Genese 18
18
1KE Iehova ame manen dut kâu hnyi sawajo anyi Mamere, kʼ ame laba hnyi hwanumen umen uma mano hnyi jebigö; 2ke e ame bwele me wâ, ke wâ bi ta hnyat a kun ödrin e tot hnyi hnyimakan: ke e ame ö ʼdrin me wadring dö he ka iouny mödrin ûheny hnyi uma mano, me nom ju hnyikânâi, 3me ha, ka habe, Than lö, u ka na betenge gak, ca he but ka hnö nya a athnyabaem: 4e so adre me sâû utköiö, me ösûâ thö je cabun, ke me menâ ju hmelen ûö: 5ke oge ma hom ong areto, mʼ öbun e okahwa hnyekubun; hwaban dö e he thʼ öbun; anyin a öbun e hia but o ka athnyabaibun. Ke ödrin e ha, ka habe, He thö ka ânyâ helâ me hnâm hna ha. 6Ke Aberahama ame he mweimwei kö Sara eiö hnyi uma mano, me habe, Logotö penapena salawa ae so ama kun ta tulut, op dö, me le je ong areto. 7Ke Aberahama ame wadring ka hnyi hna hat meno, me hom nokon kâu ae moumou me so, me ham ka athnyaba; ke e ame ie penapena e. 8Ke e ame hom bata me debai, me nokon kâu e ame penapena, me ip hnyi hnyimaködrin; ke e ame tot hakekenyi ödrin hnyi hmelen ûö, ke ödrin e han. 9Ke haingödrin kâu, ka habe, Ewa Sara âiâm? Haingen, ka habe, Walethö hnyi uma mano. 10Ke e ame ha kâu, ka habe, Oge me he ka o hmetu köu e ka o but ûen; ke, wâ bi, ame he Sara âiâm ka hnokoâ da. Kʼ a löng ut Sara hnyi hwanumen uma mano hnyi hoton. 11Ke li hingat ut Aberahama me Sara, ke se hia ta je hunaidru, ke ba hmetu ga Sara hwakecin omomo. 12Ke Sara ame hluma eû knyi hnyekon, ka habe, Hē, oge me he ka hu hnân senyin, kʼ iny hingat ut, ke hingat minya but anyik than? 13Ke Iehova ama ha kö Aberahama, ka habe, Ieû ga Sara ame hluma, me habe, Hawa e hnathu oge me he ka hnokoâ kʼ iny hingat ut? 14Ewa ke ûnyi ae hmak kö Iehova? Haba hnyi bong adre thu oge me he ka hmetu köu, e ka o but ûen, kʼ ame he Sara ka hnokoâ nokon da. 15Ke Sara ame ivinöâ, ka habe, Oge ca hluma; anyin a e ame ot. Ke haingen, Ohe, u je hluma.
16Ke ame todrö hnyat me hnyimaködrin Sodoma ai: ke Aberahama ame tha he mödrin he ka ip ödrin hnyi gethen. 17Ke Iehova ame ha, ka habe, Hawa, oge me he ka ikhâlâ ga Aberahama hnök hna he ka ânyâ; 18anyin ame he Aberahama ka hnân hnyei ae gan me man, ke ame he ka hnahic ûnyi gan ta je hnyei hia eang hmelen? 19Anyin a oge hia but wâhmakhmetoâ e, me me hamen he ka hûna ka lakon me anyin lap hwaban e, mʼ adre me he ka tuö de Iehova, he ka ânyâ wisa me owisa; me me he Iehova ka ohmâ kö Aberahama hna ha bânâ gan. 20Ke Iehova ame ha, ka habe, E hnathu e gan hmâ but tenge anyin Sodoma me Gomora, ke e hnathu e ti hmak ut anyidrin hulö; 21anyin a wale oge ma utut walang aug, me ö ʼdrin, hawa ödrin e ne ânyâ hia helâji me hwa tenge ame o but könya; ke a ne ba ame he ka khanö nya. 22Ke a saû thö hnyat ûheny e, me he bala Sodoma ai: ke Aberahama ame tiga tot hnyi hnyimakö Iehova. 23Ke Aberahama ame hakekenyâ, me ha, ka habe, Hawa, u me he ka tha ohia wawisa me wamonu? 24A ne hu fifte tavat ae wisa hnyi hnyei: hawa, u ma he ka ohia, me ca betenge ka hnyei can fifte tavat ae wisa hnyin e? 25Ö u ca he ka ânyâ helâe, wale he ka tha omoko tavat ae wisa me tavat ae kong, me me tha ûcû at ae wisa me at ae kong. Ö u ca he ka helâe: hawa ame ca he at owisa hmeledrany hia ka ânyâ wisa? 26Ke Iehova ame ha, ka habe, Oge ne wâ e Sodoma fifte tavat ae wisa hnyin taun, me oge me he ka betenge ka hnyei hia ûnyi gadrin. 27Ke Aberahama ame thu me ha, ka habe, Wâ bi, anyin a iny hwege hnyok he ka fuc köu, Than, kʼ iny sesâiny kânâ me hnabadröu; 28ke hawa, a ne hia thabûng ta hnyat hnyi fifte tavat ae wisa, u ma he ka ohia hnyei hia can ae hia thabûng? Me e ame ha, ka habe, Oge me ca he ka ohia e, iny ka wâ fâte faiv. 29Ke e ame ha hmetu kâu, ka habe, Hawa, u je ne he ka wâ fâte? Ke e ame ha, ka habe, Oge me ca he ka ânyâ can tavat a fâte. 30Ke haingen, ka habe, E na ca he Than ka hmö-nyin, mʼ oge me he ka fuc: hawa a ne hu tavat a thöte? Ke e ame ha, ka habe, Oge me ca he ka ânyâ oge ne wâ eling tavat a thöte. 31Ke e ame ha, ka habe, Wâ ju, e hwege hnyekuk he ka fuc ka Than; ke hawa, a ne hu tavat a twente eling? Haingen, Oge me ca he ka ohia e can tavat a twente. 32Ke e ame ha, ka habe, E na ca he Than ka hmönyin, mʼ iny okhaca biju fuc: hawa a ne hu tavat a libenyita? Me haingen, Oge me ca he ka ohia e can tavat a libenyita. 33Ke a um dö ûhnenamö Iehova me Aberahama, me ame he but: ke Aberahama ame hmetu ka hnyi hnyaban.
Pilihan Saat Ini:
Genese 18: IAAI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
maintained by the British and Foreign Bible Society