Luka 4
4
Satan otemo Yesu e thim
(Mathayo 4.1-11; Mariko 1.12-13)
1Yesu noa Jordan kadok thurgi kopong’ gi Roho Maler. Roho ne telone e thim koni gi koni 2kuom ndalo piero ang’wen ka Satan teme. E ndalogo duto ne ok ocham gimoro, omiyo kane ndalogo orumo to nowinjo ka kech kaye.
3Satan nowachone niya, “Ka in Wuod Nyasaye adier, to nyis kidini olokre kuon.” 4#R.Chik 8.3.To Yesu nodwoke niya, “Muma wacho ni, ‘Dhano ok nyal bedo mangima nikech chiemo kende.’ ”
5Eka Satan notere e wi got malo, monyise pinje duto mag piny ka diemo wang’. 6Nowachone ni, “Abiro miyi loch mag pinje duto gi dwong’gi nikech nomiyagi kendo anyalo miyogi ng’ama an ema ahero. 7Emomiyo kigoyo chongi piny milama, to magi duto nobed magi.” 8#R.Chik 6.13.To Yesu nodwoke ni, “Muma wacho ni, ‘Ng’ato nyaka lam mana Ruoth Nyasache kendo en kende ema nyaka otine.’ ”
9Eka Satan notero Yesu Jerusalem mi okete e osuch Hekalu, kowachone niya, “Ka in Wuod Nyasaye adier, to chikri piny, 10#Zab 91.11, 12.nikech Muma wacho ni, ‘Nyasaye biro keto malaikane mondo oriti.’ 11Bende ondik ni, ‘ginitayi gi lwetgi mondo kik ichwany tiendi e kidi.’ ” 12#R.Chik 6.16.Yesu to nodwoke niya, “Muma wacho ni, ‘Kik item Ruoth Nyasachi.’ ”
13Kane Satan osetieko temo Yesu, e yore duto kamano, ne oweye nyaka chieng’ machielo.
Yesu ochako tiyo tichne Galili
(Mathayo 4.12-17; Mariko 1.14-15)
14Eka Yesu nodok Galili gi teko mar Roho Maler, kendo humbe nolak e gweng’no duto. 15Ne opuonjo e ut lemo, kendo ji duto ne opuoye ahinya.
Jo-Nazareth odagi Yesu
(Mathayo 13.53-58; Mariko 6.1-6)
16Bang’e Yesu nodhi Nazareth, kuma ne odongoe, kendo chieng’ Sabato, ne odhi e od lemo, kaka ne ojatimo. Nochung’ mondo osom Muma, 17mi omiye kitap janabi Isaya. Ne oelo kitabu, mosomo kama ondikie niya,
18 #
Isa 61.1, 2. “Roho mar Ruoth Nyasaye ni kuoma,
nikech oseyiera mi owira,
mondo aland Wach Maber ni joma odhier.
Oseora mondo ahul ni joma otue ni koro ogonygi,
kendo ni muofni ni oyaw wengegi,
bende ni, mondo ahul ni joma isando ni giyudo thuolo
19kendo oseora mondo ahul ni,
ma e higa ma Ruoth Nyasaye biro resoe joge.”
20Kane Yesu nosesomo wechego, noumo kitabu, mi odwoko ni jatich od lemo. Eka nobet piny mondo opuonji, kendo ji duto mane ni e od lemo ne jochomo wang’gi kuome. 21Nowachonigi niya, “Tinendeni, wach musewinjo kisomonuno ochopo kare.” 22Jogo duto nopwoye ahinya, kendo ne giwuoro weche mang’won mane wuok e dhoge, mi gipenjore ni, “To donge jali en wuod Josef?” 23Nowachonigi niya, “Ang’eyo ni ubiro goyona ngero ni, ‘In jathieth, thiedhri ane iwuon.’ To bende ubiro wachona ni, ‘Wasewinjo gik mane itimo Kapernaum, to koro timgi ane e pinyu ka!’ ” 24#Joh 4.44.Eka nomedo wachonigi ni, “Onge janabi ma ji yiego e dalagi owuon. 25#1 Ruo 17.1.Adier awachonu ni ne nitie mond liete mang’eny e Israel e ndalo Elija, kane koth olal kuom higni adek gi nus mi kech maduong’ omako piny duto. 26#1 Ruo 17.8-16.To ne ok oor Elija ir moro kata achiel kuomgi, to mak mana ir chi liel ma nyar piny moro nono e dala mar Zarefeth e piny Sidon. 27#2 Ruo 5.1-14.Bende ne nitie jodhoho mang’eny e Israel e ndalo janabi Elisha, to onge kata achiel kuomgi mane ochangi, mak mana Naaman ja Siria.”
28Kane ji mane nie od lemo owinjo wechego, mirima mager nomakogi giduto. 29Ne gichung’, mi gichwalo Yesu gigolo oko e dala, ka gitere e wi got kama ne ogerie dalagi, mondo gidhire piny kathirathira, 30to nokadho akadha e kindgi moa odhi.
Ng’at man gi jachien marach
(Mariko 1.21-28)
31Bang’e Yesu nodhi dala mar Kapernaum e piny Galili, mi opuonjo ji kuno chieng’ Sabato. 32#Math 7.28, 29.Ne giwuoro kaka opuonjo, nikech wechene ne nigi teko. 33To ne nitie ng’at moro e od lemo kanyo, mane nigi jachien marach. Ne okok matek niya, 34“Yaye, Yesu ja-Nazareth, ilaro ang’o kodwa? Isebiro mondo itiekwa koso? Ang’eyi! In Ng’ama Ler moa kuom Nyasaye!” 35To Yesu nokwero jachiendno niya, “Ling’ kendo wuog ia kuom ng’atni!” Jachien marachno nogoyo ng’atno piny e nyimgi, mi owuok kuome ma ok ohinye ngang’.
36Ji duto mane ni kanyo nohum nono, mi giwacho e kindgi giwegi niya, “Magi weche manadi ma owachogi? Okwero jochiende gi teko maduong’ kendo giwuok awuoka!” 37Kamano humb Yesu nolandore kuonde duto e gweng’no.
Yesu ochango ji mang’eny (Mathayo 8.14-17; Mariko 1.29-34)
38Yesu noa e od lemo mi odhi e od Simon, to min chi Simon ne nigi tuo midhusu matek, omiyo ne gikwayo Yesu mondo ochange. 39Yesu nodhi mochung’ e bath dhakono, eka nokwero midhusu, mi midhusu oweye. Gikanyono noa malo motiyonigi.
40Kane chieng’ podho, ji duto mane nigi joma tuo tuoche mopogore opogore nokelo ir Yesu, mi Yesu noketo lwete kuom moro ka moro, mochangogi duto. 41Jochiende bende nowuok kuom ji mang’eny, kaywak ni, “In e Wuod Nyasaye!” To Yesu nokwerogi, motamogi ni kik gilosi, nikech gin ne ging’eyo ni en e Mesia.
Yesu olando Wach Maber e ut lemo
(Mariko 1.35-39)
42Kane piny oru, Yesu nowuok modhi kar kende e thim. Ji nochako manye, kendo kane ginwang’e, ne gitemo geng’e mondo kik oa kuomgi. 43To nowachonigi niya, “Nyaka aland Wach Maber mar Loch Nyasaye e mier mamoko bende, nikech mano e gima ne oora mondo atim.” 44Kamano ne olando Wach Maber kuonde duto e ut lemo mag jo-Yahudi.
Pilihan Saat Ini:
Luka 4: DHO15
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Dholuo DC Bible © Bible Society of Kenya and Bible Society of Tanzania, 1976.