LIVALITSWA 4
4
Mihinzilu chia Vakohatsi Vuluhia lwa Levi
1Mwami Nyasaye yavoolela Musa nende Haruni, 2“Muvalitse Vakohatsi, nululi lulala khu tsinzivulu tsia vandu vu lwivulu lwa Levi, khulondokhana khu tsinzivulu tsiavo nende tsinzu tsiavo. 3Muvalitse vandu vasatsa voosi, vali ni mihika makhomi kavaka khutukha khu makhomi karanu, vatushili khukhola muhinzilu mu Liheemo Litakatifu.
4“Vandu vu lwivulu lwa Kohaatsi, valiitsa khuva nu muhinzilu ku khusinjilila vindu vitakatifu viene muno.”
5Mwami Nyasaye yavoolela Musa mivaalo yaka, “Lwa isaa iliitsa khuva nimali khutukha yu khusambula maheemo ka muliitsa khumenyamu, Haruni nende vaana veve valiitsa khwinjila mu Liheemo Litakatifu; valiitsa khurulitsaho luvaala luli imbeli wi Lisanduku li Lilakano, nu khukhunikha Lisanduku li Lilakano lienelo. 6Valiitsa khukhunikhakhu shiseelo shilavu, vavishi khulio ikulu shitambaya shia bulu, ma vinjilitsimu misala chiu khulichinga.
7“Valiitsa khwaala shitambaya shia bulu shienesho khu mesa yu mikati mitakatifu chiavikhwakhu, khandi vavishi khuyo tsisahani, tsibakuli tsiu vubani, tsibakuli tsi vihanwa, nende tsijaka tsi vihanwa vi idivai. Shia khase khosi mukati kuliitsa khuvetsanga khu mesa yeneyo. 8Valaala inguvu imuuchi khu vindu vienevo viosi, khukhunikha shiseelo shi imbuli, nu khwinjilitsamu misala chiu khulichinga.
9“Valiitsa khuvukula shitambaya shia bulu mavakhunishi khu shikuru shi itaaha, tsitaaha tsiayo, tsindambi nende tsitureyi, halala ni tsindoho tsiosi tsia makura ku musayituni ki tsitaaha, kavikhwamu. 10Valiitsa khuchivoha nende vindu viayo viosi nivarumishilanga shiseelo shi imbuli khuli shindu shiu khukhunishila ma vashivishi khu lufulemu lu khuchinjilakhu.
11“Valiitsa khwala khandi shitambaya shia bulu khu vwaali vwalombwa khu itsahabu, vavishikhu shiseelo shi imbuli, nu khwiinjilitsamu misala chiu khulichinga. 12Valiitsa khuvukula shia shindu shiosi shia varumishilanga Havundu Hatakatifu Hene, khulinga mu shitambaya shia bulu, khurakhu shiseelo shi imbuli shiu khuvikhunikha, khandi vavivishi khu tsifulemu tsiu khulichinga. 13Valiitsa khurulitsa likooshe lia makura lili ha vwaali, khwalakhu shitambaya shia sambarau. 14Valiitsa khuvikhakhu shia shindu shiosi, shirumikhanga ha vwaali: Vindu viu khusambilakhu mulilu, tsingaka, vuuma, nende tsingalayi tsiu khusavilakhu. Valiitsa khukhunikhakhu shiseelo shi imbuli khandi vinjilitsimu misala chiu khuluchinga. 15Lwa matukhu kukhusuunda maheemo kaliitsa khuva nikakhatukha, vandu vi inzu ya Kohaatsi valiitsa khuchinga vindu vitakatifu vionyene, lwa Haruni nende vaana veve valiitsa khuva nivakhamala khuvikhunikha halala ni vindu vialio viosi. Vandu vi inzu ya Kohaatsi, shivaliitsa khutiilakhu khu vindu vitakatifu tawe; inoho vanyala khukhutsa. Yichi nachio mihinzilu chia vandu vi inzu ya Kohaatsi vakhola, lwa Liheemo Litakatifu livetsanga ni liakhasambulwa.
16“Eliazari mwana wa Haruni neye usinjilila Liheemo Litakatifu liosi nende makura ki tsitaaha, vubani, vihanwa vi imu, makura ku khuvekha, nende vindu vindi viosi vili mu Liheemo Litakatifu viakholwa khuva vitakatifu khu Mwami Nyasaye.”
17Mwami Nyasaye yavoolela Musa nende Haruni, 18“Mukhaleshikhu vandu vi inzu ya Kohaatsi 19khwiirwa lwa vindanga himbi khu vindu vitakatifu viene yevo tawe. Haruni nende vaana veve valinjilamu khukavulila shia mundu wosi muhinzilu kwekwe ku khukhukhola, nu khumuvoolela shindu shianyala khuchinga, khu vave vikalili makhuva kenako khwikholekha. 20Navutswa niiva vandu vu lwivulu lwa Kohaatsi, valinjila mu Liheemo Litakatifu, mavalole vasalisi nivarecheshitsanga vindu vitakatifu vienyekhanga khusuundiwa, valiitsa khukhutsa.”
Mihinzilu chia Vandu vi inzu ya Gerishoni Vaheelwa Vakhole
21Mwami Nyasaye yavoolela Musa, 22“Muvalitse khandi vandu vi inzu ya Gerishoni khulondokhana khu lwivulu lwavo nende tsinzu tsiavo. 23Muvalitse vandu vasatsa voosi vali ni mihika khuraanjila khu makhomi kavaka khutukha khu makhomi karanu vatushili khukhola muhinzilu mu Liheemo Litakatifu liu Mwami Nyasaye. 24Valiitsa khukhola muhinzilu kukhuchinga vindu yivi: 25Liheemo Litakatifu, shindu shiu khulikhunikha shiu mukari, shindu shiu khulikhunikha ilwanyi, shiseelo shi imbuli shiu khuvikha khulio ikulu, luvaala lu mu vwinjililu, 26tsimbala nende mikoye chiu lwanyi lwavotokhana Liheemo Litakatifu nende vwaali, tsimbala tsiu mu vwinjililu vu lwanyi, nende shia shindu shiosi shiarumishilwa khurechekha vindu yivi. Valiitsa khukhola muhinzilu kwosi kwenyekhanga khukholwa nivarumishilanga vindu vienevo. 27Musa nende Haruni valiitsa khulola ndi vandu vi inzu ya Gerishoni varweshitsi mihinzilu chiosi, khandi vachinji shia shindu shiosi shia Haruni nende vaana veve vavavoolela vachinji. 28Yichi nachio mihinzilu chia vandu vi inzu ya Gerishoni venyekhanga vakhole mu Liheemo Litakatifu: valiitsa khukhola mihinzilu chiavo nivasinjililwi na Itsamari mwana wu musalisi Haruni.”
Mihinzilu chi Inzu ya Merari Vaheelwa
29Mwami Nyasaye yavoolela Musa, “Valitsa vandu vi inzu ya Merari, khulondokhana khu tsinzu nende tsinzivulu tsiavo. 30Muvalitse vandu vasatsa voosi, vali ni mihika khuraanjila khu makhomi kavaka khutukha khu makhomi karanu, vatushili khukhola muhinzilu mu Liheemo Litakatifu. 31Valiitsa khuva nu muhinzilu ku khuchinga tsifulemu, milondi, misala nende vwalilu vwi Liheemo Litakatifu, 32khali misala, vwalilu vwosi, tsingomu, nende mikoye chiu lwanyi lwavotokhana Liheemo Litakatifu, nende shia shindu shiosi, shia vindu yivi viarechekhwakhu. Shia mundu wosi alachinga shindu shia kenyekhanga khuchingwa. 33Yichi nachio mihinzilu chia vandu vi inzu ya Merari vakhola lwa varumikhanga mu Liheemo Litakatifu: Valiitsa khukhola mihinzilu chienecho, nivasinjililwi na Itsamari, mwana wu musalisi Haruni.”
Khuvalitswa khwa Vandu Vuluhia lwa Levi
34Musa, Haruni, nende vimilili va Vaisraeli, vavalitsa vandu vi inzu ya Kohaatsi, khulondokhana khu lwivulu lwavo nende tsinzu tsiavo. 35Vandu vasatsa voosi, vali nivali ni mihika khuraanjila khu makhomi kavaka khutukha khu makhomi karanu vali nivatushili khukhola muhinzilu mu Liheemo Litakatifu, 36vali vavalitswa khulondokhana khu inzu yavo, vali vandu tsiheelefu tsivili tsimia saba na makhomi karanu. 37Iyi nayo yali isavu ya vandu vu lwivulu lwa Kohaatsi, vakholanga muhinzilu mu Liheemo Litakatifu. Musa nende Haruni va vavalitsa, khulondokhana khu lilako liu Mwami Nyasaye. 38Vandu vi inzu ya Gerishoni, vavalitswa khulondokhana khu lwivulu lwavo nende tsinzu tsiavo. 39Vandu vasatsa voosi, vali nivali ni mihika khuraanjila khu makhomi kavaka khutukha khu makhomi karanu, vali nivatushili khukhola muhinzilu mu Liheemo Litakatifu, 40vali vavalitswa khulondokhana khu lwivulu lwavo nende tsinzu tsiavo, vali vandu tsiheelefu tsivili tsimia sita na makhomi kavaka. 41Iyi nayo yali isavu ya vandu voosi, vavalitswa vakholanga muhinzilu mu Liheemo Litakatifu. Musa nende Haruni, va vavalitsa khulondokhana khu lilako liu Mwami Nyasaye.
42Vandu vi inzu ya Merari, vavalitswa khulondokhana khu lwivulu lwavo nende tsinzu tsiavo. 43Vandu vasatsa voosi, vali nivali ni mihika khuraanjila khu makhomi kavaka khutukha khu makhomi karanu, vali nivatushili khukhola muhinzilu mu Liheemo Litakatifu, 44vavalitswa khulondokhana khu tsinzu tsiavo, vali tsiheelefu tsivaka tsimia tsivili. 45Iyi nayo yali isavu ya vandu vi inzu ya Merari. Musa nende Haruni, va vavalitsa khulondokhana khu lilako liu Mwami Nyasaye khuvirila khu Musa.
46Musa, Haruni nende vimilili va Vaisraeli vavalitsa vandu vu lwivulu lwa Levi khulondokhana khu lwivulu wavo nende tsinzu tsiavo. 47Vandu vasatsa voosi vali nivali ni mihika khuraanjila khu makhomi kavaka khutukha khu makhomi karanu, vali nivatushili khukhola muhinzilu kukhurumikha nu khuchinga Liheemo Litakatifu, 48vavalitswa vali vandu tsiheelefu munane tsimia tsiranu na makhomi munane.
49Shia mundu wosi yavalitswa, khuli Mwami Nyasaye yali niyavoolela Musa akhole. Shia mundu wosi yavoolelwa muhinzilu ku khukhola inoho kukhuchinga vindu, khuli Mwami Nyasaye yali niyavoola khuvirila khu Musa.
Pilihan Saat Ini:
LIVALITSWA 4: LLLCATHOLIC
Sorotan
Salin
Bandingkan
Bagikan
Ingin menyimpan sorotan di semua perangkat Anda? Daftar atau masuk
© The Bible Society of Kenya, 2013