Luke 15
15
1A'khon koksaw haqloeq a'plaet caw haqkhoeq Boiyesuq loeq a'mcok hau haqkhoeq plau hnyina án lo. 2Yaqateq Phariqsae haq klam hmotsaw haqloeq, nei khlaung teq a'plaet caw haqloeng om hom loeqteq yaqhniq oeng án ei ok homsa taeng a'plaet án taung. 3Yaqkiyoeng Boiyesuq loeq yaqhniqa pung amtumi nauk haqkhoeq teq, 4Nanghniq tau wa khoeq hmat poemaka toe khlaak a'moeiq khoeq duka toe luak a'klok loeq nang loeq koqkip lukoq khoeq hyaq haq tiloeqteq a'klok khoeq toe luwak na'sui ba lai seiyaq moe? 5Yaq toe na'khom ba loeq yaq khlaung khaw a'oeqcaq khoeq mlungoeng a'pa wong koet loeqteq ima a'loyi ba lai. 6Im a'phaw nak loeq a'yapui haq, imcaengpui haq baeki haqloeq teq a'klok khoeq toe ka'laq ba hni klongoeng kei hui tu lo tuk loeq oeqcaq pawqoek taeng a'hau wai. 7Yaqkhakhut khlaungpawi taeng mkhini uk loeqteq sa'diq án laqai loecaq taeng án mkhini khoeq koqkip poemkoq tauka a'plaeta khoeq sa'diq laq ba loeqteq Boipaw hma a'lo ba khoeq khlaung poemak tawiq ya Mehona nei thauka nana án oeqcaqai nakkhoeq nanghniqa ka'mhau haq. 8Yaqkhakhut hna'taw poemaka haen saw khaiqha a'moeiq khoeq duka khaiqyak a'mkhloq nak loeq yaq loeq mithoi loeqteq imkhi imkhoi haq phaek poeiq loeqteq khom ba oeng a'pawilanga a'sui ba lai seiyaq moe? 9Yaqkiyoeng a'klom ba nak loeq a'yapui haq, imcaengpui baeki haqloeq teq a'klok khoeq haen saw ka'laq ba hni klongoeng kei hui tu lo tuk loeq oeqcaq pawqoek taeng a'hau wai. 10Nanghniqa keiloeq ka'mhau haqkhoeq teq yaqkhakhut a'plaet caw poemak sa'diq a'laq ba nak loeq Boipaw mehon saw haqkhaw án oeqcaq pawq taeng a'hau. 11A'la Boiyesuq loeq a'hau khoeq teq, khlaung poemaka a'caw poemhneiq a'moeiq. 12A'cawpaw nai loeq a'pawa, pawu woe kei ka'laqi yai khoeq khu a'mphaiq paeke taeng a'hauwi. Yaqateq a'paw loeqkhaw yaq khu haqkhoeq yaqhniqa a'phaiq paek hoeiq poeiq. 13Yaqkiyoeng khomhnup a'tawncaw a'moeiq loeq a'cawpaw nai khoeq yaq loeq a'poengi khoeq khu louqi loeqteq a'coe pleiya a'ciq. Yaq plei a'phaw loeq ei ok loeqteq, a'pyaw laek loeqteq yaq loeq a'loyi khoeq won thaung haq a'mphlung poeiq. 14Yaq loeq a'loyi khoeq won thaung haq a'poeiq loeq yaq pleiya khaw nana a'laen khoeq sunphu caiq loeqteq yaq khaw buq a'hmut laqhni. 15Yaqateq yaq pleiya a'moeiq khoeq plei saw poemak ham cit loeqteq bi biya a'hnga a'woniyai khoeq a'mtongi ya teq yaq khlaung loeq laiya wok conga a'teiq. 16Yaq khaw buq loeq nana a'boeqiya teq wok haqloeq án ei khoeq cauk noeng a'ei pawqai mlung a'lo taek. Seiloeqkhaw yaqa a'ei yai khoeq a'paek saw a'ni khaw moeiq yaq. 17Yaqateq yaqa a'mkhin won ba loeqteq, kei pawu ima án bi khoeq bisaw haqloeq pak ngawq oeng án ei laq. Seiloeqkhaw kei teq nei duna a'mboeiqi lawn loeqteq ka'du laqhnaisa. 18Kei khoeq tho hang loeqteq pawu hma cit hang loeqteq, pawu woe, keiloeq Boipaw a khaw pawuwa khaw a'plaet ka'msai hoeiq hni. 19Kei khoeq pawucaw ka'phlaetai khoeq tawni nauk caq hang. Pawu ima án bi khoeq bisaw poemak khakhut noeng a'mtauk taek boei taeng ka'kawqi yai. 20Yaqkiyoeng yaq khaw tho loeqteq a'paw hma a'ciq. A'hlaw ta'koeiq a'paw loeq a'cawa a'hmuq loeq a'hmyaen khoeq mlungoeng toem loeqteq a'mnam poeiq. 21A'caw loeqkhaw a'pawa, pawu woe keiloeq Boipaw loeq pawuwa a'plaet ka'msai hoeiq hni. Kei khoeq pawucaw ka'phlaetai khoeq tawni nauk caq hang taeng a'hau. 22Seiloeqkhaw a'paw loeq mya haqla a'pawi haek khoeq wawt a'yang lo tuk loeq yaqa hmyoeqoek. A'kuta khoicip mnaukouk. A'kho wa khaw khocum mcum paekouk. 23Yaqkiyoeng a'tuk khoeq soecaw souq pu loeqteq pawi mthon pu loeq má ei okai. 24Kei ka'caw khoeq cukhowa du hoet loeqkhaw towa a'haeng ba hni. Cukhowa klok hot loeqkhaw towa ka'khom ba hni taeng hau loeqteq pawi án mthon. 25Yaq tuna a'cawpaw cang khaw laiya khoeq a'lo ba loeq imcaeng a'phawa teq caiqkhlang tumkhok uk loeqteq án lawm khoeq thai a'ya uk laq. 26Yaqateq mya poemaka baeki loeqteq pi khoeqhaq a'phlaet poeiq hni yoe? taeng a'hiq. 27Mya loeqkhaw nang na'nau kaikai latlat a'phaw bala teq na'paw loeq soecaw a'taukcaw khoeq án tuk hni taeng a'hau. 28Yaqateq a'cawcang khaw nana a'mlung hlok loeqteq imdukapak wondocaq klongoeng a'paw loeq lo loeqteq imduka a'wonai khoeq a'hau laq. 29Seiloeqkhaw yaq loeq a'pawa, keiloeq ka'kum thaengthaeng pawu taw bi haq bihang loeqteq pawu plau plauwak khaw myang puwaq hang. Seiloeqkhaw ka'yapui haqloeng pawi kán mthonai khoeq tawiq ya pawu loeq maqcaw luwak pak a'mtuk paek phuwaqti. 30Seiloeqkhaw nei na'cawnai khoeq pawu haen ha, haq pawi yaq khoeq hna'taw haqloeng mphoeiq poeiq loeqteq a'lo ba kho wa pawu loeq a'tauk khoeq soecaw tuk tiloeq pawi nán mtonpaeksa taeng a'hau. 31Yaqateq a'paw loeq a'cawcanga, ka'cawoe, nang khoeq huitu daedae na'moeiq. Keiloeq ka'poengi khoeq won thaung awlum nang loeq na'poengi caenoe. 32Seiloeqkhaw nang na'nau khoeq cukhowa du hoet pak loeqkhaw towa a'haeng ba hni. Cukhowa klok hoet pak loeqkhaw towa má khom ba hni klongoeng na'oeqcaq laqai taeng a'hau nakkhoeq Boiyesuq loeq a'hau haq.
Արդեն Ընտրված.
Luke 15: ctpv-rv
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.