SAN JUAN 1
1
Rimashca Shimica runa tucushcamanta
1Taita Dios cai pachata manarac ruhuacpimi, Rimashca Shimica ña tiyarca. Chai Rimashca Shimica Dioshuanmi carca. Shinallatac chai Rimashca Shimica Diosllatacmi carca. 2Paica callarillapitacmi Taita Dioshuan carca. 3Paillahuantacmi Taita Diosca tucuita ruhuarca. Mana paihuanca imatapish mana ruhuarcachu. 4Paillapitacmi causaica tiyarca. Chai causaimi gentecunapac Achicyachic carca. 5Chai Achicyachicmi amsapi achicyachicun. Amsaca chai achictaca mana atinchu.
6Taita Diosca Juan runatami cacharca. 7Pai Achicyachicmanta huillashpaca, tucui gentecuna crichunmi chashnaca huillarca. 8Mana Juanchu achicyachicurca, ashtahuanpish Achicyachic tiyashcata huillachun cachashcallami carca. 9Chai Achicyachicmi tucui gentecunata achicyachingapactac cai pachaman shamurca.
10Chai Rimashca Shimimi cai pachapi carca. Taita Diosca chai Rimashca Shimihuanmi cai pachataca ruhuarca. Chashna cacpipish, cai pachapi causaccunaca paitaca mana ricsircacunachu. 11Paipac gentecunapacmanmi shamurca. Shina shamucpipish, paipac gentecunaca mana chasquircachu. 12Shina mana chasquicpipish, maijanlla paita crishpa chasquiccunataca, Diospac huahuacuna tucuchunmi chasquin. 13Chaicunaca mana runacunapac munaimanta, shinallatac mana cai pachapi huacharishcallamantachu Taita Diospac huahuacuna tucun, ashtahuanpish Taita Diospac munaimantami paipac huahuacuna tucun.
14Chai Rimashca Shimillatacmi runa tucushpa, yallita c'uyashpapish, Dios ima shina cashcata ricuchishpapish ñucanchichuan causangapac shamurca. Paitaca Taita Diospac shuclla Churi cashcatapish, pai sumac cashcatapish ricurcanchicmi. 15Paimantami Juanca: “ ‘Ñucapac q'uipa shamucca ñucapac ñaupa ña tiyashcamanta, ñucata atishpa yalli allica can’ nishpa huillarcani. Chai huillashcaca cai runami” nishpa sinchita rimarca.
16Paipac sumac charishcacunamantami tucui ñucanchicca c'atinta c'atinta allicunata chasquicunchic. 17Taita Diosca Moisesmanca mandashcacunatami curca. Ashtahuanpish Dios ima shina cashcata shinallatac c'uyac cashcataca, Apunchic Jesucristomantami ricuchirca. 18Taita Diostaca jaicapi pi mana ricushcachu. Shina cacpipish Taita Dioshuan shuc yuyailla causac, paipac shuclla Churi Diosllatac cashpami, Taita Dios ima shina cashcataca ricuchirca.
Bautizac Juan “mana Cristochu cani” nishcamanta
(Mt 3.11-12; Mr 1.7-8; Lc 3.15-17)
19Jerusalén pueblopi causac mandac israelcunaca,*f** Bautizac Juan maijan cashcata yachangapacmi curacunatapish, curacunata ayudac levitacunatapish paipacman tapuchun cacharcacuna. 20Shina tapucpi, Juanca mana pacashpami:
—Ñucaca mana Quishpichic Cristochu cani— nishpa huillarca.
21Shina nicpi, cutinllatac tapushpaca:
—Shinashpaca, ¿maijantac cangui? ¿Ñaupa huillac Eliaschu cangui?— nicpi Juanca:
—Mana paichu cani— nirca.
Shina nicpi, paicunaca ashtahuanmi:
—Shinashpaca, ¿shamuna cashca Diosmanta huillacchu cangui?— nircacuna.
Shina nicpi Juanca:
—Mana— nirca.
22Shina nicpi paicunaca:
—Shinashpaca, ¿maijantac canguiyari? Ñucanchicca tapuchun cachaccunaman huillanami canchic. Canllamantatacca, ¿imatatac ningui?— nircacuna.
23Shina nicpi Juanca:
—Ñaupa huillac Isaías huillashca shina, ‘Quishpichic shamuna ñanta derechaichic’ nishpa, shitashca pambapi caparicuc shinami cani— nirca.
24Fariseocuna*f** tapuchun cachashca chai runacuna 25cutin tapushpaca:
—Quishpichic Cristopish, ñaupa huillac Eliaspish, shamuna cashca Diosmanta huillacpish mana cashpaca, ¿ima nishpatac bautizacungui?— nircacuna.
26Shina nicpi Juanca:
—Ñucaca yacullahuanmi bautizacuni, ashtahuanpish cancunapurapimi cancunapish mana ricsishca shuc runa tiyan. 27Paica ñucapac q'uipatami shamunga. Ñucaca paipac ushuta huatashcallatapish mana pascaipacmi cani— nirca.
28Tucui chaicunaca, Jordán yacumanta inti llucshina lado Betania llactapi Juan bautizacucpimi, chashnaca tucurca.
Jesusca Taita Dios cachashca Pactalla Oveja cashcamanta
29Cayandic punzha Jesús paipacman chayamucucta ricushpami, Juanca cashna nirca:
—Riquichic. Caimi cai pachapi causaccunamantaca, juchacunata anchuchichun Taita Dios cachashca Pactalla Ovejaca.*f** 30Paitami ñucaca: ‘Ñucapac q'uipa shamucca ñucapac ñaupa ña tiyashcamanta ñucata yallimi’ nicurcani. 31Ñucallatacpish chai shamucca pai cashcataca mana yacharcanichu. Shina cashpapish israelcuna*f** utca pai shamuna cashcata yachachunmi, yacuhuan bautizacurcani— nirca.
32Juanca mana pacashpami caitapish nirca:
—Diospac Espíritu jahuamanta paloma shina shamushpa, paipi tiyarictapish ricurcanimi. 33Chashna ricushpapish, chai shamucca pai cashcataca mana yacharcanichu. Ashtahuanpish yacuhuan bautizachun ñucata cachac Taita Diosmi: ‘Maijanpimi ñuca Espíritu shamushpa tiyaricta ricungui, chaimi ñuca Espirituhuanca bautizanga’ nirca. 34Chaicunataca ñucami ricurcani. Chaimantami: ‘Paica Diospac Churimi’ nishpa huillacuni— nirca.
Jesuspac punta yachacuccunamanta
35Cayandic punzhaca cutinmi Juanca paipac yachacuccunapuramanta ishcaihuan chaipi carca. 36Jesús chaita pasacucta ricushpami Juanca:
—Riquichic. Paimi Taita Dios cachashca Pactalla Ovejaca—*f** nirca.
37Juanpac ishcai yachacuccuna chaita uyashpaca, Jesusta c'atishpa rircacunami. 38Chashna c'aticta tigrarishpa ricushpami Jesusca:
—¿Imatatac mashcacunguichic?— nishpa tapurca.
Shina tapucpi paicunaca:
—Rabí, ¿maipitac causangui?—nirca. (“Rabí” nishpaca, “yachachic” nisha ninmi).
39Shina nicpi Jesusca:
—Shamuichic, ricunguichic— nirca.
Chashna rishpami, pai maipi causacta ricurcacuna. Ña chuscu horas chishi shinamantaca tutacamanmi chaipi paihuan saquirircacuna. 40Juanpacmanta Jesusta c'atishpa ric chai ishcai yachacuccunamantaca, shucca Simón Pedropac huauqui Andresmi carca. 41Manarac imata ruhuashpami, Andresca paipac huauqui Simonhuan tupangapac rirca. Shina rishpa ña tupashpaca:
—Ñami Mesiashuanca tuparcanchic— nirca. (“Mesías” nishpaca, “Quishpichic Cristo” nisha ninmi).
42Chaimantami Andresca Simonta Jesuspacman pusharca. Chashna pushacpimi, Jesusca Simonta ricushpaca:
—Juanpac churi Simonmi cangui. Cunanmantaca Cefas shutitami shutichini— nirca. (“Cefas” nishpaca, “Pedro*f**” nisha ninmi).
Felipetapish, Natanaeltapish Jesús c'ayashcamanta
43Chai cayandic punzhaca Jesusca Galilea llactaman rinatami yuyarirca. Chashna ricushpami, Felipehuan tupashpaca:
—Ñucata c'ati— nirca.
44Felipeca Betsaida pueblomantami carca. Chai pueblollamantatacmi Andrespish, Pedropish carca. 45Felipeca Natanaelta mashcangapac rishpa paihuan tupashpaca:
—Moisés mandashcacunapi quillcashpa huillashca, shinallatac ñaupa huillaccuna quillcashcapi huillashca ñucanchic shuyacushca runahuanca ñami tuparcanchic. Paica Nazaret pueblomanta Josepac churi Jesusmi— nirca.
46Shina nicpi Natanaelca:
—Nazaret pueblomantaca, ¿ima allitac llucshingayari?— nirca.
Shina nicpi Felipeca:
—Canllatac shamui, ricungui— nirca.
47Jesusca Natanael paipacman cuchuyacta ricushpaca:
—Caipimi Israel*f** runatac shamun. Paica jaicapi manatac llullanchu— nirca.
48Shina nicpi Natanaelca:
—¿Ima shinatac ñuca ima laya cashcataca yachangui?— nishpa tapurca.
Shina nicpi Jesusca:
—Can higo yura ucupi cacpi, Felipe manarac c'ayacpimi, cantaca ña ricurcani— nirca.
49Shina nicpi Natanaelca:
—Yachachic, canca Diospac Churimi cangui, israelcunata Jatun Mandacpishmi cangui— nirca.
50Shina nicpi Jesusca:
—¿‘Higo yura ucupi cacllapitacmi ña ricurcani’ nicllapichu cringui? Ashtahuanpish caimanta yallitami ricungui— nirca.
51Shinallatac Jesusca:
—Jahua pacha pascaricpi, Diospac angelcuna Runa Tucungapac shamushca*f** ñucapacman huichicucta, uricuctami ricunguichic. Chaica chashnatacmi canga— nirca.
Pilihan Saat Ini:
SAN JUAN 1: QXR96
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Quichua Cañar Nuevo Testamento © United Bible Societies in Ecuador, 1996.