Yele-za-pɛr-tib 4
4
A Kayɛ̃ kʋ n a Abɛl
1A Adama tɩ páw nɩ a ʋ pɔw Awa, ʋ tɛr pʋɔ dɔw Kayɛ̃ ɛ́ yel: «Ɩ̃ dɔw nɩ nɩr a Sore zũú.» 2Ʋ mɩ̀ tɩ lɛb'a dɔw a Kayɛ̃ yɛb Abɛl.
A Abɛl tɩ cɩ̃ɩnɛ nɩ píir ɛ́ a Kayɛ̃ kʋɔr. 3A zie na wa yi a, a Kayɛ̃ ír'ɩ a tẽsɔw bʋ̃-kʋ́ɔrɩ wa de a kʋ̀ a Sore. 4A Abɛl mɩ̀ tɩ ír'ɩ peli-dãw-dɔwrɩ a ʋ píir pʋɔ wa maal'ɩ bàwr, ɛ́ kʋ̀ a Sore a nɛn-vɩɛlɩ zie. A Sore tɩ jɩ́r'a kaa a Abɛl nɩ a ʋ de-kʋ̀b bom#4:4 Nyɛ̃ Eb 11.4., 5ɛcɛ ʋ bɛ tɩ ŋmɛlɩ kaa a Kayɛ̃ nɩ a ʋ de-kʋ̀b bom ɛ. A Kayɛ̃ tɩ nyɛ̃ nɩ suur yaga ɛ́ sãw niwn. 6A Sore tɩ yel ʋ na: «Bʋ̃ʋ n'ʋ so fʋ nyɛ̃ suur ɛ́ sãw a niwn pɛrpɛr à ŋá? 7A fʋ ɩb wa vɩɛl a, fʋ na dʋɔ nɩ zu. Ɛcɛ a fʋ ɩb bɛ wa vɩɛl a, a yel-bier ũú nɩ a fʋ dɩ̃dɔr ƴãw gù. Ʋ bɔbr'a k'ʋʋ so b, ɛcɛ fʋ̃ʋ n'ʋ na ƴãw fãw tʋ̃ɔ́ ʋ.»
8Ɛcɛ a Kayɛ̃ tɩ yel'ɩ a ʋ yɛb Abɛl: «Ɩ tɩ yi yẽw#4:8 Ɩ tɩ yi yẽw: A ƴɛ̀r-bie á ŋá bɛ ka be a ebre sɛbɛ pʋɔ ɩ..» Bɛ na tɩ ta a wɩ̀ɛ pʋɔ a, a Kayɛ̃ tɩ lo na nyɔw a ʋ yɛb Abɛl kʋ.
9A Sore tɩ sowr'ɩ a Kayɛ̃: «A fʋ yɛb Abɛl ɩ n ŋmɩn?» Ʋ sɔw: «Ɩ̃ bɛ bãw ɛ. Mãa n'ʋ a fɛr k'ɩ̃ɩ gùre a ɩ̃ yɛb bɩɩ?» 10A Sore tɩ sɔw na: «Bʋ̃ʋ n'ɩ à à ŋá fʋ na ɩ a? A fʋ yɛb zɩ̃ɩ ɩ na mɛ̃ nɩr na cɩɩrɛ a yire a tẽsɔw tarɛ mɛ̃ a. 11Dɩ̃a na ta a, fʋ ɩ n nɩ-ŋmɛ-ƴãwna a tẽsɔw zie, ʋl na 'la gɛ̀lɛ́ nyũ a fʋ yɛb zɩ̃ɩ fʋ̃ʋ mɩŋa nũu na ɩ a cir a. 12Fʋ̃ʋ wa kʋɔr a tẽsɔw a, ʋ bɛ lɛb kʋ̀rɛ fʋ a ʋ na-bome ɩ. Fʋ na ɩ n nɩ-yʋɔra zɔrɛ viire gʋɔr a tẽw zu.»
13A Kayɛ̃ tɩ yel'ɩ a Sore: «A ɩ̃ dɔwrʋ tɩbrɛ na zuo a ɩ̃ deb. 14Fʋ diwr mɛ̃ na bɛrɛ a tẽsɔw-kʋ́ɔra pʋɔ a dɩ̃a, ɛ́ a na fɛr'a ɩ̃ sɔwlɩ zãá nɩ fʋ. Ɩ̃ na ɩ n nɩ-yʋɔra, viire gʋɔr kʋralɛ a tẽw zu. Nɩr za nãà nyɛ̃ m a na kʋ m a.» 15Ɛcɛ a Sore tɩ sɔw nɩ a Kayɛ̃: «A kʋ̃ ɩ a lɛ ɩ. Bʋ̃ʋ n'ʋ vɛ̃, nɩr wa kʋ b a, nɩbɛ ayopõi n'a bɛ na kʋ yáa a san.»
Lɛ n'a a Sore tɩ ƴãw bãwfʋ a Kayɛ̃, kɛ́ nɩr za nãà wa tuore ʋ a, taa kʋrɛ ʋ ɛ. 16A Kayɛ̃ tɩ cen na zãá nɩ a Sore, tɩ kpɩɛr Nɔdɩ tẽw na be a Edɛn tẽw saa-pɛrɩ́ a.
A Kayɛ̃ yir dem
17A Kayɛ̃ tɩ páw nɩ a ʋ pɔw, ʋ tɛr pʋɔ dɔw Enɔkɩ. A Kayɛ̃ tɩ ŋmãa nɩ tẽ-kpɛ̃ɛ, ɛ́ de a ʋ bidɛb Enɔkɩ yúor por'ɩ a tẽw. 18Enɔkɩ tɩ dɔw nɩ Ɩradɩ, Ɩradɩ dɔw Mehuyayɛl, Mehuyayɛl dɔw Metusayɛl, Metusayɛl dɔw Lemɛkɩ.
19Lemɛkɩ tɩ kul'ɩ pɔwbɛ ayi: a kãw dɩ Ada ɛ́ a kãw dɩ Sila. 20A Ada tɩ dɔw nɩ Yabal. A Yabal n'ɩ a bɛlɩ dem na kpɩɛr pɛnɛ-sɛwr pʋɔ ɛ́ tɛr dʋn a sãàkʋm. 21A ʋ yɛb tɩ dɩ na kɛ́ Yubal. Ʋlɛ tɩ n'ɩ a korijom-ŋmɩɛrbɛ nɩ a 'laa'lɩr-pɛblɛ za sãàkʋm. 22A Sila mɩ̀ tɩ dɔw nɩ Tubal-Kayɛ̃ na tɩ ɩ a sãa-kpɩɛrɛ na tɩ maalɛ a kur-zɩɛ nɩ a kure tõ-tõ-bome za a. A Tubal-Kayɛ̃ yeepuule tɩ n'ɩ Naama.
23A Lemɛkɩ tɩ yel'ɩ a ʋ pɔwbɛ:
«Ada nɩ Sila a, nyɩ bɛrɛ wone a ɩ̃ ƴɛ̀rʋ,
Ɩ̃ pɔw-nɔnɩ i, nyɩ ƴãw tobr:
Bɛlɛ wa ŋmɛ m a, ɩ̃ mɩ́ kʋ n nɩr,
bɛlɛ wa ŋmɛ m ƴãw bàalʋ a, ɩ̃ mɩ́ kʋ n bibile.
24Alɛ wa fɛr bɛ kʋ nɩbɛ ayopõi
yáa a Kayɛ̃ kũu san a,
bɛ na kʋ n nɩbɛ lɩz'a ata nɩ pie nɩ ayopõi
yáa a ɩ̃ kũu san.»
25A Adama tɩ lɛb'a páw a ʋ pɔw, ʋ dɔw bidɛb por a yúor Sɛtɩ#4:25 Sɛtɩ: A yúor ŋa pɛr'ɩ “Naaŋmɩn kʋ̀ m a.”, bʋ̃ʋ n'ʋ vɛ̃, ʋ tɩ yere na: «Naaŋmɩn kʋ̀ m'ɩ bidɛb-yũo lɩɛr'ɩ a Abɛl a Kayɛ̃ na kʋ a.»
26A Sɛtɩ mɩ̀ tɩ páw nɩ bidɛb por a yúor Enɔsɩ. A lɛn daar'a a nɩsaalbɛ tɩ tĩ puore a Naaŋmɩn, bʋɔlɛ ʋ Sore.
Pilihan Saat Ini:
Yele-za-pɛr-tib 4: DBDC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
La Bible en Dagara © Alliance Biblique du Burkina Faso, 2013.