Chenesis 25
25
1Yʋmohmi tuk o̱ anonti Eblaham ʋt ohoyo ishi tok; mihma hohchifo hʋt Ketulah atok.
2Mihmʋt Simlam, micha Chokshan, micha Metan, micha Mitian, micha Ishbak, micha Shuah aiena kak o̱ im eshi tok.
3Atuk o̱ Chokshan ʋt Sheba, micha Tetan a̱ tobachi tok. Mihma Tetan ushi ʋhleha hʋt Ashulim, micha Letushim, micha Leummim aiena kak atok.
4Mikma Mitian ushi ʋhleha hʋt Efah, micha Efe, micha Hanok, micha Abitah, micha Eltaah aiena kak atok. Ilʋppa puta kak osh Ketulah im ʋlla ʋhleha hatok.
5Mihma Eblaham ʋt nana im a̱sha tuk ʋt moma Aisak ak o̱ ima tok.
6Amba im itaiena ushi ʋhleha ha̱ Eblaham ʋt im a̱sha tuk ʋt Eblaham ʋt nahʋlbina ima cha, okcha̱ya moma kak osh ushi Aisak a̱ i̱ filʋmmichit hʋshi akochaka pilla, hʋshi akochaka yakni ak o̱ pila tok.
7Atuk o̱ Eblaham ʋt okcha̱yʋt ahanta afʋmmi puta ya̱ nitak puta okcha̱yʋt ahanta kʋt ilʋppak oke, afʋmmi tahlepa achʋfa cha pokoli untuklo akucha tahlapi tok.
8Yohmi mʋt Eblaham ʋt fiopissa tok, micha sipokni achukma hatak sipokni, micha afʋmmi laua hosh illi tok; micha im okla ha̱ iba holhtina tok.
9Mihma ushi Aisak, micha Ishmael ʋt Hittait hatak Soha ushi Eflon im osapa hikia hichukbi Makpelah, yʋmmʋt Mamle itikba ya̱ hikia kak o̱ a hohpi tok.
10Osapa ya̱ Eblaham ʋt Helh ushi ʋhleha ha̱ in chumpa tok ak atok: yʋmmak o̱ Eblaham micha tekchi Salah ʋt a hollohpi tok.
11Atuk o̱ yakohmi tok, Eblaham ʋt illi ha ya̱, ushi Aisak a̱ Chitokaka yʋt yukpali tok: mihma Aisak ʋt kʋli hofobi Lahai‐loi ak o̱ ai ʋtta tok.
12Yohmi ka̱ ilʋppa puta kak osh Echip ohoyo, Salah in tishu ohoyo Haka ʋt Eblaham a̱ im eshi tok, Ishmael Eblaham ushi a̱ im ishtatiaka yoke.
13Ilʋppa puta kak osh Ishmael ushi ʋhleha hohchifo hosh in chuka achʋfa puta kʋt ʋlhpi̱sʋt hohchifo hoke: Ishmael a̱ im ʋttahpi Nebayolh: micha Keta, micha Atbeel, micha Mibsam,
14Micha Mishma, micha Tumah, micha Massa,
15Hata, micha Tema, Chetu, Nafish, micha Ketemah:
16Ilʋppa puta kak osh Ishmael ushi ʋhleha hoke, micha ilʋppa puta kak osh in tʋmaha ʋlhpi̱sʋt, micha i̱ holihta ʋlhpi̱sʋt hohchifo hoke; apehlichi ʋlhpi̱sʋt pehlichi auah tuklo hoke.
17Atuk o̱ ilʋppa puta kak osh Ishmael ʋt okcha̱yʋt ahanta afʋmmi puta kʋt afʋmmi tahlepa achʋfa cha, pokoli tuchina akucha untuklo tok: atok osh fiopissʋt illi cha, im okla ha̱ ibaholhtina tok.
18Mihma Hafilah ya̱ ʋttʋt ia hosh Assilia pilla ish ia ka̱ Shu Echip itikba talaia kak o̱ okla aiasha tok: mihma itibapishi moma itikba ya̱ Ishmael ʋt ai illi tok.
19Mihma ilʋppak osh Eblaham ushi Aisak a̱ in chuka achʋfa anoli holisso hoke: Eblaham ʋt ushi Aisak a̱ tobachi tok:
20Mihma Aisak ʋt afʋmmi pokoli ushta hosh Silian hatak Patan‐alam ʋtta Behluel ushetik, Silian hatak Laban in tek Lebekah ya̱ ishit itauwaya tok.
21Atuk osh tekchi ʋt ʋlla ik im iksho yatuk o̱, tekchi ya̱ isht anumpulit Chihowah ya̱ im asi̱hi̱hla tok: mihma Chihowah yʋt ʋlhpesa im ahni na, tekchi Lebekah ʋt chakali tok.
22Atuk o̱ ʋlla yash osh ikfoka a̱lhto kʋt itʋboa tok: mihma, Yohmi hokma, nanta katiohmi ho̱ si yakohmi cho? achi mʋt, Chihowah ya̱ ont im a ponaklo tok.
23Mihma Chihowah yʋt, Oklushi tuklo hosh chim oshʋtto ya̱ a̱lhto hoke; micha okla nana a kaniohmi kʋt tuklo hosh chikfoka ya̱ a kohcha chi̱ hoke: mikma okla achʋfa kʋt kʋllo kʋt okla achʋfa ya̱ i̱ shahla hi oke, mikma akni ak osh nakfish a̱ i̱ nutaka hi oke; im achi tok.
24Atuk o̱ ʋlla esha he ʋlhpesa nitak ʋt ʋla ma, yakeh, haiyup ʋt im oshʋtto ya̱ a̱lhto tuk atok.
25Atuk o̱ ti̱kba kohcha kʋt hummʋt nipi moma kʋt nafohka hishi a̱sha chohmi tok: mihma Esau, okla hochifo tok.
26Atuk o̱ i̱ himmak o̱ itibapishi mʋt kohcha mʋt, Esau iyi̱katoba ya̱ ibbak ishit hoklit ieshi tok: mihma hochifo kʋt Chekob achi tok: mihma yʋmma Lebekah ʋt eshi ma, Aisak ʋt afʋmmi pokoli hannali hatok.
27Mihma ʋlla yash osh hofantit taha tok; atuk osh Esau ʋt owʋtta imponna, kowi a̱ya hatak atok: micha Chekob ʋt hatak aiʋlhpiesa yosh ʋlhtipo ahanta tok.
28Mihma Aisak ʋt Esau im issi nipi ʋpa kak osh holitobli tok: amba Lebekah ʋt Chekob a̱ holitobli tok.
29Mihma Chekob ʋt tubi ya̱ honi tok: atuk o̱ Esau ʋt kowi a̱ya tuk osh ʋla mʋt, hoyʋbli tok.
30Mihma Esau ʋt Chekob a̱, Chim asilhha lishke, nahonni humma yʋmma fehna ka̱ sʋpetá, sa hoyʋbli hoka, im achi tok: yʋmohmi kak o̱ hochifo kʋt Etom achi tok.
31Mihma Chekob ʋt, Himak nitak a̱ ʋttahpi ish ai isha he ʋlhpesa ya̱ is sa̱ kanchashke, achi tok.
32Mihma Esau ʋt, Yakeh, sʋlla̱ hosishke, mikma ʋttahpi ai isha he ʋlhpesa ilʋppʋt nanta isht ʋm achukma hinla cho? achi tok.
33Mihma Chekob ʋt Himak nitak a̱, anumpa kʋllo il onochit a̱ mihá, achi tok: mihma anumpa kʋllo im il onochit miha tok: mihmʋt ʋttahpi ai isha he ʋlhpesa yash Chekob a̱ i̱ kanchi tok.
34Yohmi ma Chekob ʋt Esau ya̱ pʋska, micha tubi honni aiena ka̱ ima tok; mihma impa cha, ishkot issa mʋt, wakaya cha ia tok: yakohmit Esau ʋt ʋttahpi ai isha he ʋlhpesa ya̱ shitilema tok.
Արդեն Ընտրված.
Chenesis 25: CHH
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Published by the American Bible Society 1848-1886, reprinted 1913