Yowannisi 10
10
Bagee Qiddee Shaahiyoo
1“Iberoon ittoshich gettoye: Bageenaꞌochi maggooch kelloona giyaano, bare gommona capphiꞌi giyimmo, aroo gaayoonaa bokkoonane. 2Tunetaa kelloona giyimmoo bageenaꞌochi qiddoone. 3Biich kellecho qechemmone. Bageenaꞌoo bi qaaroon waayemminaꞌone; bi bageenaꞌon boonoshi shigi shigoona ceegiree kichemmone. 4Bi bageenaꞌo bullin bi kichitoyee gubb boonoshi aafooch shiichemmone; bi bageenaꞌoo bi qaaroon boonoshi arii beetoyich, biin dabbemminaꞌone. 5Tunebaani baroo waanee xuuppheheetani biin dabbaachemminaꞌone; ebiyoo baroochi qaaroon ariyaano boonoshi qajjitoyichiye” iye. 6Yesuusi ishin arooch beeti asheenaꞌoyich shaahiyoona gettiye; tunetaa bi gettito ama geto gaata boonoshich giyaanoone.
Gaawe Qiddoo Yesuusi Tuno
7Ebich Yesuusi daakkiꞌi boonoshich ishichiye, “Iberoon ittoshich gettoye: Ta, bageenaꞌochi kello taane. 8[Tayee aaf] waatinaꞌo bulli gaayeenaꞌonaa bokkeenaꞌonane; tunetaa bageenaꞌo boonoshi qaaroon waayeyaaneenaꞌone. 9Kello taane. Taanna giyimmo koniyoona wodemmone; giyemmone, kechemmone, bi maayemmonoo danemmone. 10Gaayo bi waabeeto gaayoyich, guuroonaa aalliyoonoyichalli, baroon halloyich toonoone. Tunebaani ta waato, kashoon boonoshi danemmoyich, ebiyoo ceeni kashoon boonoshi danemmoyichiye.
11“Deꞌe qiddoo taane. Deꞌe qiddoo bi bageenaꞌo keroyich qitemmone. 12Tunebaani gijjoon deqqiꞌi qiddeebeeto biicho tuneti bagee qiddoo tuno bi qajjitoyich, okeroo waataa bi beegigaata bageenaꞌon dufiichi woccemmone; arooba okeroo bageenaꞌon yechemmone; boonoshinoo shaccemmone. 13Are qiddoo bi woccito, gijjoon deqqiꞌi qiddeebeeto bi tunetoyichiye; bageenaꞌoyichoo maaxo bi qajjitoyichiye.
14-15“Deꞌe qiddoo taane. Nihoo Yeeri taan bi arii beetoommon, tawoo Nihoo Yeerin ta arii beetoommon ta bageenaꞌon ariibeeto taane; ta bageenaꞌoo taan arii beetinaꞌone; boonoshi keroyichoo qitemmo taane. 16Hini maggooch giyaani bare bageenaꞌo taach beetinaꞌone. Boonoshinoo wotta deebo taach qaawiihe; ta qaaroonoo waayemminaꞌone; ikke qiddoo boonoshin ikkochiree quyemmone. 17Qitoochee wochinnoon ta tiyemmoyich, ta daaggoona qitemmo taane; ebich Nihoo Yeeri taan shunnii beetone. 18Ta shuniree qitehoani, ta shunaanoon taan wuxemmo aalloone. Qitoonaa qitoochee timonoyich hakkoo taach beetone; ta Nihoo ‘Ebin tuniibe’ itone” iye.
19Arooba hini yibbaatee naboona Ayihudeenaꞌo daggooch wochinnoon shaco giyiye. 20Boonoshi daggoochee meetinaꞌo “Yinnechone; geyetone; amoyich bi yibbaatoon waayee beetote?” iyeete.
21Bareenaꞌo “Bi yibbaatoo yinnechi ashi yibbaatoommo toonoone. Yinno aaf doogeenaꞌo aafoon ciichiyoon hakkehe?” iyeete.
Yesuusin Wuxiya Ayihudeenaꞌo Qaawoo
22Yerusaalem beeti yaafee kexon Yeerich boonoshi diiriibeeti baaroo katinniye. Showoo yooyone. 23Yesuusi yaafee kexooch beeti Solomoonichi Genje Gaaddaafoona shaꞌee beehe. 24Ayihudeenaꞌo biin giichii guuddiꞌi, “Aati wottoon nooch aachenne? Ne Kiristoosi ne gaata, kaacha nooch gete” iyeete.
25Yesuusiyoo ishichiꞌi boonoshich wochiye: “Ta ittoshich getteto taane; tunebaani iberiyaachote. Ta, ta Nihoo waanee wocheeꞌa ta tuniyaabeeti shuunoo taachon miixee beetone. 26Tunetaa ittoshi ta bago ittoshi tuno qajjitoyich iberiyaachote. 27Ta bageenaꞌo ta qaaroon waayee beetinaꞌone; tawoo boonoshin ariibeeto taane; boonoshiyoo taan dabbii beetinaꞌone. 28Tawoo boonoshich bulli yemeenee kashoon immemmo taane; boonoshiyoo cir aalleyaachemminaꞌone. Boonoshin ta kishoochee boggemmo koniyoona aalloone. 29Boonoshin taach immiti ta Nihoo bulliyee beshoone; ta Nihoo kishoochee bogon koniyoona hakkaachemmone. 30Taannaa Nihoo Yeerina ikkoo noone” iye.
31Arooba Ayihudeenaꞌo biin yexiree wuxiya wochinnoon xaqqoon tiijjiyeete. 32Yesuusi boonoshich “Ta Nihoo waanee wocheeꞌa wodde deꞌe mooyon ittoshich bekkiito taane; hini ta shuuneti shuunoochee aabichiye taan xaqqoona ittoshi yexxemmo?” iye.
33Ayihudeenaꞌo wochiꞌi, “Ne naagoyichalli deꞌoon ne shuunetoyich neen yexaachone; ne ashi bushoo tunaachaa ne qelloon Yeeri ne tuniitoyichiye”#Lew. 24:16 iyeete.
34Yesuusi ishichiꞌi boonoshich wochiye: “Yeeri ‘ “Ittoshiyoo nuggishoo ittoshine” ito taane’#Shod. 82:6 iꞌi bi gettito ittoshi sheerooch kooreyaanoone? 35Yaafe Macaafee qaaro shaddeyoon hakkaache; hini bi qaaroon waayetinaꞌon, Yeeri ‘Ittoshiyoo nuggishoo ittoshine’ bi itoyeena, 36‘Yeerichi Bushoo taane’ ta itoyich Nihoo Yeeri yaafiton, alemoochoo bi deejjiton ‘Naagahine’ iyote? 37Illa ta, ta Nihoo shuuneti shuunoon ta shuuno qayigaata, taan iberiyaayote. 38Tunetaa ta shuunegaata, taanolla ittoshi iberiyoo qayigaata, Nihoo Yeeri taanna tookkii bi tunoon, tawoo Nihoo Yeerina tookkii ta tunoon xiishiree ittoshi ariyemmoyich, ta shuunoon iberiibote” iye. 39Ebich wochiꞌi biin yecha qaawiyeete; tunetaa boonoshi kishoochee muricciye.
40Arooba Yesuusi shiichiꞌi Yowannisi aacona afaalliibee echeti xaaꞌoo Yoordaanoosi aachee beqach wochinnoon hammiꞌi arooch kotehe. 41Wodde asheenaꞌo bi waan waaheete. Boonoshinaa boonoshina “Yowannisi ikke malletoonolla bekiyaanoone; tunebaani Yowannisi hini uroochon bi gettito bulli iberoone” iyeete. 42Aroochaa meeti asheenaꞌo boonoshi mulloon Yesuusi toommooch tooꞌiiheete.
Pilihan Saat Ini:
Yowannisi 10: KBRC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
SIM International, 2020.