Genese 30
30
1KE a wâ but Rakela a gʼ ame ca hnöku nöku Jekob, me Rakela ame hmönyin ka tuhan, me ha kö Jekob, ka habe, Ha nökuk ut, wâ inye mokcu. 2Ke Jekob ame hmönyin kö Rakela, me haingen, ka habe, Hawa inya ang hnen Khong, waleji at ame behanö u ge ta je wanakat? 3Ke haingen, ka habe, Wâ bi anyik hlu jia Bila, hom ju e, ke e ame he ka hnokoâ hobi könya, me me hu nökuk minya ûnyi gan. 4Me e ame ham kâu anyin hlu wale Bila hnân âiân: ke Jekob ame hom e. 5Me Bila ame erkin dut, me e ame hnokoâ nöku Jekob a da. 6Me haingö Rakela, ka habe, A hia but Khong owisa könya, me löng hok hofuc, me ham könya nökuk da: anyin a wale e ame hwenyi ien Dana. 7Ke ame erkin hmetu Bila hlu anyi Rakela, me e ame hnokoâ nöku Jekob da a loiny. 8Me haingö Rakela, ka habe, E gan hmâ but hnök hna ûsöu me tuhök, ke oge hon dut: me e ame hwenyi ien Nafatali. 9Ke a wâ but Lea a ga mwi thö, me e ame hum Zilepa a anyin hlu, me ham kö Jekob hnân âiân. 10Me Zilepa hlu anyi Lea ame hnokoâ nöku Jekob a da. 11Me haingö Lea, ka habe, A o but hnahic! me e ame hwenyi ien Gada. 12Ke Zilepa hlu anyi Lea ame hnokoâ nöku Jekob ke da a loiny. 13Ke haingö Lea, ka habe, Oge senyin dut, anyin ame he ka hawo nya me senyin hnen ta je hlu: ke e ame hwenyi ien e Asera. 14Ke ame he Reubena hnyi ûen meno hwit, kʼ ame wâ ta je dudai hnyi utkânâ, me e ame hom but e kö Lea a hinyen. Ke haingö Rakela kö Lea, ka habe, Ö u haök ge je dudai anyin nokom. 15Me haingen kâu, ha habe, Hawa, ûnyi ae ûhnyûkong e, a u je hia but hûgûnâ öiök ke u me he minya ju ka hûgûnâ je dudai anyin nökuk? Ke haingö Rakela, ka habe, Anyin a wale e ame he ka tha e möu eâu hnyinghet hwaban je dudai anyin nokom. 16Ke Jekob ame o but ûheny hnyi hna belök hnyi sahac, kʼ ame he Lea ka iouny me, me ha, ka habe, U ma he ka tha e mönya; anyin ae hnathu oge ûcû u hwaban je dudai anyin nökuk. Me e ame tha e me hnyi hnyinghet eling. 17Ke Khong ame löng kö Lea, ke e ame erkin dut, me hnokoâ nöku Jekob baga a thabûnginy. 18Me haingö Lea, ka habe, A hia but Khong ham könya hwabök, anyin a oge ham anyik hlu ka öiök: ke e ame hwenyi ien Isakara. 19Ke ame erkin hmetu but Lea me hnokoâ ke da a siksiny kö Jekob. 20Ke haingö Lea, ka habe, Khong ame hia but ham könya tang omjeû ae so; ame he öiök ka laba so mönya walang ang, anyin oge hia but hnokoâ lakon je baga a siks: ke e ame hwenyi ien e Zebulona. 21Ke hwaban dö e, e ame hnokoâ in, me hwenyi ien Dina. 22Ke Khong ame ûnykûmi Rakela, me Khong ame löng kâu me ohnokoâ e. 23Me e ame erkin dut, kʼ ame hnokoâ da: me ha, ka habe, A hia but Khong hom hna haikongu nya: 24ke e ame hwenyi ien Josefa, me ha, ka habe, E so Iehova ame ham minya ke da a nökuk.
25Ke a hia but Rakela hnöku Josefa, haba Jekob ame ha kö Labana, ka habe, Hnö nya but, mʼ inye hmetu ka hnyi gak, me ik hnyei. 26Hna but könya je laöiök me je lakuk, wale hwaban hnök hna huliwa köu, me hnö nya but: anyin ae khanö u huliwa waleji oge ânyâ köu. 27Me haingö Labana kâu, ka habe, A ne hu ânyâm ibetengiö könya, me halubahingen ju, anyin a oge me wâhmakhmetoâ a Iehova ame ohnahici nya gam. 28Ke e ame ha, ka habe, Ha wia thö könya hwâbâm me oge me ke ka ham. 29Me haingen kâu, ka habe, E khanö u hnök hna huliwa köu, me trobán hnök hna tuö halem ta je meno. 30Anyin ae wakhalet thibi gam ehac ke tiga hiö nya, kʼ ame si gan dut walang ang; ke a hia but Iehova ohnahici u hnyi je deny hia waleji oge wia kâu: ke haba walang ang, oge me he ka penapena hobi kâu anyik lap kehö? 31Me haingen, ka habe, Oge me he ka ham ieû köu? Ke haingö Jekob, ka habe, E ba ûnyi u me he ka ham könya: ke khaca thibi ûnyi u me he ka ânyâ hobi könya, me oge me he hmetu ka hat me tuö ânyâm je hnahat mamoe. 32Haba hnyi bong ang, oge me he ka he hnyi wanben halem ta je hnahat meno hia thithö, he ka ve ip ta je meno hia ae ûdenöny me sisit, me ta je meno ae hlit ûnyi hnyi ta je mamoe, me ta je ûdenöny me ta je sisit ûnyi hnyi ta je got: ke wale thibi e hwabök. 33Ke ame he ka ohnathu nya nyiele hnen hwakecik ae wisa, u ka o but ka hnyi hwabök wale hnyi hnyimâkâm: haba ta je got hia ae ca ûdenyöny bi me sisit, me ta je mamoe ae ca hlit, adre wâ unyik, wale oge hia but venâu. 34Me haingö Labana, ka habe, E so e he ka e hnâm hna ha. 35Ke e ame ve ip hnyi bong eling ta je got baga adre sihnalimen me sisit, me ta je got momo hia ae ûdenöny me sisit, mo ka hu bawen, me ta je mamoe ae hlit, me hnʼ Ödrin ka je lakon baga; 36ke e ame ûsâkâûö me Jekob hnyi kun ta bong ka he: ke Jekob ame hat ta je hnahat hale Labana a hnen bi ju. 37Ke Jekob ame hom ta je ong utö ae hat, libene, me luza, me aremoni; me e ame bi hnalimen me me manen dok ae hau hnyi je ong utö. 38Ke e ame ip je ong utö adre bi hnalimen hnyin je kumete taben belen je meno hnyi hnyimakan ta je hnahat; ke ödrin e erkin ödrin ka o ka ic. 39Ke ame erkin dut ta je hnahat cicö ta je ong utö, me je hnahat adre me hnokoâ but ta je meno ae hu hnalimen, me ûdenöny, me sisit. 40Ke Jekob ame ve ip ta je lakon mamoe, me wia ta je hnyimakan je hnahat ka hnyi ta je hnalimen, me ta je hlit hia hnyi hnahat hale Labana; ke e ame ke ip haleny to je meno, kʼ ame ca tha hnen me ta je hnahat meno hale Labana. 41Ke e ka he ka erkin ta je meno ae hwege, me Jekob ame ip ta je ong utö hnyi je kumete hnyi hnyimakan ta je hnahat, mʼ adre me he ka erkin hnyi ta je ong utö; 42ke ame ne mat ta je meno, e ame ca ip hmetu: waleling me me hale Labana je meno ae mat, ke hale Jekob bi je meno ae hwege. 43Me ame ti tren gan hmâ thatûnyi hnen at e, ke ti se hia haleny ta je meno, me je lathnyabainy omomo me obaga, me je kamela me asina.
Pilihan Saat Ini:
Genese 30: IAAI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
maintained by the British and Foreign Bible Society