SAN JUAN 3
3
Nicodemo runa Jesushuan parlashcamanta
1Fariseocunapuramanta*f** Nicodemo shuti shuc runami tiyarca. Paica israelcunapurapica*f** alli nishcami carca. 2Paimi Jesuspacman tuta rishpaca:
—Yachachic. Ñucanchicca can Dios cachashca yachachingapac shamushcataca yachanchicmi. Pipish can ruhuacuc shina, pi mana ruhuaipaccunataca mana Dioshuan cashpaca, mana ruhuanmanchu— nirca.
3Shina nicpi Jesusca:
—Maijanpish mana cutin huacharicca,#3.3 Mana cashpaca: “Maijanpish jahuamanta mana huacharicca” ninapish canmi. Taita Dios mandacuctaca mana ricungachu. Chaica chashnatacmi canga— nirca.
4Shina nicpi Nicodemoca:
—¿Ima shinatac shuc yuyac runaca cutin huacharingayari? ¿Maitatac cutin mamapac huicsapica yaicungayari?— nirca.
5Shina nicpi, Jesusca cashnami nirca:
—Maijanpish yacuhuan, Diospac Espirituhuan mana huacharicca, Dios mandacucmanca manatac yaicungachu. Chaica chashnatacmi canga. 6Aichayuc, tulluyucmanta huacharicca, aichayuc tulluyucllatacmi. Ashtahuanpish Diospac Espiritumanta huacharicca, Diospac Espiritutami charin. 7‘Cutin huacharinami can’ nishcamantaca, ama mancharinguichu. 8Huairaca maimanta cashpapish p'ucunllami. Shina p'ucucpi uyashpapish, maimanta shamuctapish, maiman rictapish mana yachanguichu. Shinallatacmi Diospac Espiritumanta huachariccunaca— nirca.
9Shina nicpi Nicodemoca:
—¿Ima shinatac chashnaca tucungayari?— nirca.
10Shina nicpi, Jesusca cashnami nirca:
—¿Canca israelcunapurapi yachachic cashca jahuachu, caicunataca mana yachangui? 11Ñucanchicca imatapish yachashcatami ninchic, shinallatac imata ricushcatami huillanchic. Shina cacpipish, ñucanchic ima nishcataca mana cringuichicchu. Chaica chashnatacmi can. 12Cai pachapi ima tiyashcamanta huillacpi mana crishpaca, ¿ima shinatac jahua pachamanta huillacpica cringuichicyari?
13Jahua pachamanca pi mana rishcachu, ashtahuanpish Runa Tucungapac shamushca*f** ñucallami jahua pachamantaca shamurcani. Ñucami jahua pachapi causacca cani. 14Ima shinami Moisés shitashca pambapi broncemanta ruhuashca culebrata caspipi jahuaman huarcushpa ricuchirca, shinallatacmi Runa Tucungapac shamushca ñucapish, caspipi jahuaman huarcushca cana cani. 15Maijanpish ñucata cricca huiñai causaita charichunmi, chashna ruhuashca cana cani.
Cai pachapi causaccunata Taita Dios c'uyashcamanta
16Taita Diosca cai pachapi causaccunata mai c'uyashpami, paipac shuclla Churita cai pachamanca cacharca. Pipish paita cricca ama chingarishpa huiñai causaita charichunmi, chashnaca cacharca. 17Taita Diosca paipac Churitaca cai pachapi causaccunata llaqui pachaman cachachunca mana cacharcachu, ashtahuanpish cai pachapi causaccunata quishpichichunmi cacharca. 18Maijanpish Diospac Churita crictaca llaqui pachamanca mana cachangachu, ashtahuanpish paipac shuclla Churita mana crictami, pai mana crishcamanta llaqui pachamanca cachanga. 19Paicunaca mana allita ruhuacushcamantami Achicyachic shamucpipish, paita mana munashpa amsapi causacunallata ashtahuan munarcacuna. Chashna cashpami, paicuna millaita ruhuashcamantaca llaquita apangacuna. 20Tucui mana allita ruhuaccunami Achicyachictaca p'iñancuna. Paicunapac mana allita ruhuashcacuna ama achicman ricurichunmi, mana cuchuyashun nincuna. 21Taita Dios munashcata ruhuashpa causacushcata ricuchunmi, cashcata ruhuashpa causaccunaca achicman cuchuyancunalla— nirca.
Bautizac Juan huillashcamanta
22Chai q'uipaca, paipac yachacuccunandicmi Jesusca Judea llactaman rirca. Tauca punzhacunata paicunahuan chaipi cashpami, gentecunata bautizarca. 23Bautizac Juanpish chai punzhacunallapitacmi, Salim llacta cuchullapi cac Enón llactapi achca yacu tiyashcamanta paipacman shamuc gentecunataca bautizacurca. 24Bautizac Juanta manarac carcelpi churacpimi, chashnaca tucurca.
25Chaipimi Juanta c'aticcunapuramanta maijancunaca, Israelmanta*f** shuc runahuan Diospac ñaupapi alli ricuringapac armarina*f** jahua rimanacurcacuna. 26Chaimanta Juanpacman rishpaca:
—Yachachic. Jordán yacu chimbanicpi canhuan tupanacuc, chai can parlacushca runami bautizacun. Achca gentecunami paipacmanca shamucun— nircacuna.
27Chaita uyashpami Juanca cashna nirca:
—Taita Dios imatapish mana munacpica, pipish imata mana ruhuanmanchu. 28‘Ñucaca mana Quishpichic Cristochu cani, ashtahuanpish paipac ñaupata huillachun cachashcallami cani’ nishpa ñuca huillashcata, cancunallatacmi ña uyarcanguichic. 29Shuc bodapi cashpaca, noviaca noviopacmi. Noviopac shuc ricsishca chaipi cashpa, novio rimashcata uyashpaca cushicunmi. Shinallatacmi ñucapish Novio rimashcata uyashpaca, yallita cushicuni. 30Cunan punzhamanta pachami Quishpichic Jesusca punzhanta ashtahuan alli nishca cana can. Ashtahuanpish ñucaca punzhantami yangalla nishca cana cani— nirca.
Jahua pachamanta shamucca ima shina cashcamanta
31Jahua pachamanta shamucmi tucuita yallica. Cai pachamanta cacca cai pachapi causaccuna shinallami. Shina cashpami, cai pachallamanta riman. Ashtahuanpish jahua pachamanta shamucmi tucuita yallica. 32Paica imatapish ricushcacunallata, shinallatac imatapish uyashcacunallatami huillan. Shina cacpipish, pai huillashcataca pi mana crincunachu. 33Shina cashpapish pai huillashcata maijanllapish crishpaca, Taita Dios mana llullac cashcatami ricuchincuna. 34Taita Diosllatacmi pai cachashca cai pachaman shamucmanca, paipac Espiritutaca yallita cushca. Chaimantami paica Taita Diosmanta huillan. 35Taita Diosca paipac Churita c'uyashpami, tucuita pai mandachun cushca. 36Maijanpish paita cricca huiñai causaita charinmi. Maijanpish paita mana cricca mana huiñai causaita charinchu, ashtahuanpish paitaca Taita Diosca p'iñacungallami.
Pilihan Saat Ini:
SAN JUAN 3: QXR96
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Quichua Cañar Nuevo Testamento © United Bible Societies in Ecuador, 1996.