Chenesis 16
16
1Yohmi ma Eblam tekchi Salai ʋt ʋlla ik im esho tok: mihmʋt Echip ohoyo, tishu ohoyo hosh hohchifo kʋt Haka yosh im anta tok.
2Atuk osh Salai ʋt Eblam a̱, Yakeh himak a̱ Chihowah yʋt ʋno ʋlla eshi la he tuk a̱ ʋm oktʋblishke: an tishu ohoyo ak o̱ ish iba chukowashke, chim asilhha lishke; yʋmmak o̱ ʋlla isht ʋm aiasha hinla yoba ká, im achi tok. Mihma Eblam ʋt Salai im anumpa ha̱ i̱ haponaklo tok.
3Mihma Eblam ʋt Kenan yakni ya̱ ahanta tok afʋmmi pokoli ma, Eblam tekchi Salai ʋt in tishu ohoyo Echip ohoyo Haka yash eshi cha i̱ hatak Eblam a tekchi ya chi̱ ho̱ i̱ bohli tok.
4Mihma Haka ya̱ ibachukowa ma, chakali tok; micha chakali hatuk ʋt akostininchi mʋt, i̱ nahullo ohoyo yash kanimanchi tok.
5Mihma Salai ʋt Eblam a̱, Nana ik sʋm achukmo kʋt chishno ak atuk pulla kak o̱ yʋmohmishke: an tishu ohoyo hatuk a̱ chi shakba fohki li tuk oke: atuk o̱ chakali kʋt il akostininchi mʋt, sa kanimanchishke; Chihowah yʋt ʋno, micha chishno pim itin takla nana ai apesashke, im achi tok.
6Yohmi kia Eblam ʋt Salai ya̱, Yakeh, chin tishu ohoyo hʋt chibbak a̱ fo̱ka hoke; nana hosh chim ʋlhpesakmʋt, ish yʋmihchashke, im achi tok. Atuk o̱ Salai ʋt i̱ kʋllo ma itikba ya̱ i̱ maleli tok.
7Atuk o̱ chukushmi foka oka kʋli, Shu hina oka kʋli hikia ka̱ a̱sha na, Chihowah im enchel ʋt ahayuchi tok.
8Micha Haka Salai in tishu ohoyo ma, katima ish minti cho? micha katima ish ia chi̱ cho? achi tok. Mihma A̱ nahullo ohoyo Salai itikba yak o̱ i̱ maleli hosh a̱ya lishke, achi tok.
9Mihma Chihowah im enchel ash osh, Falamʋt chi̱ nahullo ohoyo ha̱ ish im ona cha, im antia achukma hosh ibbak nutaka ma ish ahantashke im achi tok.
10Micha Chihowah im enchel ash osh chisht aiunchololi ka̱ apaknʋchit atamblichi la hi oke, yohmi na apakna kʋt a holhtina hi ʋt iksho ka hi oke, im achi tok.
11Micha Chihowah im enchel ash osh, Yakeh, chi chakalishke, yohmi kʋt ʋlla nakni yo̱ ish esha hi oke: micha chilbʋsha ka̱ Chihowah yʋt haklo tuk oka, hohchifo ha̱ Ishmael ish hochifa hi oke.
12Atukma hatak kostina he keyu ya hi oke: ibbak ʋt hatak moma ka̱ i̱ sanalikma, hatak moma ibbak ʋt i̱ sanala hi oke; mikma itibapishi ʋhleha moma ka̱ itin takla yo̱ ahanta hi oke, im achi tok.
13Mihma Chihowah yʋt im anumpohonli tuk ash hochifot Chitokaka chia hʋt is sa pi̱hi̱sa yoke, achi tok: mihmʋt, Ʋno ʋt ilʋppa pisa li ha yak kia hopo̱koyo li ha cha? achi tok.
14Yohmi hatuk o̱ kʋli hofobi yash osh Bee‐lahai‐loi hohchifo tok; Yakeh Katesh, micha Belet iti takla ya̱ hikia hoke.
15Atuk o̱ Haka ʋt Eblam a̱ ʋlla nakni yo̱ im eshi tok: mihma Eblam ʋt ushi, Haka ʋt im eshi tuk ash hohchifo ha̱ Ishmael hochifo tok.
16Mihma Eblam ʋt afʋmmi pokoli untuchina akucha hannali ho̱, Eblam a̱ Haka ʋt Ishmael a̱ im eshi tok.
Արդեն Ընտրված.
Chenesis 16: CHH
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Published by the American Bible Society 1848-1886, reprinted 1913