Matiyew 10
10
Gawla ma Yezu kurow kava tsew ana hay
(Mk 3.16-19; Lk 6.14-16)
1Andza Yezu ma zəlata gawla ŋga kurow kava tsew ana hay na, ma vəlatar slam har ka mesəfrey ma zləɓa na hay, ma ka harəmata ba, ka ndaladəmata dzedzey hay tabiya ha, me tərey hay tabiyaha. 2Nəkafama mezəley ma maslaŋ kurow kava tsew ana hay: tsəfəmey ana na, Simoŋ na ma zəlamar Piyer ana, ta malam aŋga Andrey; Zak bəzey ma Zebedey ta malam aŋga Zaŋ; 3Filip ta Bartelemi, Tomas ta Matiyew ndaw me tsekeley dzaŋgal; Zak bəzey ma Alfey, ta Tadey; 4simoŋ ndaw me dzəŋgərey ka dala na, ta Zudas Iskariyot, ndaw ma da haɗəkada Yezu ba na.
Yezu ma sləradata gawla ŋga kurow kava tsew ana hay
(Mk 6.7-11; Lk 9.2-5; Lk 10.3-12)
5Ndaw a neney kurow kava tsew ana hay na, Yezu ma sləradata, ma tsatar guma a 'ar andza neney: «Ka da dam a wuraw ma ndaw Zuif ahiya kakay ana hay zlay, ka da fuləkwam a wuraw ma Samariteŋ hay zlay. 6Dawam hayna 'ar a slam ma təɓaŋ ma zəɗa na hay, ma səkway ma Israyel. 7Paɗ tsəveɗ na, tələkadama mey na Slala ma 'ərlam ka gurawa ba. 8Ndaladəmata ndaw dzedzey ana hay, mbəladəmatərawa ndaw ma mətsa na hay. bazləməmata malawa hay ba, ɓələmata fakalaw hay. Ka ndzafama ma hayaha sana, vəladama ma hayaha tey. 9Kwa ka da zəgam kwa gura, kwa sumkwo, kwa sulay a dziba, zlay, 10kwa gabal ma tsəveɗ zlay, kwa zana hay tsew zlay; kwa tahərak, kwa tapay zlay; hərway ndaw me key mber na, slam har aŋga daha me ndzefey tek me zəmey. 11Kuray ka husam ba a wuraw ana, dakay a bərok waray waray na, hayna tsəham na ndaw na ma həla vaw aha, ɗa ma da ŋgəlakwar ana. Arka tok na, ndzam da 'ay ndaw ana hana na, kasl ka ma da daw kwar. 12Ka fuləkwam aha a 'ay ana na, tsadəmara guma a veɗ 'ay ana. 13Haɗaw veɗ 'ay ana ma həla vaw aha na, zozoy kwar ka ndzey ka ŋga, haɗaw ma həla vaw aha kakay tey na, zozoy ana, ka mawa təŋga ka kuray ana. 14Haɗaw a wuɗam ma ŋgələmakwar kakay, dakay na a pam sləmay ka guma kwar kakay na, andza ka bəmawa ha da 'ay ana, dakay da wuraw ana na, bəzləmama burhway ana ba ka sek a kwar. 15I ɓadakwar dərka na: ta pas ma sariya na, dala mandza Sodom ta Gomor, sariya ta na na, a da key na ŋgama ka na ma wuraw ana ŋga na na.
Yezu a tsey ka tatakoy ma da key
(Mk 13.9-13; Lk 12.11-12; 21.12-19)
16Nəkam dey, i sləradakwar na kal kal andza təɓaŋ hay a walaŋ ma dəvar hay. Hayna kam wewer andza ma gwavaŋ, təram ləfeɗeɗe ahiya andza hwoɗəgwam hay. 17Hayna wam daw ka vaw ka ndaw hay zləna, a da mbəkafəmakwar har a har ma ndaw ma sariya hay, a da kəɗəmakwar ta laway, da 'ay me ɗuley mey ta hay. 18A da dadəmakwar ka 'ərdey ma guverner hay, ta bay ɗuhwa na hay hərway ɗaw: a da nəkadama seydewe na, taya ta ndaw Zuif ahiya kakay ana hay. 19Andza ka mbəkafəmakwar har tsoy na, ka da dzəmam ka vaw ka guma kwar ma da tsey ana, ma da ləvey teŋgey ana zlay: hərway guma kwar ma da tsey na, ka da ndzafama na, deŋe ka slam ana. 20Hərway ma da tsey guma na kuray sakay, ama ma da tsey guma da kuray na, Mesəfrey ma Baba kwar ana. 21Malam ndaw a da mbəkafa har ka malam aŋga a mey ma memətsey. Baba tey a da mbəkafa har ka wawa ŋga; bəza hay tey a da mbəɗafəmata ’ar ka baba ta ta maya ta hay, a da dzuwəmata a memətsey. 22Kuray tey na, ndaw hay tabiyaha a da ŋgəladəmakwar aha dey kakay, hərway ma Mezəley ɗaw. Ama ndaw ana ka mey ta dəba kakay, ha kasl ka me ndəvey ana na, ndaw aŋga na na, a da buwama. 23Kendzey a harəmakwar da wuraw ana na, hwam a wuraw mekelehe. I ɓadakwar dərkana, ka da ndasladəmata ha wuraw ma Israyel hay, mandzara Bəzey ma ndaw ka mawa kakay. 24Ndaw me tetəkey tek na, a fəna miter ŋga kakay; kwa gawla ma 'ay a fəna bay ma ’ay ŋga kakay. 25Ndaw me tetəkey tek na, akwa a key na, kassla andza ma miter aŋga na tsa; arka gawla ma 'ay tey na, a key na kassla andza ma bay ŋga na. Ka zəlama bay ma 'ay ba Belzebul na, a da zələmata ndaw ma 'ay a hay na, afəna, kakay ɗaw?
Wesey na ta Bay'ərlam
(Mk 8.38; Lk 9.26; 12.2-9)
26Ka da wasadəmata zlay! Tek ma kəzla na hay a da nəkam. Guma ma tsaya ta masasuɗok ana hay, a da tsənam. 27Guma ɗaw na i ma tsakwar da ləvaŋ ana na, wudadama ta rəpas, na kuray ma tsənadama ta me sesəkwey ana na, taləkadama mey ka mazaŋ. 28Ka da wasadəmata ta ndaw me kəɗey tapay ma vaw ana dada, amana a slafama me kəɗey mezek kakay ana, zlay, wasam haya dzadzak na, ta Ndaw ma slafa ma zəɗada mezek ta tapay ma vaw adzay, a waw ma laɓa na. 29Ka sisey asləta na, a vəlam bəzey ɗiyeŋ hay tsew kava, kakay ɗaw? Amana kwa asləta da huɗa a kəlawa ka dala, mandzara Baba kwar ka sərafa kakay. 30Haɗaw kuray ana tey na, kwa mbez 'ar a kwar hay tekeɗe na, ma mbəsla hiya ba tabiyaha. 31Ka da wasam zlay, hərway ka nafam ka fənəmata bəzey ɗiyeŋ hay tabiyaha. 32Kwa way way ma ɓada ka slam dey ma ndaw hay ŋga ndaw a ɗaw na, i da ɓada ka tsakay ma Baba ɗaw da 'ərlam ŋga ndaw a ɗaw tiyatsa. 33Ama kwa way way me ləvey ka tsakay ma ndaw hay waya a səradaya kakay na, i da ləvey ka tsakay ma Baba ɗaw da 'ərlam, i sərada ŋga na kakay tiyatsa.
I zəgawa na zozoy kakay, amana sleɗ ma tsakay
(Lk 12.51-53)
34Ka da dzalam da 'ar a kwar, i sawa ka dala na, i zəgawa na zozoy zlay, i sawa i zəgawa na zozoy kakay, ama dzadzak na sleɗ ma tsakay. 35Ayaw, i sawa na, ma da wanəkadata ndaw ka vaw ta baba ŋga, dem ta may ŋga. Ma da wanəkadata kokwa ba ka vaw ta maya ma zel aŋga. 36Ma da tərey ndaw dugwan na, ndaw ma veɗ 'ay ma 'ay ana hay.
Ma mətada ’ar ta bay ’ar ma vaw ɗek ana, me səpey Yezu
(Mk 8.34-35; Lk 14.26-27; 9.23-24)
37Ndaw ana ma wuɗa baba ŋga, dakay may ŋga a fəna yah na, ŋga na ɗa ndaw aɗaw aha kakay. Ndaw ana ma wuɗa wawa ŋga, dakay dem aŋga a fəna yah na, ŋga ɗa ndaw a ɗaw aha kakay. 38Ndaw ana ma zəga tuwaw aŋga ma gazləlaha na, ma səpaya bəzay kakay na, ŋga ɗa ndaw a ɗaw aha kakay atsa. 39Ndaw ana ka wuɗa mendzey ŋga ba na, a da zəɗada. Ndaw ana ma zəɗada mendzey ŋga ba, hərway ɗaw tey na, a da ndzafa.
Ndaw ma wam vaw ka maslaŋ ma Yezu hay
(Mk 9.37, 41; Lk 9.48; 10.16; Zŋ 13.20)
40Ndaw ma ŋgəlakwar na, a ŋgəley na yah ana. Ndaw ma ŋgəlaya na, a ŋgəley na Ndaw ma sləradiyawa na. 41Ndaw me ŋgəley ndaw sek, hərway ŋga ndaw sek aha na a da ndzefey masa ma ndaw sek ana. Arka ndaw me ŋgəley ndaw dzerey aha, hərway ŋga ndaw dzerey aha na, a da ndzefey masa ma ndaw dzerey ana. 42I ɓadakwar dərka na, kwa way way ma vəlar yam vəliyem pal ma taslaha a bəzey bəza ha, hərway ŋga gawla ɗaw na, dərka na, masa ŋga a da zəɗey aha kakay.
Արդեն Ընտրված.
Matiyew 10: MOF
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Le Nouveau Testament en langue Mofu © 2007 Alliance Biblique du Cameroun