Kèʼlo Shúu Fù
Shúu Fù
Ŋwàʼ Kèʼlo və̀ne fer mo Nyùy‑iì kèʼèn, e bòm ndzə, fer mo wìr msòŋ‑eè kèʼèn, e bó a dzə sho, kfə̀n fer mo kinyo ke bi kí wùn à ŋgeʼ si‑iì kèʼèn, kfə̀n din mo Nyùy yii kér wíri. A dzə̀ á jàv Ŋwàʼ Kèʼlo və̀n mbìv sibaà.
Ye mbìy kèʼ fo kintsə̀m ké mbìy ki, e dù, e mèé e kee nshòv mòʼón e ghvə̀m ki (1–11). Mbìv rə̀n fer mo Nyùy‑iì bomen kitú ke nsay, e bòm nyám si, e bòm wíri. Kifá kidzə̀m ke Nyùy‑iì bomen kí‑iì dzə̀ kijuŋ feyì, Nyùy kfə́n a səə̀vì ji ví wáa yu a vijuŋ. Yii bèy, wír mbìyi vee Adam wùn Efa nèn wìy lò, e ŋwày Nyùy, e shòʼór nsər ye wù‑uù wayin, é bo kinyo ke bi kí wùn à ŋgeʼ nəə́ é kitu ke nsay, aá rán kisəəvì ké Nyùy wùn à vijuŋ və́ ví. Wìr msòŋ e dzə̀m nèn kù a shaà fo mbìy, a bùʼtì vinyo, a tonén. Nyùy nèn lò, e yèn ji wun kù‑úù laar á kitú ke nsay. Wù ku nèn fə̀ə́r ndzə́v, yí súm kitú ke nsay kidzə̀m, wíri kpúkír adzə̀m, ku gòʼ Noa cáʼ wùn à wón vəə́. Fo bàm, wíri nèn kfə̀n a kùʼ, a run kitú ke nsay, yii bèy, a bó kùʼùn wìr yòʼ‑oò ló a ghvəm Nyùy Tàr.
Mbìv ye yì meen ji baà nén a dzə vintsə̀m vee 12–50. Mbìv rə̀n kér kimfèr a dzə̀ ké atǎr wòŋ wìr veé Isray. Taà wòŋ mbìy dzə̀ Abraham wo á kiìn wun bìʼ wáy ye wù‑uù wayin shilív e Nyùy wùn, a yunín wun. Á bèy, Nyùy ku nèn shòʼ Abraham ji wù yíi a ker a kfəə́, a wun yíi səə̀vì, é yí wáa dzə ji kitúm, é wun fó nsay ye Abraham wìyìn, a dzə sho ji kiŋgwìy aáwune. Ke kuʼùn kí, Nyùy kfən kàʼ Abraham ji wun wíy shaà a fo kfə́ə rə́ rə́ne, e bóo səə̀vì vitúm veé kitu ke nsay vidzə̀m, é vijuŋ ve wìr msòŋ‑eè ranen ví kfə́n é bàm.
Kimfèr ke kí jumrì ké Abraham ki nén a dzə ké wan və woo Aysi, e lì ké wan Aysi woo Jakov wo á yoŋ yír rə́ yímóʼó ji Isray, wùn à ké wón Jakov vee nshòv sibaà e ghvə̀me. Dzə̀ áwune ve vé‑eè gwàrìn rám sé wìr veé Isray see nshòv sibaà e ghvə̀m. Á fò kilíŋ kee jeéy kí e Joosev woo wan Jakov wùmòʼ wùn ǎ vinyò ve ví‑iì kooyin, é bo Jakov wùn à kibér ke won və́ kí li kfə́ə sév, e lò sho fo wòŋ wo Nyùy‑iì kàʼàn áwune shó, e dù, a dzə e Ejiv ji á fiʼ lùŋ, bìʼ jíŋ ye yì‑iì koon é wòŋ.
Mo ŋwàʼ və̀ne fə̀m fer a dzə̀ kimfèr kee kùm wíri ben, wú tòmbìy fò kilíŋ ke mbìy ki a dzə̀ é lìm ye Nyùy lìmèn ne. Wú lòo kèʼ, e tòmbìy bìnsí ji Nyùy‑iì lo bòm á rú kitú ke nsay, e ndzəə̀r e ŋkàʼmé woo ji Nyùy kù wíy a dìn a shií wo wù kér fo wír vəə́, e yiì, aá kfə́n é wòŋ wo wù‑uù kàʼàn áwune shó. A dzə̀ kíwun ke Joosev‑iì yòŋèn, e bó a kpu jii:
M sí méʼ mentsə̀m me kpu, Nyùy kù wíy sham ven, e fəə́r fo wòŋ fèn, e dù sho e wòŋ wo wù‑uù kàʼàn Abraham wùn à Aysi, à Jakov sho, e kfə̀n lìʼ (50.24).
Nyùy fəə̀sín e ŋwàʼ foo fèn, e shaà wir dzə̀m. Dzə̀ wun woo Nyùy wo wù yii tar vinyo, nèn maʼ ŋgeʼlàʼ e wír ve á yii kibií kitu. A kù dzə̀ wun woo Nyùy wo wù danèr wír və́, sə́ áwune, kfə̀n tíy mbìy fo vinyò ve ví kooy áwune vidzə̀m. Vé‑eè sàŋ kindzə̀n ke ŋwàʼ kìn bèn ji kí fiʼ lèm kimfèr kee mo wíri‑iì wáy shilív e Nyùy wùn, é kí fiʼ yiì, é melív mesən mè wáa lùm e Nyùy wùn réŋréŋ mo méev mè‑eè lumè.
Vilíŋ ve ŋwàʼ
Mo Nyùy‑iì bomen kitú ke nsay, e bòm wir msòŋ 1.1–2.25
Mo kinyo ke bi kí wùn à ŋgeʼ si‑iì kèʼèn 3.1‑24
Kèʼ fo Adam ghan, e dù, e meé e Noa ghan 4.1–5.32
Kinyo ke Noa wùn à ndzə́ví 6.1–10.32
Kirùmèn keé Babel 11.1‑9
Vinyo vee kèʼ fo Shem ghan, e dù, e meé e Abram ghan 11.10‑32
Vinyo ve atǎr wòŋ vee ji Abraham, Aysi wùn à Jakov 12.1–35.29
Rám Esav 36.1‑43
Vinyo ve Joosev wùn aàfə́r vəə́ 37.1–45.28
Mo wón veé Israyi‑iì dzəə̀n é wòŋ Ejiv 46.1–50.26
Արդեն Ընտրված.
Kèʼlo Shúu Fù: LNB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022 CABTAL