Mateu 2
2
Kwiza chavaka-mangana
1 Jino omu asemukile Yesu muMbetelema, limbo lyakuYuleya, hamakumbi amwangana Helote, kuYelusalema kwejile vaka-mangana kufuma kumututuko,
2nakuhulisa ngwavo, Ou Mwangana wavaYuleya násemuka, ali kulihi? Mwomwo twamwene tanganyika yenyi omu atutukile, kaha tuneza nakulifukula kuli Ikiye.
3Omu mwangana Helote achivwile alizakaminyine chikuma, hamwe navaka-Yelusalema vosena.
4Kaha akungulwile vapilishitu vavalemu vosena navaka-kusoneka javaYuleya nakuvahulisa okwo atela Kulishitu kusemukila.
5Vamulwezele ngwavo, Mu Mbetelema limbo lyakuYuleya, mwomwo mukiko asonekele kapolofweto ngwenyi,
6 Nayove, ove Mbetelema, mulifuchi lyaYuta,
Kaweshi uwakukuminamo mukachi kavaka-kuyula javaYutako,
Mwomwo muli ove namukafuma Muka-kuyula
Ou mwakafunganga vatu jami vaIsalele.
7Haze vene Helote asanyikilile vaze vaka-mangana kupenge nakuvahulisa kanawa vamulweze tando yize ásolokele uze tanganyika.
8Kaha avatumine ku Mbetelema, ngwenyi, Yenu mukamutonde kanawa owo Mwana, kaha omu namukamuwana, mwizenga nakungulweza, mangana nayami nawa ngukayeko nakulifukula kuli Ikiye.
9Hakukumisa kwivwilila mwangana, vayile. Kaha kumana, uze tanganyika vamwene hakututuka chenyi avatetekelele nomu ahetele nakwimana haze apwile uze Mwana.
10Hakumona uze tanganyika, vawahililile chikumakuma nachisambo chachinene.
11Hakwingila muze muzuvo, vamwene uze Mwana nanaye Maliya, kaha valimbilile hamavu nakulifukula kuli uze Mwana. Kaha vasokolwele muze mwapwile vikumba vyavo nakumuhana mawana — ulu nalavona#2:11 Unga waulilila wahamutondo walivumba lyamwaza, vauzachishile hakuneha livumba lyamwaza muzuvo hakuwocha. namila#2:11 Unga waulilila wahamutondo walivumba lyamwaza, vauzachishile hakufunda vafu..
12Jino hakuvakanda muchilota ngwavo vazeneke kuhiluka kuli Helote, vazachishile jila yeka nakukinduluka kulifuchi lyavo.
Yesu navamuchinyishila kuEjipitu
13Jino omu vafumineko, kukasumuka, kangelo kaMWATA mwalisolola kuli Yosefwe muchilota nakwamba ngwenyi, Hinduka, mbata Ou Mwana nanaye uchinyine kuEjipitu ukatwameko palanga nomu nangukakulweza. Mwomwo Helote najinyi kumutonda-tonda Ou Mwana amunongese.
14Kaha ahindukile, ambachile Uze Mwana nanaye naufuku nakuya kuEjipitu.
15Kaha atwamine kuze swi-i nomu afwile Helote, mangana mazu ahanjikile MWATA muli kapolofweto atesemo, akwamba ngwenyi,
Ngwasanyikile Mwanami afume muEjipitu.
Helote mwajiha vakemba vamalunga
16Jino omu Helote amwene ngwenyi vaze vaka-mangana vanamuhulamisa, akwachile utenu waunene chikuma, atumine maswalale nakujiha vana vamalunga vosena muMbetelema, namungalila yize yosena, vamyaka yivali nakwiza mwishi, kweseka natando yize vamulwezele vaze vaka-mangana.
17Haze vene mazu ahanjikile kapolofweto Yelemiya ateselemo, akwamba ngwenyi,
18 Lizu lyevwakanyine muLama,
Kwapwile jimbimbi najingungu,
Lakele mwalilila vana venyi,
Akanyine kumuvendejeka,
Mwomwo vanavalalisa.
Yesu navamutwala kuNazaleta
19Oloze omu Helote afwile, kutala, kangelo kaMWATA mwasoloka kuli Yosefwe muEjipitu mukulota nakwamba ngwenyi,
20Katuka, mbata Ou Mwana nanaye, yako kulifuchi lyaIsalele, mwomwo vaze vatondelenga mwono#2:20 Ngwavo, vamujihe. wayOu Mwana vanafu lyehi.
21Kaha akatukile, ambachile Uze Mwana nanaye nakuya kulifuchi lyaIsalele.
22Oloze hakwivwa ngwavo Alekelau apwile nakuyula muYuleya muchihela chaise Helote, evwile woma wakuyako. Jino hakumukanda muchilota, afumineko nakuya kungalila yaNgalileya.
23Kaha ayile nakutwama mulimbo-lyakembwe vavuluka ngwavo Nazaleta, mangana mazu aze vahanjikile vapolofweto atesemo, akwamba ngwavo,
Navakamuvuluka ngwavo, Muka-Nazaleta.
Pilihan Saat Ini:
Mateu 2: LUE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Bible Society of Zambia