Génesis 15
15
Esenetaa Abaranne jaun rausiaeca Cana Coaunerane
1Nii baiha jetaote, Abaran sinihu rai ecocohin jetao:
“Jiaonriha casiin neeinera, Abaran. Canune, ii beraicheeunnicha, nabana chatohaneein chetiha chatohaneine coataara. Quere tonoraain neeinene, jataain banejelanaala ichei cainareeunnicha”, naa rai Cana Coaunerane jaun jetaote:
2-3“Itolere Curuaanaa Cana Coaunera, chaquena nelatere carai jataain banejelanaala, carai cainaaine nihanatiin. Iite raotojoeein coitucuhi leinjiinniji neniha canu calaohinera. Jaiti leinjiinniji canu calaohi teneeine jaunte, satiin carai nii iicha teeni neroraneein nereein, leinjiin canu cachaauru aina, canu cachaneein nenaa Damasoco cocoaicha Eliezera”, naa Abaranne jaun jetaote:
4“Nii ichei quiicha teeni neroraneeinte nereein ii calaohi; coatiha nejelau cacha nerora nerihaain”, nae jetao rai Cana Coaunera.
5Niritiin jetaote, airiniha Abaran amaain jetao:
“Caohachaain caa dede que nenaa arasijie coaraain, janiina naineeine janiichura. Caa arasijie iicha coarai jeeoneeinte, janiinacajelanaala nefaaurureein ii nefoerateeurura”, naa rai Cana Coaunerane jana, 6esenetaa Abaranne jaun jetaote, rai cachaneein raelu Cana Coaunera, cacha caohachaneein teein, itolere bana caohacha ichaeraneein nihane que airijiin.
7“Canune ii Coauneraneein caldeeocuru atane que nenaa Ur nese jelai caje ii mitaaunlu, canu esenetaeraneeine cainaa ichei caa atane tihanune coinara”, nae jetao rai Cana Coaunera.
8Niritoha raine jana jetaote: “Chatohaneeina caraineein nedaaeneniha caa atanene coitucureeunte, Curuaanaa Cana Coaunera, que arajiin niha cacha natiin”, naa Abaranne jana jetao:
9“Carai nichata jaanacaananai nejesina janijiin leinjiin baca narejeen, leinjiin cabara narejeen, leinjiin carenero narejeen, leinjiin serori aao, leinjiin rohiri aao, naaonjoaihunri uhaaura”, naa Cana Coaunerane jaun jetaote, 10caje nii, Cana Coauneraacha bajai irihuru amaain jetao, cataaun tatunajaain, ita jeraniha sichurunajae Abaraaun. Ne jetaote laen, cataaun tajaaecuru tatuhene. 11Nitohaneein niicha tei irihuru cohichuru que fauhacoaa ichotarine jana jetaote, sitanajae nii Abaran. 12Inae nocohejihane jana, jataain sinitoha Abaranne jana jetaote, luhecotariin jataain nocohena nihajaaintohane jaun, coasiha nesoonetohane jana jetaote:
13“Nejelau ataneute, cairichaaerinojoineein nejelau cachaauru letononeein, jena fasha jaanacaneein ichaoha cuurureein ii inamacoorura. 14Nena, inae cuu tihane bana canuhetonai, nii rai letononeein acaauru sirichaauru cachaauru cairichareeunnicha. Nii baihate laen, jelai caje amuhin raotojoeein nichao que ichaohin itolere sirichaneein neeurureein ii inamacoorura.
15Iite oha curiquiin biinaaneein, chaque tonajelanaala. Nii banate, ichohitucueracuru aina jiniiquiin niha curiquiincha.
16Nii baihate laen, jena saain nichoalateeuruhane cuhane, caa jelaiha turuha uurureein ii inamacooru; jaiti abaantana nainenihanune jaan que tiaain baaso ichaain canu baijiaauruha Amoreeocurune que turuenihane jaunna jaiti inara rai atane tenaa naineneeunra”, nae jetao Abaran rai Cana Coaunera.
17Nii jana jetaote, inae caohacha nocohenanijiane jana jetao, ecocoe leinjiin usi tabai. Nii jana jetaote, nii irihuru cohi tatunojoihuru cataaun situha cue leinjiin siricho tocohaneein lanalanaquiin. 18Nitohanihane cojoanonaa bana jetaote:
“Satiin caa atanene tereeunni ii inamacooru rai, nucuhe Egipto caje coaauneein, nucuhe jaraaoti Eufrates tiaaincha. 19Acate, Ceneos, Cenezeos, Cadmoneos, 20Ititia, Ferezeos, Refaitas, 21Amoreo, Cananeos, Gergeseos, Jeboseos, naaonjoaihunri atanenera”, naain jetao, Abaran cojiotae Cana Coaunera.
Արդեն Ընտրված.
Génesis 15: URA
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2005, 2024, Wycliffe Bible Translators, Inc.