PUDUT 12
12
Allah Nawar Ni Abram
1 #
Kek 7.2–3; Ibr 11.8 Idi kebala Tuhan ni Abram, “Remuat iko ratnan bawangmu, pupumu, idi ruma' tamanmu, amé' bawang luk badénKu namu. 2Idi Ui sikal nganau' namu mangun ku aceh pupu luk mula', idi Ui ngeperuan namu idi nganau' ngadanmu mebala, pad ineh mangun ku peruan kuan lun baken.
3 #
Gal 3.8
“Ui ngeperuan idé-idé luk ngeperuan namu.
Iamo' Ui ngediman lemulun luk ngediman namu.
Idi rat namu amung-amung pupu luk bang tana' ini miak ngalap peruan.”
4Kareb ulun Abram 75 lak idi ieh nenalan rat Haran, maya' kudeng luk bila Tuhan neneh. Idi Lut pana' nemaya' neneh. 5Idi Abram nenguit awanneh Sarai, anak pinakenneh Lut, dengan amung-amung binaweh idi demulun luk ilapdeh déi' bawang Haran. Idi ideh nenalan iné' bawang Kanaan.
Kareb ideh nacing déi' bawang Kanaan, 6idi Abram nelemaba bawang ineh pad ieh nacing lawa kayuh luk meraben déi' Moré, ieh ineh su luk inan sembayang déi' Sikem. Idi kareb ineh lun Kanaani tudo bang bawang ineh. 7#Kek 7.5; Gal 3.16 Idi Tuhan nesilagan ni Abram, kebalaNeh, “Ui maré tana' ini kuan inulmu.” Idi su ineh Abram nemudut aceh bubpun kuan Tuhan luk pangeh nesilagan neneh. 8Pangeh ineh ieh nemubuh iné' luun pegkung luk pa busat aco bawang Baitel. Idi ieh nelupo arang Baitel luk pa acep aco dengan Ai luk pa busat aco. Idi su ineh teh ieh nemudut aceh bubpun, idi ieh nesembayang inan Tuhan. 9Idi Abram nenalan matun Tana' Negeb.
Abram Déi' Masir
10Idi inan aceh iru' bang bawang ineh, idi Abram iné' déi' Masir sikal tudo déi', ngaceku iru' pelaba io bang bawang ineh. 11Idi kareb ieh lélé macing déi' Masir, idi kebalaneh nan awanneh ineh, “Ui kali' namu seburur decur luk metaga. 12Kareb lun Masir nier namu, ideh miak pebala, ‘Ini awanneh.’ Idi ideh sikal ngaté negku, pad ideh miak ngalap namu. 13#Pud 20.2; 26.7 Do' iko mala namu kinanakku, pad ui na mesusa' ruendeh, idi ui miak uen ngulun ngaceku iko.” 14Kareb Abram nacing bang bawang Masir, idi lun Masir nenier decur ineh selemulun luk do' taga. 15Idi pengulu-pengulu raca' Masir nenier neneh, idi nengubur neneh pa kiungneh. Idi decur ineh inuitdeh semuet bang ruma' raca'. 16Idi ieh nengasa' Abram do'-do' ngaceku decur ineh; idi ieh nemaré kuan Abram amék, sapi', keladai, demulun, idi unta.
17Idi Tuhan nengacing ét luk mebura' kuan raca' idi uang tetek ruma'neh, ngaceku Sarai awan Abram ineh. 18Idi raca' nenawar ni Abram, idi kebalaneh, “Kudeng apeh luk inau'mu negku? Ngudeh iko na maré kali' negku ratnan decur ineh awanmu? 19Ngudeh iko neten neneh kinanakmu, pad ui lélé ngalap neneh ku awanku? Siruh, ini awanmu, do' ngalap neneh idi buro!” 20Idi raca' Masir nemaré bala kuan lun dukenneh, pad ideh nenated ni Abram remuat rat bang bawang ineh dengan awanneh, idi dengan amung-amung luk ieh kuan.
Pilihan Saat Ini:
PUDUT 12: BLD
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
BALA LUK DO' Lun Bawang Bible © The Bible Society of Malaysia 1982, Second Edition 1998.