Markus 10
10
Yesu mupaturo: mampatu: kasiholiang
(Mat. 19:1-9, Luk. 16:18)
1Nai anto, kakarang ti Yesu sola: pasikolaNa, lumao i Yudea pang i heteꞌna Uhai Yordan.*#10:1 dea‑raka, lumao i Yudea mangola: i heteꞌna Uhai Yordan. Tau boso: bùruꞌ ho pole mukobu: mampimpalìngi‑I. Pang mène: biasanna, Yesu mampaturo:‑i se. 2Pira-pira ho tu Parisi bùruꞌ mangkakaꞌi Yesu. Mingkutiki‑i se moa teꞌ, “Manuruꞌ Kinta:, mampatu: atorang-atorang Musa, mading naꞌ tau mangholi bahinena?”
3Na sùmui Yesu teꞌ, “Aka ti ung na piparenta‑ingko se Musa?”
4Na sùmui‑i se teꞌ, “Musa mangkanàhai: tau mangholi bahinena, deinti ara suraꞌ kasiholiang nibabe.”*#10:4 Hele i Ul. 24:1.
5Na oanna‑mi Yesu moa teꞌ, “Musa marronno: atorang to, sàbaꞌ makarraꞌ ti pinanahammu se. 6Hampoꞌ nironno: ho moa teꞌ nai mula tau, ‘Puang mampaara tulino muane pang bahine.’*#10:6 Par. 1:27. 7‘Deanna‑mo to, dea ti muane mampaliia amanna pang inanna pang mamesa sola: bahinena, 8pang nai iduanna miluhali besa kalae:.’*#10:7-8 Par. 2:24. Jadiꞌ, hang idua‑i se hura:, sangadinna besa‑rai:. 9Deanna‑mo to, aka ti ung na pabesa‑mo Puang, ha mading‑i na pasisaraka tulino.”
10Tòna mintama‑mi se i rasang, na pingkutik‑ing pasikolaNa ti kara-kara to. 11Musua: ti Yesu mao i dei: se moa teꞌ, “Isai-sai ti ung mangholi bahinena, mangking silopaka pole bahine sintàna:, tau to malahang mao i bahinena ung parrara. 12Mène: ho ti bahine ung mangholi muanena, màli: na silopaka pole muane sintàna:, malahang‑da ho.”
Yesu mampasakke pira-pira anaka
(Mat. 19:13-15, Luk. 18:15-17)
13Ara tau ung mambaha anaka mao i Yesu, mangking Na tokaꞌ pang Na pasakke. Hampoꞌ na ràho pasikolana Yesu ti tau to‑i se. 14To na ita‑mo Yesu, lalaka, pang Na ràho ti pasikolaNa teꞌ, “Patinai‑i ti ana-anaka ti mai! Hau apuꞌ se, sàbaꞌ tau ung si mène:‑mo te ti ung mangampu kadatuangna Puang. 15Matantu te ung Ku pusua: matung e teꞌ Isai-sai ti ung dang mantarima kadatuangna Puang mène: besa anaka, harai: tungka dalang mintama i kadatuangNa.” 16Na salangkungna‑mi Yesu ti anaka, pang Na palummàngi palaꞌ mampasakke si besa-besa.
Tau ung sukiꞌ
(Mat. 19:16-26, Luk. 18:18-27)
17Tempona Yesu mampatùrung kang pammulaoangNa, ara besa tau miruru:-ruru: mao i Dea. Tau to mukalimuntuꞌ i heleꞌNa pang mingkutiki moa teꞌ, “O Tungguru ung belo:, aka ti ung parallu ku pukauꞌ mangking ku mangkorai: katuhoang ung màle?”
18Hampoꞌ na sùmui Yesu teꞌ, “Oꞌ aka pu u Mi konai: ung belo:? Hari:‑da ung belo:, sangadi Puang‑da teng. 19Tantu u ìsang‑mo ti parentanna Puang, ‘Hau mupatei, hau malahang, hau mumanau, hau mampusua: passabii ung dang tongang, hau mutangkasi:, sangadi‑i ti amammu pang inammu.’*#10:19 Kel. 20:12-16, Ul. 5:16-20.”
20Na oanna‑mi ti tau to teꞌ, “Nasang ti to, ku toroꞌi‑mo nai mangurangku Tungguru.”
21Na hele pang na pulemu Yesu ti tau to. MusuaNa‑mi moa teꞌ, “Besa‑ràngi ti ung nu parallui. Nao:, baloko nasang ti kasukiꞌangmu, hengi‑ing mao i tau ung si mase-mase ti seengna, pang nai anto u mangkoraia kaaraang i suruga. Ladu to, mai‑mo: mangulaꞌ‑Kaꞌ.” 22Hampoꞌ na sàdingna‑i tau to ti suana Yesu, tepe:. Na paliina‑mi ti kaoneang to silentong pinanaha masussa, sàbaꞌ mantangaꞌ kasukiꞌangna ung maranga.
23Mihelena‑mi pàli i pasikolaNa ti Yesu pang musua: moa teꞌ, “Hang makàdaꞌ‑ida marempanna ti tau ung sukiꞌ miluhali taunna Puang i kadatuangNa.” 24PasikolaNa mimàha massàding pusuana Yesu to. Hampoꞌ musua: pole ti Yesu moa teꞌ, “Ana-anakàKu, marempa‑da ìnang ti miluhali taunna Puang.*#10:24 Pira-pira teks Yunani mampakànaꞌi sua: ti tau ung marranung kasukiꞌangna. 25Làbi madàli‑da ti besa unta mangola: hàlo: jarung nai none: tau ung sukiꞌ mintama i kadatuangna Puang.”
26Sua:-suana Yesu to mampupimàha pasikolaNa, dea pùna sikuti-kutiki‑i se teꞌ, “Baꞌ, ìna mène: to, kami polea‑mo naꞌ helaa nipasalamaꞌ, ung mase-mase?”
27Na hele Yesu ti pasikolaNa pang Na sùmui moa teꞌ, “Mao i tulino, hari:‑da ung hela. Hampoꞌ ha mène:‑ida to ti mao i Puang. Nasang, hela‑da Na pukauꞌ.”
Kamaupaꞌang mangulaꞌ Yesu
(Mat. 19:27-30, Luk. 18:28-30)
28Musuana‑mi ti Petrus moa teꞌ, “Mangaka ti kami? Nasang angkanna ki palii:‑mo mangulaꞌ‑Ke.”
29Na oanna‑mi Yesu teꞌ, “Matantu te ung Ku pusua: matung e teꞌ Isai-sai ti ung mampalii:‑mo rasangna, dea‑raka kaanna pang adinna, inanna pang amanna, anakàna, pang kinetena, sàbaꞌ Koi: pang Kareba Belo: nai Puang, 30i lino tee, tau to mangkoraia sangatuꞌ lùpiꞌna nai none: aka ti ung na palii:‑mo, dea‑mo mangkoraia rasang, kaa: pang adi:, ina:, anaka, pang kinete:. Làbi-làbi i lino i hunni, tau to mangkoraia‑da katuhoang deaꞌ tùrungna, na moi i lino tee nikeneꞌ-keneꞌ ho. 31Hampoꞌ boso: tau ung iaho i latenna miluhalia ung i hoiꞌ, pang ung i hoiꞌ miluhalia ung iaho.”
Ung kapintàlung Yesu mampupiìsang kamaparriꞌangNa
(Mat. 20:17-19, Luk. 18:31-34)
32Yesu pang pasikolaNa tarrang i pammulaoang làngang mao i Yerusalem. Dea ti Yesu dolung sala:, mambùruꞌ‑ing pasikolaNa kalle nasang, pang tau ung mangulaꞌ‑i se nai keboꞌ mariaꞌ‑i se ho. Na hàngona‑mi sala: pole Yesu ti sampulo: idua pasikolaNa pang mampaìsàngi mao i dei: se aka ti ung bùruꞌa mao i Dea. 33Na konai: teꞌ, “Pisàdìngi‑ko se! I latenna ta làngang se mao i Yerusalem. I anto Anaka Tulino nipeheaa mao i kapala-kapala imang pang ung si manarangna i aluku. Na kasitoroꞌii: se teꞌ parallu nipatei, màli: na pehei: se mao i tau ung dang dea tu Yahudi. 34Na pengei: se, nitangkudui, nisasa: pang nipatei. Hampoꞌ àlo ung kaitàlu, tuhoa pole.”
Pampalaunna Yakobus pang Yohanes
(Mat. 20:20-28)
35Mindùkuꞌna‑mi ti Yakobus pang Yohanes, dea‑mo ana-anakàna Sebedeus, mao i Yesu. Musua:‑i se teꞌ, “Tungguru, ara ung ki palau nai Kinta: Ta pukauꞌa mao i kami.”
36Na kutikìna‑mi Yesu moa teꞌ, “Aka ti ung nu kapelai: se Ku pukauꞌa matung?”
37Na sùmui‑i se moa teꞌ, “Ki kapelai: ti mesong, besa mui konang, besa mui kairimMu ìna U miluhali‑mo Datu: ung kàle: iaho.”
38Hampoꞌ musua: ti Yesu mao i dei: se teꞌ, “Ha u ìsang‑ko se aka ti ung parallu u pukauꞌ, mangking u korai:‑ko se aka ti ung nu palau se. U helaa se naꞌ menung nai enùngang kamaparriꞌangKu, dea‑mo mangola: kamaparriꞌang*#10:38 kamaparriꞌang. Sua: Yunani baptisma, palleona pudoiꞌ. Pudoiꞌ tu Yahudi, tau nilàbung i uhai ung kaladung. Yesu marrampe pudoiꞌ to, manturo: kamaparriꞌang ung Na olaa. ung Ku olaa?”
39Na sùmui‑i se teꞌ, “Ayyo. Ki helaa.”
Musuana‑mi ho pole ti Yesu moa teꞌ, “Ìnang u menùnga se nai enùngang kamaparriꞌang ung Ku enùnga pang mangolaa kamaparriꞌang ung Ku olaa. 40Hampoꞌ mampatu: isai ti ung mesònga ung mui konang pang ung mui kairingKu, ha Koi:‑kaꞌko ti ung mampatantu to. Esòngang dea to nihengiing mao i isai-sai ti ung na patantu‑mo Puang Matua.”
41To na sàding‑mi se sampulo: pasikolana Yesu to aka to, lalaka‑mi se mao i Yakobus pang Yohanes. 42Jadiꞌ, na hàngo nasang Yesu ti pasikolaNa pang musua: moa teꞌ, “U ìsang‑mo se moa teꞌ ung si nipiama: i lino ung dang mangìsang Puang mampène: kaunang rayaꞌna. Pang mène: ho ti tau ung iaho i àlaꞌna‑i se, lupu ho mambeloꞌ-beloꞌ tau. 43Hampoꞌ ha mading‑i u mène: se to! Sangadinna, isai-sai nai àlaꞌmu se ti ung mangkapelai: miluhali ung iaho i heleꞌna Puang, parallu mapangae: mène: pangkoring. 44Pang isai-sai ti ung mangkapelai: miluhali nipiama: i àlaꞌmu se, parallu miluhali mène: kaunang mao i nasangna. 45Sàbaꞌ Anaka Tulino, ha mai‑Ida mangking nilayani, sangadinna bùruꞌ‑Da mai mulayani pang mampehea pinanahanNa mangking mantoloꞌ boso: tau nai dosanna.”
Yesu mampumatalete: Bartimeus
(Mat. 20:29-34, Luk. 18:35-43)
46Yesu pang pasikolaNa bùruꞌ i Yeriko. Tùrungna‑mi se, sipolai: tau ung dang makàdaꞌ bosona. Tempo to, ara besa tau ung buta, ung tuho: kapalau-lau, mesong i minanaꞌ dalang. Tau to nikonai: Bartimeus, dea‑mo anakàna Timeus. 47Na sàding Bartimeus moa teꞌ dùkuꞌ‑mo ti Yesu tu Nasareꞌ. Mikakoangna‑mi moa teꞌ, “O Yesu, Hatiꞌna Daud, pulemu‑kaꞌko!”
48Boso: tau marràho‑i mangking mimmànaꞌ. Hampoꞌ sa: na pilabu:-labuina sule: ti mikakoang moa teꞌ, “O Tuang, Hatiꞌna Daud, pulemu‑kaꞌko!”
49Tontona‑mi ti Yesu pang musua: moa teꞌ, “Hàngo‑ko dasse:!”
Na hàngona‑mi se ti ung buta to moa teꞌ, “Tèdeꞌ‑mo:! Pumasannang ti pinanahammu! Yesu manghàngo‑ko.” 50Na esingna‑mi ti komoꞌna, na taleꞌ mangking ha massengkàngi‑i, pang tiparammo sahe: tèdeꞌ mao mampasikorai: Yesu.
51Na kutikìna‑mi Yesu moa teꞌ, “Aka ti ung nu kapelai: Ku pukauꞌ matung?”
Na sùmui moa teꞌ, “Ku palea:‑ko paita pole Tungguru!”
52Musuana‑mi ti Yesu moa teꞌ, “Nàmo:! Kapatongangangmu mampasalamaꞌ‑mo:.” Pang tempo dea ho teng to, paita‑mo ti Bartimeus. Mangulaꞌna‑mi Yesu i laling pammulaoangNa.
Արդեն Ընտրված.
Markus 10: skx
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք