमा काहीं देखँय, जउन अपना हमहीं दिहेन हय, काहेकि अपना संसार काहीं बनामँइ से पहिले हमसे प्रेम किहेन हय। 25हे पिता परमातिमा, अपना धरमी हएन, संसार के मनई अपना काहीं नहीं जानँय, पय हम अपना काहीं जानित हएन, अउर हमार चेला लोग जानिगें हँय, कि अपनय हमहीं पठएन हय। 26अउर हम अपना के बारे माहीं इनहीं पंचन काहीं बतायन हय, अउर बताबत रहब, कि जउन प्रेम अपना काहीं हमसे रहा हय, उहय प्रेम उन माहीं रहय, अउर हम उन माहीं रही।”
Արդեն Ընտրված.
यूहन्ना 17: bag
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc. All rights reserved.