Genese 15
15
1HWABAN ta je ûnyi e ame o thö hofuc ho Iehova kö Aberama hnyi hna omanenâ, haingen, ka habe, Aberama lö, ca ot: inya ang becâm, me troban hobi köu ae ti gan hmâ. 2Ke haingö Aberama, ka habe, Than Iehova lö, ie ûnyi u me he kahna könya, ke inya ang at ae ba nokon, ke haba at ame he ka hwö hwabök hnyi hnya-bak, me, Eliezera at Damaseko? 3Ke haingö Aberama, ka habe, Wâ bi, u je ca hia but ham könya ke mâtrânik: ke wâ bi ame he ka hwabök ju at adre hnokoâ hnyi hnyabak. 4Ke wâ bi, ame o thö hofuc ho Iehova kâu, ka habe, ame ca he ka hwabâm at eling; ke so bi ame he ka hwabâm hing nokom. 5Me e ame su e kâ û, me ha, ka habe, Bwele thö hnyidranyai, me aû thö ta je ohkû, ame ne khanö u he ka aû e: me e ame ha kâu, ka habe, ame he ka helâe ta je mâtrânâm. 6Ke e ame labageju kö Iehova; ke e ame bi haten e kâu me hnân hwakecin ae wisa. 7Me e ame ha kâu, ka habe, Inya Iehova, at ame su u ûhem Ure hnyi Kaledaia, me me he ka ham köu hnyei ang hnân em. 8Me e ame ha, ka habe, Than Iehova lö, ieû haten könya a oge me he ka tren e? 9Ke e ame ha kâu, ka habe, Hom dö könya kâu a kun hunainy, me got momo a kun hunainy, me mamoe baga a kun hunainy, me ke biny, me ke nokon meköta. 10Me e ame hom ta je ûnyi hia e, me kia luâ bi hnyi wanben, me ip ûöûco je ve ec ke keihen: ke a ca hnyi kia luâ li meno ame gâ. 11Ke ame utut ta je meno ûkuc ame gâ ka hnyi hon unyin je meno, ke Aberama ame obâ hmetu. 12Ke haba hnyi ûen a dit seûnö, Aberama ame mokut hnying; ke wâ bi, ame o but kâu ot me menekholom ae gan. 13Ke e ame ha kö Aberama, ka habe, Wâhmakhmeto ju u, haba je mâtrânâm adre me he ka laba kanyua hnyi hnyei a ca idra, ke adre me he ka bi athnyaba ködra; ke adre me he ka oveci ödra vak ta haded ta je huna; 14ke oge me he ka owisa ka hnyei eling minya, adre me bi athnyabainy: ke hwaban dö e adre me he ka he hmetu me omjeû ae gan. 15Ke u ma he ka hnyi he ka je lakâmâm hnyi hnahic; adre me he ka könim u kʼ u hingat kong ut. 16Ke haba hnyi dö ae vakiny adre me he ka hmetu jem: anyin ae tiga ca bekhöt ut konginy at Amora. 17Ke a didrut seûnö, me lit ut, ke wâ bi wahnainyâ ame sâ, me okûnû ame ubâhlâ, kʼ ame he hnyi wanben ta je ec utiö. 18Haba hnyi bong eling Iehova ame ha ûhihinyköu me Aberama, ka habe, Oge hia but ham hnyei ang ka ta je mâtrânâm, hwân hnyi wageweiny Aigupito keneo but wagewe ae gan, wale wagewe Euferate: 19at Keni, me at Kenaza, me at Kademoni, 20me at Heth, me at Perizi, me at Refai, 21me at Amora, me at Kanana, me at Girigasa, me at Jebusi.
Pilihan Saat Ini:
Genese 15: IAAI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
maintained by the British and Foreign Bible Society