Luke 19
19
1Yaqkiyoeng Boiyesuq khoeq Yeriqkhaw mloeq yap loeqteq a'ciq toeq. 2Yaq mloeqa Zaekae taeng a'ming a'moeiq khoeq khlaung poemak a'moeiq. Yaq khlaung khoeq a'khon koksaw poemak a'plaet khakhut nana a'khoeq a'moeiq khoeq khlaung poemak khaw a'phlaet. 3Yaq khlaung loeq Boiyesuq nakkhoeq a'niyoe taeng hmuqwaiq loeqkhaw nana a'dung a'coi klongoeng khlaungup lawn loeqteq hmu noengaq. 4Yaqklongoeng yaq khlaung loeq Boiya a'hmuq noengai tawiq ya a'hmaungkauma cawn loeqteq paipei thinga a'kawi hoet. 5Boiyesuq khaw yaq dun a'phaw loeq touqi loeqteq Zaekae, a'yang kome, tohnuupa nang ima ka'kawiyai taeng a'hau. 6Zaekae khaw thinga khoeq a'yang kom loeqteq Boiyesuqa mlungko oeqcaq oeng a'doudau. 7Yaq klong a'hmuq laq khoeq khlaung haqloeq, Boiyesuq khoeq pawi yaq khoeq khlaungoeng cit loeqteq a'ei hoet pawqai coeq taeng án cauqnauk. 8Yaqkiyoeng Zaekae khaw mdum loeqteq Boiyesuqa, Boi yoe, keiloeq ka'poengi khoeq won thaung boengak khoeq khlaung sounglai haqla ka'phaiq haqlai. Khlaung haq hma khoeq hmonaq ta'ong thaengthaeng ka'hiqi haqkhoeq a'khon tawiq ya poeqhli ka'paek haq balai taeng a'hau. 9Boiyesuq loeqkhaw Zaekae ya nei khlaung hma Abarahan hma khoeq a'yumi mlung bong a'moeiq klongoeng to ta'koeiq mcaq loeqteq nei ima a'moeiq khoeq awlum a Boipaw loeq a'klawn haq hni. 10Khlaungcaw khoeq a'kloqsaw haqla sui loeqteq a'klawn haqlai tawiq ya a'lo khoeq a'phlaet taeng a'hau. 11Boi loeq nei klong a'hnyinsaw khlaung haqla pung pungak a'la a'mthumi nauk haq. Piklongoen naka Boi khoeq Yeruqsalein mloeq phaela a'phawa teq Boipaw khomcaeng khoeq towa saksang a'pau hnai taeng án mkhin klongoeng a'phlaet. 12Yaqklongoeng Boiyesuq loeq, a'mat poemak khoeq yaq a'omdun pleiya manga a'thoniyai tawiq ya Ekareit hma cit loeqteq bitoeiq a'khawm hoet. Yaqkha bitoeiq khawmi loeqteq a'lo ba kiloeq yaq taengbleiya manga a'thoni laqai. 13Yaqkha a'ciq mawoeng yaq loeq mya poemha baeki haqloeq teq poemaka haen saw baektak cipaek haqloeq teq kei ka'lo mawng yaq haen sumi tuk loeqteq yeiqtup nauk boei tuk taeng a'sin haq. 14Seiloeqkhaw yaq taengbleiya khoeq khlaung haqloeq yaq a'mata án muni klongoeng yaq hnowoeng tantaman boengak teiq uk loeqteq, keihniq a nei khlaung loeq a'muksuk haqlai khoeq loyiyaquk hang taeng Akareita toengi hoet sauk án mtoeq. 15Seiloeqkhaw yaq khlaung khoeq mang a'phlaet laqloeq yaq pleiya mangta a'saiyai khoeq a'lo ba kho wa yaq loeq haen a'paek haqkhoeq mya haqla a'hmaungkauma a'baeki haq. Yaq loeq a'paek haqkhoeq haenoeng pihyawqbaung moeiqong án sui noengoe nakkhoeq a'hmotwaiq klongoeng a'phlaet. 16Mya poemk lo loeqteq Boi loeq a'mpaek khoeq haen baektaakoeng a'la a'mlaiq poeqha laqoeng ka'sui ba taeng a'hau. 17Mang loeqkhaw, nana a'boei, nang khoeq a'hmuq hyaungcawa teitca moeiqti loeqteq na'klani klongoeng mloeq mloeqha a'paeng louki boei taeng a'hau. 18A'la mya poemak loeqkhaw, Boi loeq a'mpaek khoeq haen saw baektaak khoeng a'la phoeqhngaw a'mlaiq laqong ka'sui taeng a'hauwateq, 19mang loeqkhaw nang loeq mloeq mloeqhngaw a'paeng louki boei taeng a'hau. 20A'msuma khoeq mya khaw lo loeqteq Boi yoe so hme, Boi loeq a'mpaek khoeq haen neiya a'moeiq. Keiloeq thuqhang loeqteq a'pawilanga ka'sim. 21Boi khoeq nana na'cipkaup khoeq khlaung na'phlaet klongoeng nang wonthaungsei ta'ong na'sim theiq. Nang loeq mcoeq ta'ong laiya khoeq caung haqkhaw na'simi theiq klongoeng Boiya ka'mkeiqa teq nei kha ka'sai taeng a'hau. 22Yaqateq mang loeqkhaw pawi yaq tikhoeq mya woe, nang na'hau khoeq plau khakhut nanga ka'msaiyai. Kei khoeq kei wonthaungsei ta'ong ka'louqi theiq klongoeng kei ka'cipkaup khoeq nang loeq na'hmot naka 23kei haen khoeq pi klongoeng haen toewoeng pusawa piya awpa tiyoe? Yaqkha na'awp nak loeq kei ka'lo ba kho wa yaq haen khoeq a'toe doe ka'laqi yai taeng a'hau. 24Yaqkiyoeng a'co mya haq baeki haqloeq teq yaqhma khoeq haen louki tuk loeqteq poeqha a'sui noen khoeq mya a paek kouk taeng a'hau haq. 25Yaqateq yaqhniq loeqkhaw Boi yoe, yaqhma haen poeqha a'moeiq hni taeng án msauki ba. 26Seiloeqkhaw Mang loeq, nanghniqa keiloeq ka'mhau haqlai, a'tauki khoeq khlaunga a'la ka'paek hmai. Pikhaw moeiq yaqkhoeq khlaunga yaq hma a'moeiqcaw khoeq pak ka'louqi paek hmai. 27Keiloeq ka'thin cong khoeq loyiyaq saw pawi ya uk khoeq khlaung haqkhoeq neiya lo tuk loeqteq ka'hmaungkauma tukoek taeng a'hau haq. 28Boiyesuq loeq yaqkha a'coukpaek haq kiyoeng Yeruqsalein mloeqa a'ciq toeq. 29Yaqhniq khoeq Tanlwein tongphae Baeqphage mam loeq Betaniq mam poet án phaw loeq a'hmaungkauma ta'paiq poemhneiq a'teiq hoeiq. 30Yaqhniq khoeq Tanlwein tongphae Baeqphage mam loeq Betaniq mam poet án phaw loeq a'hmaungkauma ta'paiq poemhneiq a'teiq hoeiq. 31Hmat poemak loeq, nanghniqa pi klongoeng Myicaw yoi nan phlutoe? taeng a'mhiq haqloeq Boi loeq a'loyi nakkhoeq hau boei hniq taeng a'hau hoeiq. 32Yaq ta'paiq poemhneiq khaw namduk an phaw loeq Boiyesuq loeq a'hau khakhut Myicaw khoeq yaq duna an khom. 33Yaqhniq loeq Myicaw yoi an phlut tuna a'mawq haqloeq, nanghniq loeq piya Myicaw yoi na phlutoe? taeng án hiq. 34Yaqhniq loeqkhaw Boi loeq a'loyi taeng án msauki ba. 35Yaqhniq loeq Myicaw khoeq Boiyesuq hma an lo kiloeq a'khlunga wawtphawq paek hniq loeqteq Boiya cumsauk an mtoeq. 36Yaq myicaw cum loeqteq Yerusalein mloeqa a'ciq dun lawma khlaung thaengthaeng loeq Boi hmaungkauma yaqhniq wawt haq án phawq paek. 37Boiyesuq tanlwein tonga khoeq a'kom loeq ta'paiq haqloeq Boiyesuq loeq a'sai louq khoeq a'tat haq na'maek haq mauknaukpha haq tawiq ya oeqcaq uk loeqteq Boipaw phumthaung án hmlokthaq. 38Yaqhniq loeq, Boipaw mingca woeng a'lo khoeq Hnyangphalang oeqcaq bacaek. Mehona khaw yaedam bacaeq. Boipaw phumthaung khaw wangba caek taeng án mpoq. 39Khlung lui tau wa khoeq boengak Phariqsae haqloeq Boiyesuqa, Sa'la woe, nang ta'paiq haqloeq nei kha án hau khoeq mdip haqle taeng án hau. 40Yaqateq Boi loeq yaqhniqa, nanghniqa keiloeq ka'mhau haqlai. Nei khlaung haq thinthin án om nak loeq lung haq tho uk loeqteq a'hmlokthaq haqlai taeng a'hau haq. 41Yaqkiyoeng Boi khoeq Yerusalein mloeq phae a'phaw loeq mloeqa a'hmuq nak loeq a'mik khli mkhlawlqi loeqteq 42baung loeq nang hma a'yaedam a'lowoe nakkhoeq nanghniq loeq hmotaq tuk khoeq nana a'kouk. Towa khinga yaqhaq khoeq nanghniq loeq hmotaq tukong a'thuq paek na'nlaqi. 43Khlaungsei haqloeq nanga a'mtoek haqlai tawiq ya mloeq hmyeiyoeng a'waengi nauk haqlai khoeq a'khing a'phawai. 44Yaqhniq loeq nanghniqa lung lungak khoeq a'coe lung khlunga kyanaqong daek khlunga kluqong nang loeq nang na'cawnau haqla a'nkhlaq poeiq yai. Pi klongoeng naka nang loeq Boipaw loeq nanga a'mklonai khoeq khing hmawta tiklongoeng a'phlaet taeng a'hau. 45Yaqkiyoeng Boiyesuq khoeq Boipawa wotpyuq dun kyong duka a'won loeq kyong duka Zi haq án yeiq khoeq khlaung haqla a'thut haq poeiq. 46Yaq khlaung haqla kei im khoeq Boipaw a suq tongi dun im a'phlaet laqai taeng klamcawa yok loeqkhaw nanghniq loeqteq yaq dun khoeq Damblaq haq omduna noeng ná sai taeksa taeng a'hau haq. 47Boiyesuq loeq Boipawa wotpyuq dun kyonga hnuptoeng a'mcok hau haq. Yahaenpaw lang haq klam hmotsaw haqloeq khlaung cang haq loeqkhaw Boiya án tukai khoeq án klai tun. 48Khlaung haqloeq Boiyesuq loeq a'hau khoeq ta'la a'pawilanga án hnyin tun klongoeng án tukai khoeq a'khwai laqi yaq uk.
Արդեն Ընտրված.
Luke 19: ctpv-rv
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.