Luke 14
14
1Ubuk hnup hnupaka Boiyesuq khoeq Phariqsae lang ima buq eiya a'ciq tuna khlaung haqloeq Boiya án cawnauk. 2Yaq tuna a'kut kho haq a'phawq poeiq khoeq khlaung poemak khaw Boiyesuq hmaungkauma a'moeiq. 3Phariqsae loeq klam hmotsaw haqla Boiyesuq loeq, ubuk hnupoeng a'mniq ma'boei khoeq ta'la a a'moeiq kha khut a'phlaet moe? Phlaetaq moe? taeng a'hiq haq. 4Seiloeqkhaw yaq khlaung haqloeq pikhaw msauki yaq uk. Yaqklongoeng Boiyesuq loeq yaq khlaunga baeki loeqteq a'mniq mboei paek kiyoeng a'hloeqba. 5Yaqkiyoeng Boiyesuq loeq yaq khlaung haqla, ubuk hnupa nanghniq nán cawpak seisei, soepak seisei uta a'klawq loeq a'ni loeq man ta'ong a'omai yoe? taeng a'hau haq. 6Seiloeqkhaw yaq khlaung haqloeq pikhaw msauki noenaq uk. 7Yaqkiyoeng a'phaek án laqi khoeq khlaung haqkhoeq omdun pawi án haeqi khoeq Boiyesuq loeq a'hmuq haqloeq yaqhniqa pung a'mthumi nauk haqkhoeq teq, 8Hmat poemak loeq nanga koeipawiya a'mphaek loeq omdun pawi ya ngungi tiq. A'piyawoe naka nang thauka khlaung cang haqla khaw phaek waiqya a'phaekai. 9Yaq khlaung a'phaw loeq nanga a'phaek khoeq khlaung loeq lo loeqteq, nang na'ngungdun khoeq nei khlaunga paek hme taeng a'hau loeq hyawqi tiloeqteq a'msuma khoeq omduna na'ngung hoet laqai. 10Seiloeqkhaw nang khoeq koeipawiya na'ciq loeq a'msuma khoeq omdun na'ngung hoet nak loeq nanga a'mphaek khoeq khlaung loeq lo loeqteq, omdun pawi ya lo tiloeq ngunge taeng a'mbaeki nak loeq a'coe koei haq hmaungkauma na'sali na'laqi yai. 11Yaqa yaq a'hmlokthaqi saw haqkhoeq a'mhning laqi uk loeqteq yaqa yaq a'mhningi saw haqkhoeq a'hmlokthaq a'laqi yai taeng a'hau haq. 12Yaqkiyoeng Boiyesuq loeq yaq buq eipawiya phaeksawa, nang loeq ei pawi na'sai naka nang na'yapui haq nang imsaw haq, myoesaw haq, án khoeq a'moeiq khoeq incaengpui haqla phaek haqlai tiq. Nang loeq yaqkha na'sai haq khakhut yaqhniq loeqkhaw a'mphaek haq balai. 13Yaqkha thauka nang loeq ei ok pawi na'sai loeq khlaung sounglai haq, án kut kho pawi yaq khoeqhaq, lilaeksaw haq, a'mik mu haqla phaek haq boei. 14Yaqnaka yaqhniq loeq nanga kyezu a'mthumplan naq uk klongoeng nang khoeq na'oeqcaq. Khlaungpawi haq an thoq ba khoeq hnupoeng nang khoeq kyezu a'mthumplan a'sikcang na'laqi yai taeng a'hau haq. 15Boi hui tu buq eipawiya ngung loeqteq a'eipawq khoeq koei poemak loeq, Boipaw khomcaenga ngung loeqteq ei ok pawi ya a'eipawq laq khoeq khlaung teq a'oeqcaq taeng a'hau. 16Boiyesuq loeq yaq khlaunga, khlaung poemak loeq koeipawi a'saiyai khoeq koei haqla a'phaek haq. 17Koeipawi a'khing a'phaw loeq a'phaek án laqisaw haq hma mya poemak hloeq loeqteq, pawi má mcaqai khing a'phaw hni lohnoek taeng baekisauk a'mtoeq haq hoet. 18Koei haq loeqkhaw poemaki yoeng poemak a'klong phlaq uk loeqteq cit dowaq uk. A'mcaqa khoeq poemak loeq keiloeq lai bungak ka'hleiq khoeq a'moeiq. Yaqkhoeq ka'sot hoet laq hmai klongoeng ka'ciq hmai hoe taeng a'hau. 19A'la poemak loeq kei loeqkhaw soe saenghngaw ka'hleiq khoeq ka'sot hoet laq hmai klongoeng ka'ciq hmai hoe taeng a'hau. 20A'la poemak loeqkhaw keiloeq towanoeng ka'peha ka'laqi tha beq klongoeng lokhoqa hang taeng a'hau. 21Yaq mya loeqkhaw yaqa a'phlaet khoeqhaq im mawqa a'sauk paek loeq yaq im mawq khaw nana a'sawhlok loeqteq, mloeq duka án moeiq khoeq lawmkhi lawmkoiya khoeq khlaung sounglai haq, án kut kho pawi yaq khoeqhaq, lilaeksaw haq, a'mik mu haqla citi loeq phaek haq hoete taeng a'teiq. 22Yaq mya a'phaw ba loeq Boi loeq a'mtoeq khoeqhaq ka'sai poeiq kihni. Seiloeqkhaw khlaung thaengthaeng tawiq omdun loet haq a'moeiq beq taeng a'hau. 23Lawmlaiya khoeq haqloeq lawmkhi lawmkawiya khoeqhaq beiyi haq tiloeq ima loyi pui nauk haq boei. Yaqnaka kei ima khlaung haq án luiq poeiq yai. 24Nanga keiloeq ka'mhauwai, a'mcaqa na'baeki haqkhoeq khlaung haq án phaw nak loeq kei ka'yoeq haqkhoeq ei ok haq ba'dakcaw pak a'mdaep laq hlaq uk thaeng yaq mya a a'hau. 25Yaqkiyoeng khlaung thaengthaeng khoeq Boiyesuq hui tu án lo pawq klongoeng Boi loeq yaq khlaung haq poet hlaengi loeqteq, 26Nanghniq loeq, nán nupaw, nán pehacaw, cinau ta nau haq tanaq nanghniq haq tauka keiya nana a'mkhaeki noenaq tuk naka kei ta'paiq phlaet noen hlaq tuk. 27Nanghniq kutphawtoeng koeqi tuk loeqteq kei hui tu lo pawq noenaq tuk nak loeq kei ta'paiq phlaet noen hlaq tuk. 28Nanghniq loeq hmyawcang lungak mcaq tuk loeq nán saukai nak loeq a'mcaq a'msum haen loeq a'lok khoq moe? nakkhoeq nán hmawtai tawiq ya ngung tuk loeq tawiq ta'ong nán omai moe? 29Yaqkha tawiq ta'ong mcaq loeq sauk pak loeqkhaw mcawn khoeqaq nak loeq a'hmuq saw haqloeq án mnuiq naukai. 30Yaq khlaung haqloeq nanga, nei khlaung loeq hmyawcang mcaq loeq sauk noen loeqkhaw mcawnong sauk noenaqsa taeng a'mhauwai. 31Yaqkhakhut baung mang pak seisei a'coe mang poemakoeng caek an toeki yai khoeq a'lowaiq nak loeq caeksaw songhneiqoeng a'lo khoeq yaqhniqa caeksaw songak noeng a'moeiq saw loeq a'noeni khoq, noeni khoqaq khoeq a'yang ngung loeqteq tawiq ta'ong a'omai moe? 32Noeni khoq hlaq uk khut án mkhini nak loeq yaq mang loeq yaq tantaman haqla a'coe mang a'hlawa a'om tuna teiq haqloeq teq caek toeqi hlaqpuq taeng khoeq plau woeng a'doudau laqai. 33Yaqkhakut nanghniq nán poengi khoeq won thaung haq hyaq khoqaq khoeq khlaung teq kei ta'paiq phlaet khoq hlaq. 34Mci khoeq nana a'pawi. Seiloeqkhaw a'mkhlum a'klok loeq yaq mci a'la mkhlum baong kha ma'sai laqai yoe? 35Yaq mci khoeq somdaek tawiqpak seisei phluk tawiq ya pak seisei a'sum woncaq naka a'planga ma'tong theiq. A'yaukai khoeq a'hnaw paw saw haqloeq yaw boei tuk taeng a'hau haq.
Արդեն Ընտրված.
Luke 14: ctpv-rv
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.