Ծրագրի մասին

Աստծո խոստումները Քրիստոսին Տեր և Փրկիչ ընդունած զավակներինՕրինակ

ՕՐ 6 7-ից

Քո իրավիճակը կատարյալ չէ, բայց Աստված է կատարյալ

Սիրելի՛ բարեկամ, մեր կյանքում լինում են պահեր, երբ թվում է, թե ամեն ինչ սխալ է և կարծես ամեն բան դասավորվում է այնպես, որ մենք կորցնենք մեր խաղաղությունն ու ուրախությունը։ Բայց որքան էլ զարմանալի լինի, երբ մենք նման արգելքների ու դժվարությունների ենք բախվում, հենց այդ ժամանակ մի գերբնական ձեռք մեզ օգնում է վեր բարձրանալ այդ ամենից ու հաղթահարել բոլոր խոչընդոտները։

«Մենք Աստծով պիտի զորություն գործենք, և Նա պիտի ոտնակոխ անի մեր թշնամիներին» (Սաղմոս 108․13)

Տեր Աստծո հետ դու կարող ես զորավոր գործեր գործել։
Քո կյանքի բարդ, մտահոգիչ և անհանգստացնող իրավիճակներում Նա տալիս է քեզ Իր զորությունը, խաղաղությունն ու քաջությունը։
Նա ամենակարող է և ելք է պատրաստել անվերջանալի թվացող քո խնդիրների մեջ։
Նա ի զորու է ջախջախելու քո բոլոր հոգևոր թշնամիներին և նրանց փախուստի մատնել քո կյանքից։

Աստծո համար թանկ ու սիրելի՛ զավակ, եթե դու ծանր իրավիճակում ես, ուզում եմ, որ հստակ գիտակցես, որ Աստված տեղյակ է և Նա գիտի ամեն բան։ Քաջալերում եմ քեզ քննելու քո անձը և քո հավատքը։ Անգամ քո բոլոր դժվարությունների մեջ ամենակարևոր հարցը Տիրոջ պաշտպանության ներքո լինելն է։ Քո հավատքն ու վստահությունը Տեր Աստծո վրա դի՛ր։ Աղոթի՛ր և սպասի՛ր Նրա օգնությանը։ Ապրի՛ր Քրիստոսի աշակերտի կյանքով և թույլ մի՛ տուր, որպեսզի կյանքի դժվարությունները քեզ հեռացնեն քեզ անսահման մեծ սիրով սիրող քո երկնային Հորից։

Հիմա ուժով և վստահությամբ հաստատակամ մնալու ժամանակն է։ Ընդունի՛ր Աստծո շնորհը, որպեսզի կարողանաս իրավիճակներին նայել Տեր Աստծո աչքերով, զգալ Նրա զորությունը և ականատես լինել քո կյանքում Տիրոջ հրաշքների վկայությանը։

Ե՛կ աղոթենք միասին այս աղոթքով. «Իմ Աստվա՛ծ, Դու գիտես իմ կյանքի բարդ իրավիճակը։ Այն երկար ժամանակ տանջում է ինձ, և ես անզոր եմ իմ ուժերով ու իմ ջանքերով որևէ բան փոխելու։ Սակայն Դու ամենակարող Տեր ես։ Եվ ես խնդրում եմ, որ Քո զորավոր ձեռքով միջամտես ու օգնես ինձ հաղթահարելու իմ կյանքի դժվարությունները։ Շնորհակալ եմ, որ Քո Խոսքի միջոցով փոխում ես իմ վերաբերմունքը իմ կյանքի դժվարությունների հանդեպ։ Դրանք Քո ներկայության քաղցրությունն ու Քո բարության գործերը տեսնելու հրաշալի առիթներ կարող են դառնալ։ Ես հավատում եմ, որ Քո օգնությամբ ես կարող եմ գործել զորավոր գործեր։ Դու իմ սքանչելի Տերն ես ու զորավոր Աստվածը։ Եվ Քեզ հետ ես ավելի քան հաղթող եմ իմ կյանքի բոլոր պայքարների մեջ։ Աղոթում եմ Տեր Հիսուսի զորավոր անունով։ Ամե՛ն»։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։

Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։

Սուրբ Գրություն

ԵՍԱՅԻ 62:8-12

ԵՍԱՅԻ 25:6-9

Բ ՕՐԵՆՔ 33:26-29

ՍԱՂՄՈՍՆԵՐ 80:14-19

ՄԻՔԻԱ 4:1-5

ՄԻՔԻԱ 7:7-10

Օր 5Օր 7

Այս Ծրագրի Մասին

Երբևէ լսե՞լ ես, թե ինչպես է մայրը արձագանքում, երբ երեխան վայր է ընկնում ու սկսում լաց լինել, ինչպես է նա գրկում երեխային, ստուգում վնասվածքները և մխիթարում նրան։ Եթե դու էլ կյանքի քո ընթացքի մեջ վայր ընկել ու ցավից փոքր երեխայի պես ուզում ես լացել, ապա այս առավոտ առաջարկում եմ լսես, թե ինչ է քեզ ասում քո երկնային Հայրը․ «Իմ գրկում մնա․․․, ամեն բան կանցնի, ամեն բան լավ է լինելու…»։

Մենք ցանկանում ենք շնորհակալություն հայտնել hisus.am-ին այս պլանը տրամադրելու համար: Լրացուցիչ տեղեկությունների համար այցելեք՝ https://hisus.am/

Հրատարակչի մասին