JOHONIN 1
1
Johon ei maziak Thangahui
1Aphuta chong a om, chong chu Pathian koma om. Hatuka chong ha Pathian. 2Hava ha anphuta Pathian kom a om. 3Alompeia aman ei sin zit. Alompeia aman ei sin nok ite om mak. 4Ama koma han damna a oma, hava damna ha mitin ranga ra-ang ei ni. 5Hatuka hava ra-ang ha azing kara ahong ela, tenchu azingin lei riat mak.
6Pathianin ei hong tir mi khat a oma, a raming chu Johon. #Mt 3.1; Mk 1.4; Lk 3.1-2 7Ra-ang rui ahong anriat ranga ama chu anriatpu anga ahong ei ni. Ama zara mi doran ei iam theina ranga. 8Ama chu ra-ang nimaka, tenchu ra-ang rui ahong anriat rang ngala ahong keng. 9Ra-ang tatak mitin a el chachak ha a oma, Ramuala ei lei hong lai tak ania.
10Ama chu ramuala ei om, ramual hi aman, ei sin anina tenchu ramualin lei riat lai mak. 11Ama a ningneina le ahonga tenchu ama ami ngai lele han lei pom u mak. 12Hanum nisela, ama aleia pom dora ranga le ama raming aleia iam ngai ranga Pathian nai ni theina a pek. 13Hava mi ngai chu thisen atam nimak, taksa ei zotam nimak, miring ei zotam nimak tenchu Pathian ata asuak ngal keng.
14Hatuka hava chong ha taksa ahong anchanga, koini bila ahonga oma, Pa han Naipasal ei nei selep ei lian pui anga ama ei lian chu nei mu. Ama chu lungkham le ataka abit ani.
15Johonin ama rui tak ha ahong manriata hatuka ankheka, “Arui keina ril u ha ama hi ani zei, ‘Ka nuka ahong han ei na khel keng, ama chu ka mana aleia omsa ei ni sika,’ ” ati na.
16Koinin ama ei bitna ata alompeia nei man, lungkham chunga lungkhamna nei chang. 17Dan rui chu Mosi kom ei pek, lungkhamna le atak chu Isua Krista zara ahonga tung ei ni. 18Tenchu Pathian hi tuten amu la om ngai maka, A Pa ketora a om, Naipasal selep han keng ama rui ahonga ril.
Krista rui Ariat Baptispu Johon
(Mt 3.1-12; Mk 1.1-8; Lk 3.1-18)
19Hatuka Juda ngaiin, “Tumo na ni?” atia; Jerusalem ata chaizung le Levi chi na mi ngaiin ama ankel ranga mi atir u na. Hatuka Johonin hiva chong hi a lei manriata. 20Hankeng aman, “Krista ni makung,” atina ip thak luia a puanga.
21“Hanle tu ngal mo na ni?” atina arakel u na. “Eliza mo na ni?” ati u na. Aman, “Ni makung,” ati na. “Hanle deari mo na ni?” atia arakel ret u na.Aman, “Ni makung,” ati na a masanga. #Dan 18.15,18; Mal 4.5
22“Hanle tumo nei ni?” ati u na. “Mi ana honga tir ngai koma nei va masang thei na ranga nang na ruia hin imo nei anti na ril ro,” ati u na.
23Hatuka aman, “Koi hi philchar rama ankheka apuangpu ka ni zei: Deari Isaiin ei ti anga, ‘Puma alampui chu mandin u ro! kei ti,’ ” atina. #Isa 40.3 (LXX)
24Ei tir u ngai ha Pharisi ngai bila mi ani u na. 25Hatuka akoma, “Krista le nimak che na, Elizam nilai mak che, Dearim nimak che na, hanle ichangamo baptisma nei pek chachak?” atia arakel u na.
26Hatuka Johonin amani kom, “Koi chu, tina baptisma kei na pek u, tenchu na kar u na nei riat u nok mi khat andinga a om. 27Ama ha ka nuka ahong ani ngalam a kekok khitna ri ngal asut rua ni makung,” ati na.
28Hiva rui ngai dora ei omna chu Jordon va rala Bethani khuana Johonin Baptisma ei pek chachakna mun han.
Isua Pathian Berate
29Hanuk nikhuana han Isua chu akoma ei hong alei muna, “Enta, Pathian Berate ramual pap achoi rang so, ati na. 30Sova mi arui tak so kei ril ani zei, ‘Ka nuka mi ahong hi ka neka alian keng, asik chu ka mana aleia omsa ngal keng.’ 31Ama hi kei hong riat nok, tenchu Pathianin Israel ngai kom ei manlang theina ranga, koiin chu tina baptisma kei hong pek,” atina. 32Hatuka Johonin ariatphata, “Ratha chu pharvali anga van ata ei honga ama chunga ei hong om kei mu, ati na. 33Ama hi kei hong riat nok, tenchu tia Baptisma apek ranga ana honga tirpu han, ka kom ei na ti chu; ‘Ratha ei hong chuma ei hong omna mi tak ha Ratha Anthiang le baptisma apek ani zei,’ ati na. 34Hatuka ka mu sua ata chu ama hi Pathian Sapa atia kei riat ani zei.”
Isua Zolai Mansa ngai
35Hanuk nikhua reta chu Johon le a zolai ngai anni anding rit u na. 36Isua ha kal achoia ahong lai tak han Johonin alei muna, “En u ta, Pathian Berate so,” ati na. 37Hatuka a zolai anni ngai han ama chong ariat u le chu Isua nuk ava zi u na. 38Isua anhoia ama a nu nuk ei hong zi u alei mu na, “Imo nei hong thun u?” alei ti na.
Amanin, “Rabbi,” ati u na. ‘Rabbi’ ti omzia chu “Minchupu” tina ani. “Honmo nei omna?” ati u na.
39Aman, “Hong u ro mu un na ti,” ati pe na. Hatuka asena ei omna chu ava mu u na. Hava nikhua han chu ama bila a om len u na. Hava lai tak han zoro chu dar manli tang ni zei ni.
40Johon achong ariata Isua nuk azi anni bila angkhat na chu Andria, Simon Pitor a naipa. 41Ama hi a parual Simon antongpui mansa, hatuka akoma, “Koini chu Messia na mu zei,” ati na. “Messia” ti omzia chu “Krista” ei ti na ani. 42Hatuka ama han Isua kom ahong ruaia. Isuan ama tiang alei ena: “Nang Jona naipasal Simon, Kipha lantin na ti.” “Kipha le Pitor” tina chu “lung” ei ti na ani.
Isuan Philip le Nathaniel Apai
43Zing khua avar ret le chu Isua Galili rama ase rang azota hatuka Philip chu amu na; “Ka nuk na hong zi ro,” ati pe na. 44Philip chu Bethsaida khuana Andria le Pitor omna khua dena mi ani. 45Philip han Nathaniel anmu puia, “Mosi dan lekhabuna le deari ngaiin um ama ruia ei maziak u ha koinin chu na mu zei,” atina. Ama ha Nazaret khuana Isua, Joseph a naipasal. 46Hatuka Nathaniel han; “Nazaret khua ata asa angkhatte ngal hi asuak mo thei?” ati na, Philipin, “Hong tan hong en ta,” ati na.
47Isuan Nathaniel chu ama tianga ei hong amu na arui alei rila: “Enta, Israel kara mi dik tak so, a malung sunga anhuangna reng abui thak,” ati na.
48Nathaniel han, “Hontinmo nei na riat?” ati na. Isuan: “Philipin ana kui man ata theichang kung thuaia nei om kei na mu keng,” atia a masanga.
49Nathaniel han, “Minchupu, nang hi Pathian Sapa le Israel ngai reng na ni,” ati na a masanga.
50Isuan, “Theichang kung thuaia kei na mu kei ti sika nei iam mo? Hiva ngai neka rui alian la mun na ti,” ati na a masanga. 51Isuan akom u na, “Atak taka kei na ril ani u zei, van anlong intia Pathian vanpalai ngai chu Miring Sapa chunga ei hong chum le ei kal la mu un na ti,” ati na. #Anp 28.12
Pilihan Saat Ini:
JOHONIN 1: RANGBSI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.