Luka 21
21
Chiwo mar chi liel
1Yesu noting’o wang’e, moneno ka jomwandu bolo chiwogi e sandug sadaka mar Hekalu, 2to bende noneno chi liel moro modhier ka golo ndururu ariyo. 3Eka nowacho niya, “Adier awachonu ni chi liel modhierni osegolo chiwo maduong’ moloyo ji mamoko duto, 4nimar ji mamoko osechiwo mana gik ma gigolo kuom mwandugi. En to, kata obedo ni odhier kamano, to osechiwo duto ma dokonyrego.”
Yesu ohulo ni Hekalu ibiro kethi
(Mathayo 24.1-2; Mariko 13.1-2)
5Jomoko ne wuoyo kuom Hekalu, kawuoro kaka olose gi kite mabeyo kendo kaka mich michiwoe ni Nyasaye long’o. To Yesu nowachonigi niya, 6“Ndalo biro ma onge kata mana kidi achiel kuom gik munenogi duto ma nodong’ kochung’ ewi wadgi, to giduto nowitgi piny.”
Chakruok mar masiche mabiro
(Mathayo 24.3-14; Mariko 13.3-13)
7To ne gipenjo niya, “Japuonj, gigo notimre karang’o? Koso ang’o ma notimre manyisowa ni kindeno chiegni?” 8Yesu nodwokogi niya, “Beduru motang’, mondo kik wuondu, nikech ji mang’eny nobi gi nyinga, kawacho ni, ‘An e en,’ kendo ni, ‘Ndalo chiegni.’ To kik uluwgi! 9Bende kik ubed maluor kuwinjo humb lwenje gi koko, nikech gik ma kamago nyaka kwong timre, to mano ok onyiso ni giko mar piny chiegni.” 10Nodhi nyime kowacho ni, “Ogendini noked gi ogendini wetegi, kendo ruodhi bende nomonj ruodhi wetegi. 11Piny noyiengni matek, kendo kech gi tuoche nobedie kuonde mopogore opogore. Gik malich mabwogo ji, kod honni madongodongo bende notimre e polo mondo obed ranyisi.
12“To kapok gigo duto otimore, to nomaku, mi sandu, kendo noteru mondo oyalu e nyim jodong ut lemo, mi ketu e jela. Bende giniteru e nyim ruodhi kod jodongo nikech an. 13Mano e thuolo ma unuyudi mar hulo gik museneno. 14#Luka 12.11, 12.Emomiyo keturu chunyu mondo ung’e ni ka kindeno ochopo, to ok unuchandru kuom paro gima dudwoki, 15nikech an ema namiu weche kod rieko ma onge wasiku kata achiel ma nosir kata nokwer. 16Kata mana jonywolu gi oweteu gi wedeu kod osiepeu nondhogu, kendo ginichiw jomoko kuomu mondo onegi. 17Bende ji duto nobed mamon kodu nikech an. 18To kata kamano, onge kata yie wiu achiel ma nolal. 19Omiyo timuru kinda, nimar mano e kaka unuyud ngima maradier.
Yesu ohulo ni Jerusalem ibiro kethi
(Mathayo 24.15-21; Mariko 13.14-19)
20“Ka uneno ka ogend lweny olworo Jerusalem, to ng’euru ni kinde mikethee osechopo! 21Kuom mano, joma nie piny Judea nyaka ring dhi pondi e gode, kendo joma ni Jerusalem nyaka wuog oko, bende jogo man oko kik duog Jerusalem, 22#Hos 9.7.nimar mago nobed ndalo ma Nyasaye kumoe joge, mondo weche duto mondiki e Muma otimre. 23Mano kaka nobed malit e ndalogo ni mon mayach kod mon man gi nyithindo mapod dhoth, nikech chandruok maduong’ nobed e piny, kendo jo-Israel noyud kum malit. 24Moko kuomgi noneg e lweny, to moko nomaki mi ter e pinje mamoko duto, kendo ogendini ma ok jo-Yahudi nonyon Jerusalem nyaka chop ndalo lochgi rum.
Biro mar Wuod Dhano
(Mathayo 24.29-31; Mariko 13.24-27)
25 #
Isa 13.10; Ezek 32.7; Joel 2.31; Fweny 6.12, 13. “Ranyisi nobedi e wang’chieng’ gi due kod sulue, kendo ogendini mae piny nobed kodhier nono, kendo ka luor, nikech nam nowuo, kendo apaka nogore madongodongo. 26Luoro nomi chuny ji ling’re nikech gik mabiro timore e piny, kendo teko momako sulue e polo bende noyiengni. 27#Dan 7.13; Fweny 1.7.Eka Wuod Dhano nothinyre, kabiro e bor polo gi teko malich kod duong’ maler. 28Ka gigo ochako timore, to chung’uru tir, kendo ting’uru wiu, nikech warruok maru okayo machiegni.”
Puonj miyudo kuom yadh ng’owo
(Mathayo 24.32-35; Mariko 13.28-31)
29Bang’ mano, Yesu nogoyonigi ngero niya, “Par ane uru yadh ng’owo kod yien mamoko. 30Ka uneno ka bedegi chako loth, to ung’eyo mak ng’ato onyisou, ni ndalo chwiri chiegni. 31Kamano bende, ka uneno ka gik ma asewachonugo timore, to unung’e ni Loch Nyasaye ochopo machiegni. 32To nyaka ung’e ni gigo duto notimre kapok tieng’ ma kawuononi otho duto. 33Polo gi piny norum. Wechena to ok norum.
Puonj kuom bedo motang’
34“Ritreuru mondo kik utim anjawo, kata kik ubed jomer kata joma parore kuom gik manie pinyni, nono to chieng’no biro poyou mana ka obadho, 35nimar enopo ji duto modak e piny. 36Omiyo beduru motang’ kulemo pile mondo uyud teko mar tony e gik mabiro timore duto, kendo uchung’ e nyim Wuod Dhano.”
37 #
Luka 19.47. Pile Yesu ne puonjo e Hekalu godiechieng’, to gotieno ne odhi onindo e got miluongo ni got Zeituni. 38Ji duto ne mondo e Hekalu gokinyi mang’ich mondo owinj puonjne.
Pilihan Saat Ini:
Luka 21: DHO15
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Dholuo DC Bible © Bible Society of Kenya and Bible Society of Tanzania, 1976.