Luki 22
22
Jesu fala leni o kuuma
22—23
Jufinba nikpiaga juogi ke bi baa kpa Jesu
(Mat 26.1-5; Mrk 14.1-2; Jan 11.45-53)
1Yaa dupen n ki pia dabinli jaanma, yaama n yi mi Pendima jaanma, den nagidi. 2Bi kopadicianba yudanba leni li bali maama banda den lingi ban baa tieni maama ki kpa Jesu, kelima bi den jie ku niligu.
Juda tuo ke o baa janbi Jesu
(Mat 26.14-16; Mrk 14.10-11)
3Sutaani den kua Juda pali nni, wani ban go yi yua Isikarioti, yua n den tie bi piiga n niliediba siiga yendo. 4O den gedi ki ban juogi leni bi kopadicianba yudanba leni U Tienu diegu jiidikaaba yudanba, wan baa tieni maama ki janbi Jesu, ki teni ban cuo o. 5Bi pala den mangi boncianla, ke bi niani ke bi baa pa o i ligi. 6O den tuo, ki ji lingi wan baa baa yaa folu ki janbi Jesu ki teni ba, ke ku niligu ki bani.
Jesu teni ke bi ŋanbi mi Pendima jaanjiema
(Mat 26.17-25; Mrk 14.12-21; Jan 13.21-30)
7Yaa dupen n ki pia dabinli jaanma dana siiga, lan den bili ban kodi mi Pendima jaanma pebiga yaa daali den pundi. 8Jesu den soani Pieli leni Jan ki yedi ba: «Gedi mani ki ban ŋanbi ti po mi Pendima jaanjiema tin je.» 9Bi den buali o: «A bua tin ŋanbi ma le?» 10O den guani ki yedi ba: «Yi yaa kua u dogu nni yaa yogunu, yi baa tuogi o joa ke o bugi li ñincuali. Yin ŋoadi o ki ban kua wan baa kua yaa diegu nni, 11ki yedi likani diedaano: ‹Canbaa yedi: Mini leni n ŋoadikaaba n baa je mi Pendima jaanjiema yaa candieli nni, ye le?› 12O baa waani yi li dietuadili, yaali n yabi ke yaala n dagidi kuli ye lienni. Yin ŋanbi lankani.» 13Bi den gedi ki ban sua ke li bonla kuli tie nani wan waani ba maama. Bi den ŋanbi mi Pendima jaanjiema.
O Diedo jiema
(Mat 26.26-30; Mrk 14.22-26; 1Kor 11.23-25)
14U yogunu n den pundi, Jesu den kali u saajekaanu kani, wani leni o tondiba. 15O den yedi ba: «N bi bua hali boncianla ki taani leni yi ki je yaa Pendima jaanjiema n tie ne, hali ki daa laa fala. 16N kadi ki waani yi, ke n kan go je ma hali li maalima n baa doagidi ki dudi U Tienu diema nni.» 17Lani, o den taa ki tadiñokaaga ki tuondi U Tienu ki yedi: «Yikuli n gaa mani li bonñokaala na ki boagidi. 18N yedi yi, dinla liiga, n kan go ño duven, hali U Tienu diema n baa cua yaa yogunu.» 19O go den taa dupen ki tuondi U Tienu, ki cabidi ki teni ba ki yedi: «Line n tie n gbanandi, min puni yi yaadi. Yin yaa tiendi yeni, ki tiadi n po.» 20Ban den dini ki gbeni, o go den taa ki tadiñokaaga ki teni ba ki yedi: «Yaa bonñokaala n tie ne tie n soama, yaama n wuli yi po, ki teni ke U Tienu kuani leni yi o Ŋantaadipaano.
21Ama diidi, yua n baa janbi nni, taani ki kaa leni nni u saajekaanu na. 22O Joa Bijua caa nani lan diani ki bili o po maama. Ama fala baa yaa ye leni yaa nilo n baa janbi o.» 23Bi den cili ki buali biyaba, bi siiga yua n baa tieni laa bonla.
Bi ŋoadikaaba siiga yua n cie
24Mi niama den fii bi siiga, ke bi bua ki bandi bi siiga yua n cie bikuli. #Mat 18.1; Mrk 9.34; Luk 9.46. 25Jesu den yedi ba: «I nilanbuoli badiba die ba leni u paalu, yaaba n mabindi ba mo teni ke bi yi ba bi nitodikaaba. #Mat 20.25-27. 26Lan da tie yeni yi yaa kani. Ama, yi siiga yua n cie yikuli n tua nani ki bonwaaga yeni, yua n tugi li yuli mo n tua nani o naacemo yeni. #Mat 23.11; Mrk 9.35. 27Ŋme n cie oyua, yua n kaa u saajekaanu kani, bi yua n tendi mi jieme? Yua n kaa ki baa je ka? Ama mini wani n ye yi siiga nani yua n tendi mi jiema yeni. #Jan 13.12-15. 28Yinba, yi tie yaaba n den juuni ki ye leni nni n biigima kuli nni, ki pundi hali moala. 29Lani yaa po, nani n Baa n dini nni li bali maama, nmoko dini yi yene. 30Lani, yi baa yaa di ki go ñu n saajekaanu kani n diema nni, ki kaa i bali-kalikaani po, ki jia Isidayeli piiga n buoliedi buudi.» #Mat 19.28.
Pieli baa ti nia ke waa bani Jesu
(Mat 26.31-35; Mrk 14.27-31; Jan 13.36-38)
31Jesu go den yedi: «Simon, Simon, Sutaani den mia ke wan baa u sanu ki yagi yikuli nani ban yagini ŋalikama maama yeni. 32Die n mia U Tienu a po ke a dandanli n da bodi. A yaa ti lebidi ki guani n kani, ŋan yaa paagidi a kpiiba pala.» 33Pieli den guani ki yedi o: «N Daano, n bogini ki baa yaa ye leni a ba li kpaadidieli leni mi kuuma nni kuli.» 34Jesu den yedi o: «Pieli, n waani a, dinla ñiagu hali ke ku kootongu daa mua, a baa nia taalimitaa ke ŋaa bani nni.»
35Lani, Jesu den buali bikuli: «Min den soani yi, ke yii kubi ligiboagili, kaa kubi sancenboagili leni cacaadi yeni, yi den luo liba bi?» Bi den guani ki yedi o: «Liba kuli.» #Mat 10.9-10; Mrk 6.8-9; Luk 9.3; 10.4. 36O den yedi ba: «Ama dinla liiga, yua n pia ligiboagili, wan taa li, yua n pia sancenboagili, wan mo n taa li, yua n ki pia jugisiega, wan kuadi o kpalibu ki daa. 37I Diani n yedi n po yaala: ‹Bi coadi ki taani o leni bi nikpaba,› baa tieni ki dudi moala.» #Esa 53.12. 38Bi den yedi o: «Ti Daano, diidi ki le, jugisiemulie ye ne.» O den yedi ba: «Li dagidi.»
Jesu gedi ki ban jaandi Olivie Tiidi juali po
(Mat 26.36-46; Mrk 14.32-42)
39Jesu den ñani ki gedi Olivie Tiidi juali po nani wan yen maani ki caa maama. O ŋoadikaaba den yegi leni o. 40Wan den pundi likani, o den yedi ba: «Yaa jaandi mani ke yin da ti kua mi tulinma nni.» 41Lani, o den piadi bi kani nani o nilo n baa lugidi li tanli lin baa yaa bianu, ki gbaani ki jaandi ki tua: 42«N Baa, a yaa tuo, ŋan ñani n kani yaa tadiñokaaga n tie ne min da ño, die lan da tua mini ka n bua yaala, kali fine n bua yaala.» [ 43Lanyogunu maleki den ñani tanpoli ki doagidi o po o yuli ki paagi o pali. 44Li paboancianli den kubi o ke o jaandi ki pugidi. O tontonjena den tua nani mi soama yeni ki condi tiipo.] 45Wan den jaandi ki gbeni, o den guani o ŋoadikaaba kani ki sua ke bi goa, kelima bi paboanli po. 46O den yedi ba: «Be n teni ke yi goa? Fii mani ki yaa jaandi, ki da kua mi tulinma nni.»
Bi cuo Jesu
(Mat 26.47-56; Mrk 14.43-50; Jan 18.3-11)
47Jesu n da den maadi, ku niligu den cua, ke ban yi yua Judasi, bi piiga n niliediba siiga yendo, ye bi liiga. O den nagini Jesu ki baa gobini o. 48Jesu den yedi o: «Judasi, a baa gobini o Joa Bijua yene ki janbi o?»
49Yaaba n den ye leni Jesu n laa yaala n baa tieni, bi den buali o ki yedi: «Ti Daano, tin pedi ba mu jugisiemu bi?» 50Bi siiga yendo den pedi ki joandi bi kopadicianba bado naacemo jientubili. 51Jesu den yedi: «Cedi mani yeni.» O den sii o joa yeni tubili ki paagi li.
52Lani, Jesu den yedi bi kopadicianba yudanba, U Tienu diegu jiidikaaba yudanba leni bi nikpela, bani yaaba n den taani ki cua ki baa cuo o: «Yi cua ki kubi kubi mu jugisiemu leni i gbiami, nani yi lingi o sanjialo yeni. 53Min den ye leni yi daali kuli U Tienu diegu nni, yii den cuo nni, ama moala yi yogunu pundi, ke li biigili paalu mo diedi.» #Luk 19.47; 21.37.
Pieli nia ke waa bani Jesu
(Mat 26.57—27.1; Mrk 14.53—15.1; Jan 18.13-27)
54Bi den cuo Jesu ki gedini bi kopadicianba bado diegu nni. Pieli den ŋua foagima. 55Ban den cuoni u mu u luolu siiga, ki taani ki kaa ki yie, Pieli den kali leni ba. 56Yaa jafanba n tuuni ku diegu yeni niinni siiga yendo den laa o, ke o kaa u mu kani, ki noanli o ki yedi: «O joa na moko den ye leni o.» 57Pieli den nia ki yedi o: «Aa-a, o pua ne, mii bani o.» 58Lan yeni waamu, nitoa den laa o ki yedi: «Amoko tie bi niba yeni siiga yua yo.» Pieli den guani ki yedi: «Aa-a, mii tie o.» 59Lan den waagi waamu, nitoa moko den ñii ki yedi: «Moamoani lige, o joa na moko den ye leni o, kelima o tie Galile yua yo.» 60Pieli den guani ki yedi o: «Aa-a, mii bani ŋan maadi yaala.» Lanyogunu hali ke o da maadi, ku kootongu den mua. 61O Diedo den jigidi ki diidi Pieli. Pieli ji den tiadi wani o Diedo n yedi o yaa maama na: «Ku naa ñiagu, hali ke ku kootongu daa mua, a baa nia taalimitaa ke ŋaa bani nni.» 62O den ñani ki ban mua leni li paboanli.
Bi sugi ki go pua Jesu
(Mat 26.67-68; Mrk 14.65)
63Yaaba n den kubi Jesu den ñuadi o ki pua o, 64ki fini o nunga li cabili ki tua: «Ŋme n pua ŋa? Bandi o!» 65Bi go den sugi o sugitoadi boncianla.
Jesu sedi bi cancantieba nintuali
(Mat 26.59-66; Mrk 14.55-64; Jan 18.19-24)
66Lan den yendi, Jufinba cancantieba taancianli, lani n tie bi kopadicianba yudanba, li bali maama banda leni a nikpela, den taani ki gedini Jesu bi taanli kani#22.66 Bi taankaanu den kpa kuu leni U Tienu diegu. ki yedi o: 67«A yaa tie U Tienu n Gandi Yua, ŋan waani ti.» Jesu den guani ki yedi ba: «N yaa waani yi la, yi kan dugi n maama po. 68N yaa buali yi liba mo, yi kan guani puu. 69Die dinla liiga, o Joa Bijua baa yaa kaa U Paaciamu Daano U Tienu jienu po.» 70Bikuli den yedi o: «Lanwani, a tie U Tienu Bijua yo?» O den guani ki yedi ba: «Yinba yi ba n yedi. N tie wane.» 71Lani yaa po, bi den yedi biyaba: «Siedinba ki go tie tiladi. Tinba ti ba, ti gbadi la o ñoabu nni.»
Pilihan Saat Ini:
Luki 22: BGP
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Gulmancema Protestant Bible © Bible Society of Burkina Faso, 2013.