Génesis 6
6
Cana Coaunera rai rautanaacojoai ichacureniha cachaaurune
1-2Inae cacunucohacoaain arajiin nefaauruha cana rai chauratane sacuritaain Cana Coaunera coitucuuruhi cachaaurune jana jetaote, nii Cana Coaunera coitucuuruhi cacunucuru coaracuruha Cana Coaunera coitucuurerane jana, caohatonanacuruhane jaun jetaote, niicha jerecuri enecuru que necoasaijiaaure nii Cana Coaunera coitucuureraauru cachaauru.
3Nii jaun jetaote:
“Coatiha inoaelu netiin ichaoha cachane jererihaauni, raujiaain jaberoco nejesina neeuruhane jaun. Nii jaunte, lefasha coroata choonca jaanacanejeeincha ichaoorureein cachaaurura”, nae jetao Cana Coaunera.
4Nii Cana Coaunera coitucuhichuru cachaauru cacunucuru que necoasaijiaain calaohichuruha Cana Coaunera coitucuureraaurune jana jetaote, caa cana rai chauratane que ecoojoacoaaurelu jataain cacha tabaihuri. Acaauru jetaote, inoaelu cacha inoaesineein itolere que laraajiin, satiin cachaauru coitucunojoineein neeurelu. 5-6Nitohaneein caa cana rai chauratane que jataain baasoneein ichaooruha cachaaurune coaraane jaun jetaote, jataain cachaauru coaaunaane que jetao nererojoecae Cana Coaunera, itolere bana baaso nejesina ichajeein ichaonaa jerecuruha cachaaurune jaun. 7Nii jaun jetaote: “Caa chauratane que quiicha coaaunaauri cachaauru itajiaanunete nera. Itolere lauri lauri quiicha coaaunaauri nenaanajau irineein nenacaauru, atane choae terei, atane choae tijiarohin, amunacaauru, naaonjoaihunri aina tajaaecurune maajeein itajiaanunete nera. Jataainne netojoeetoon acaauru coaanaanulune quera”, nae jetao Cana Coaunera.
8Ne jetaote, nii bana leinjiin Nohecha jerihane rijijieein caohachaain ichaohane jaun jetao, leinjiin acaacha belaain coarae Cana Coaunera.
Cuhane nichotihane coina bote jaa Nohene
9“Naaonjoaain jetaote, ichoaelu Nohe”, Nohe ichao que erenaa.
Inoaelu jetaote, aihureniha nii bana nainiha nenacaauru cachaaurune jana, leinjiin Nohecha caohachaain jeriha Cana Coaunerane rijijieein ichaohin nerejetelu. 10Nii jana jetaote, neeurelu nichatajaain Nohe calaohichuru, Sem, Cam, Jafet, naaonjoaihunri.
11-12Nii bana jetaote, jataain baasoneein caa cana rai chauratane que ichaohin nejesinajeein ita cunaitaain naaonjoaaurelu cachaauru. Nii rautaain coaraenihane jaun jetaote, jataain baaso ichajeein ichaooruha cana rai chauratane que cachaaurune jaun jetao, Nohe rai:
13“Inae caa cachaauru itajerichaaunni. Raajenihane baasoneein ichaohin, nejesinajeein ita cunaitaain naaonjoaauruhane jaunne caa chauratane aina curuaecaain itajenajareeunni.
14Inae nitohaneein caa chauratane aina cachaauru itajerichaaunine jaun, enuha sacarii caje leinjiin bote tabai jaau. Chaaen caohatiin cuhane ucuhacuru jaain, caohatiin cuhane, nichoajai, naaonjoaihunri cousineeu murane que, nabana cuhane enoha acaune coataa. 15Lefasha nichata choonca saoqui metorohi careteein, coroata choonca coroata metoro cataaun uujueein jaratonoteein ichaau. Jana nucuuno, lechoonca nichata metoro cataaun uujueein ichaau. 16Inae nii bote nainaaine, nichata buriin coarana teeu. Le jera que nenotaaine jaanu que acuujua jaau, le metoro cataaun uujueein janori fautaain. Jana leeocha jera que jaraaotiin enonaanajaanu que bacuujua teeu.
17Inae elo tabai nalarichaaunni, caa cana rai chauratane lemueranu que. Nii banate, ohacoaaurureein satiin caa cana rai chauratane sacuritaain que ichaonacaauru. 18Nena laen caa ichei aitocoaaunne tonoraain ichaaine ii coroatajanereeunni, ii calaohichuru, ii comasai, chacanacuru, ii, naaonjoaineeichene bote cuhane enohin nichoteeiche acau tabai cajene coina. 19Chaaen ijiniichaain bote cuhane, caa chauratane sacuritaain lauri lauri ichaonacaauru enoaau, leinjiin curuaanaa, leinjiin bene, naaonjoaain jerichanejeein ijiniichaain ichaaoruhane coinara”, nae jetao Nohe rai Cana Coaunera. Niritiin jetaote:
20“Ijiniichaain coroatajaananaain lauri lauri nunaanau ichaonacaauru tajaaecuru enoaain, nenaanajau lauri lauri irineein nenacaaurune maajeein enoaau bote cuhane, jerichanejeein ijiniichaain acaauru netonai ichaohin neeuruhane coina. 21Chaaen inara ichaonajaanu que itolere taojiaain rucuhecute, neeine nii inara aina bote cuhane nenacaauru ichaonajaanura”, nae jetao Nohe rai Cana Coaunera.
22Niritoha rai Cana Coaunerane jaun jetaote, nii rai naitoonjoan rijijieein ichaain nainaelu jetao Nohe.
Արդեն Ընտրված.
Génesis 6: URA
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2005, 2024, Wycliffe Bible Translators, Inc.